ສິງກະໂປເປີດເຜີຍໂຕເລກ ທີ່ຊີ້ບອກວ່າ ໃນປີ 2010
ເສດຖະກິດຂອງຕົນມີການເຕີບໂຕຂຶ້ນໃນອັດຕາ 14.7
ເປີເຊັນ ຊຶ່ງເປັນອັດຕາສູງສຸດໃນປະວັດສາດຂອງສິງກະໂປ.
ໂຕເລກທີ່ເປີດເຜີຍອອກໃນວັນຈັນມື້ນີ້ ເຮັດໃຫ້ເສດຖະກິດ
ຂອງສິງກະໂປມີອັດຕາການເຕີບໂຕທີ່ໄວທີ່ສຸດໃນເອເຊຍ
ແລະເປັນອັນດັບສອງຂອງໂລກ ຮອງຈາກເສດຖະກິດຂອງ
ປະເທດ Qatar ໃນພາກຕາເວັນອອກກາງ. ກອງທຶນສາກົນຫລື IMF ໄດ້ທໍານາຍວ່າ ການເຕີບໂຕຂອງເສດຖະກິດຂອງ Qatar ຈະຢູ່ໃນອັດຕາປະມານ 16 ເປີເຊັນ ໃນປີຜ່ານມານີ້.
ການເຕີບໂຕຂຶ້ນຢ່າງມະຫາສານຂອງເສດຖະກິດສິງກະໂປໃນປີແລ້ວນີ້ ແມ່ນຕິດຕາມມາ ຫລັງຈາກການຫົດໂຕເຂົ້າ 1.3 ເປີເຊັນໃນປີ 2009 ເວລາການຕົກຕໍ່າລົງຂອງເສດຖະ ກິດໂລກ ສ້າງຄວາມເສຍຫາຍໃຫ້ແກ່ການສົ່ງອອກຂອງສິງກະໂປ. ອັດຕາການເຕີບໂຕຂຶ້ນໄວທີ່ສຸດຂອງເສດຖະກິດສິງກະໂປເທື່ອກ່ອນນັ້ນ ແມ່ນມີຂຶ້ນໃນປີ 1970 ໃນອັດຕາ 13.8 ເປີເຊັນ.
ທ່ານ Song Seng-wun ນັກວິເຄາະດ້ານເສດຖະກິດທີ່ສະຖາບັນຄົ້ນຄວ້າ CIMB ກ່າວກັບວີໂອເອວ່າ ການເຕີບໂຕຂຶ້ນໄວທີ່ສຸດຂອງສິງກະໂປໃນປີຜ່ານ ມານີ້ ແມ່ນເກີດຈາກຄວາມໝັ້ນໃຈທີ່ຟື້ນໂຕຄືນ ຄວາມຮຽກຮ້ອງຕ້ອງການທີ່ແຂງແຮງຂອງພວກຊົມໃຊ້ເຄື່ອງເອເລັກໂຕຣນິກ ແລະການໄຂສະຖານທີ່ຕາກອາກາດຄົບວົງຈອນ 2 ແຫ່ງ ທີ່ມີບ່ອນຫລິ້ນກາຊີໂນນໍານັ້ນ. ລັດຖະບານໃຫ້ຂໍ້ສັງເກດເຊ່ນກັນວ່າ ການເຕີບໂຕຂຶ້ນຢ່າງແຂງແຮງໃນພາກ
ສ່ວນການແພດດ້ານຊີວະວິທະຍາ ໃນຊ່ວງ 3 ເດືອນຫລັງສຸດຂອງປີຜ່ານມາ ກໍມີສ່ວນເຊ່ນກັນ.
ຢ່າງໃດກໍຕາມ ທ່ານ Song ທໍານາຍວ່າ ການເຕີບໂຕຂອງເສດຖະກິດຂອງສິງກະໂປຈະ ລົດລົງມາຢູ່ໃນລະດັບໃກ້ກັບອັດຕາການເຕີບໂຕປົກກະຕິ ຄືປະມານ 5 ເປີເຊັນໃນປີ 2011 ນີ້.
