ທ່ານ Tony Tan ອະດີດຮອງນາຍົກລັດຖະມົນຕີສິງກະໂປ ໄດ້ຊະນະການເລືອກຕັ້ງ
ປະທານາທິບໍດີ ດ້ວຍຄະແນນສຽງລື່ນຄູ່ແຂ່ງພຽງໜ້ອຍດຽວ ຫລັງຈາກມີການນັບບັດ
ຄືນໃໝ່ໃນວັນເສົາວານນີ້.
ພວກເຈົ້າໜ້າທີ່ເລືອກຕັ້ງກ່າວໃນວັນອາທິດມື້ນີ້ວ່າ ທ່ານ ໂທນີ ຕັນ ໄດ້ຄະແນນສຽງ
ລື່ນຄູ່ແຂ່ງພຽງແຕ່ 7,269 ສຽງ ຈາກຈໍານວນຜູ້ປ່ອນບັດ ຫລາຍກວ່າສອງລ້ານຄົນ.
ພວກເຈົ້າໜ້າທີ່ ໄດ້ມີຄໍາສັ່ງໃຫ້ນັບບັດເລືອກຕັ້ງໃໝ່ ຫລັງຈາກການປ່ອນບັດໃນວັນ
ເສົາວານນີ້ ເນຶ່ອງຈາກບັດຄະແນນມີຈໍານວນແຕກຕ່າງກັນບໍ່ຮອດນຶ່ງເປີເຊັນລະຫວ່າງ
ທ່ານ ຕັນ ແລະຜູ້ທ້າຊິງສູງສຸດຂອງທ່ານ ຄື ນາຍແພດ Tan Cheng Bock.
ການເລືອກຕັ້ງຄັ້ງນີ້ ຖືວ່າເປັນການລົງປະຊາມະຕິກ່ຽວກັບພັກກິດປະຊາ People’s Action Party ຫລື PAP ຊຶ່ງເປັນພັກທີ່ໄດ້ປົກຄອງປະເທດ ທີ່ມີເມືອງດຽວນັ້ນ ມາຕັ້ງແຕ່ ປີ 1959.
ປະທານາທິບໍດີ ທີ່ຖືກເລືອກຕັ້ງໃໝ່ນີ້ ແມ່ນໄດ້ຮັບໜຸນຫລັງຈາກພັກຝ່າຍສ່ວນໃຫຍ່
ຂອງວົງການການເມືອງ ໃນຂະນະທີ່ ດຣ. ບ໊ອກ ຊຶ່ງເປັນອະດີດຜູ້ແທນທີ່ສັງກັດໃນ
ພັກຂອງລັດຖະບານນັ້ນ ໄດ້ຫັນໄປຊອກຫາການສະໜັບສະໜຸນຈາກຝ່າຍຄ້ານ ຢ່າງ ເປີດເຜີຍ.
ທ່ານ Lee Hsien Loong ນາຍົກລັດຖະມົນຕີສິງກະໂປ ແລະພັກ PAP ບໍ່ໃຫ້ການ ສະໜັບສະໜຸນທ່ານ ຕັນ ຢ່າງເປັນທາງການ ແຕ່ທ່ານ ລີ ກໍໄດ້ສະແດງຄວາມຊົມເຊີຍທ່ານ ຕັນ ເມື່ອເດືອນຜ່ານມາ.
ຫລັງຈາກມີການປະກາດຜົນການເລືອກຕັ້ງໃນວັນອາທິດມື້ນີ້ແລ້ວ ທ່ານ ຕັນ ກ່າວວ່າ ທ່ານ ມີແຜນການທີ່ຈະປະຕິບັດງານກັບຊາວສິງກະໂປ ໝົດທຸກຄົນ ບໍ່ວ່າພວກເຂົາເຈົ້າຈະພົວພັນ ກັບພັກການເມືອງໃດກໍຕາມ.
ຕໍາແໜ່ງປະທານາທິບໍດີສິງກະໂປ ໂດຍສ່ວນໃຫຍ່ແລ້ວ ເປັນຕໍາແໜ່ງແຕ່ໃນນາມ ຫລື
ໃນພິທີ ແຕ່ການເລືອກຕັ້ງເມື່ອວັນເສົາວານນີ້ ກໍໄດ້ດຶງດູດເອົາຜູ້ສະໝັກເຖິງສີ່ຄົນ.
