ພັກທີ່ກໍາລັງປົກຄອງປະເທດສິງກະໂປຢູ່ໃນປັດຈຸບັນນີ້ ໄດ້ຊະນະສຽງສ່ວນຫລາຍໃນສະພາ ໃນການເລືອກຕັ້ງທົ່ວປະເທດ ແຕ່ພັກຝ່າຍຄ້ານກໍໄດ້ຄະແນນສຽງຫລາຍເປັນປະວັດການເຊ່ນກັນ.
ຜົນການເລືອກຕັ້ງຂັ້ນຕົ້ນທີ່ປະກາດອອກມາໃນວັນອາທິດມື້ນີ້ ພົບວ່າ ພັກກິດປະຊາຊົນ ຫລື People’s Action Party ຊຶ່ງເປັນພັກທີ່ປົກຄອງ ປະເທດຢູ່ໃນປັດຈຸບັນນີ້ ໄດ້ຊະນະ 81 ບ່ອນນັ່ງ ໃນຈໍານວນທັງໝົດ 87 ບ່ອນນັ່ງໃນສະພານັ້ນ ແຕ່ກໍປາກົດວ່າພັກຝ່າຍຄ້ານໄດ້ ຊະນະຫົກທີ່ນັ່ງ ໂດຍນັບວ່າໄດ້ຫລາຍທີ່ສຸດ ເທົ່າທີ່ເຄີຍໄດ້ຮັບມາ.
ການເລືອກຕັ້ງທົ່ວປະເທດເອົາສະມາຊິກສະພາ ເມື່ອວັນເສົາວານນີ້ ຖືວ່າເປັນການເລືອກຕັ້ງ ທີ່ມີການແຂ່ງຂັນກັນຫລາຍທີ່ສຸດ ນັບຕັ້ງແຕ່ສິງກະໂປ ໄດ້ຮັບເອກະລາດຈາກອັງກິດເມື່ອປີ 1965 ເປັນຕົ້ນມາ ໂດຍມີຜູ້ສະມັກ ເລືອກຕັ້ງຈາກພັກຝ່າຍຄ້ານ ໄດ້ລົງສະໝັກແຂ່ງຂັນເອົາ ທີ່ນັ່ງເກືອບທັງໝົດ ຍົກເວ້ນ 5 ບ່ອນນັ່ງໃນສະພາ.
ໃນການເລືອກຕັ້ງຫລາຍໆຄັ້ງຜ່ານມານັ້ນ ພວກພັກຝ່າຍຄ້ານແຂ່ງຂັນໄດ້ພຽງບໍ່ເທົ່າໃດທີ່ນັ່ງ
ພວກເຈົ້າໜ້າທີ່ການເລືອກຕັ້ງກ່າວວ່າ ພັກທີ່ປົກຄອງປະເທດ ໄດ້ຮັບໄຊຊະນະປະມານ 60 ເປີເຊັນຂອງຄະແນນປ່ອນບັດຂອງການເລືອກຕັ້ງມື້ ວັນເສົາວານນີ້ ຊຶ່ງຫລຸດລົງຈາກ 67 ເປີເຊັນໃນການເລືອກຕັ້ງຄັ້ງລ່າສຸດ ເມື່ອປີ 2006 ນັ້ນ.
ພວກພັກຝ່າຍຄ້ານສາມາດສ້າງຄະແນນສຽງໄດ້ ຍ້ອນຄວາມບໍ່ພໍໃຈຂອງປະຊາຊົນນໍາພັກທີ່ ປົກຄອງປະເທດ ເມື່ອໝໍ່ໆມານີ້ ກ່ຽວກັບສະພາວະຄ່າຄອງຊີບທີ່ຖີບຕົວສູງຂຶ້ນນັບມື້ ການຂາດ ຄວາມຮັບຜິດຊອບຂອງລັດຖະບານ ແລະບັນຫາຄົນເຂົ້າເມືອງ.
