ລິ້ງ ສຳຫລັບເຂົ້າຫາ

ວັນຈັນ, ໑໕ ກໍລະກົດ ໒໐໒໔

ສັນຍານ​ທີ່​ເກີດ​ຂຶ້ນ​ໃນ​ຂໍ້​ຕົກລົງ​ດ້ານການ​ປ້ອງ​ກັນ​ປະ​ເທດ ລະຫວ່າງ ​ເກົາຫຼີເໜືອ ແລະ ຣັດ​ເຊຍ ສົ່ງຜົນ​ເຮັດ​ໃຫ້ ​ຈີນ ​ມີ​ຄວາມ​ກັງວົນ


ແຟ້ມຮູບ-ປະທານາທິບໍດີຣັດເຊຍ ທ່ານວລາດີເມຍ ປູຕິນ, ຊ້າຍ, ແລະຜູ້ນໍາເກົາຫຼີເໜືອ ທ່ານກິມ ຈົງ ອຶນ ແລກປ່ຽນເອສະການນໍາກັນ ໃນລະຫວ່າງພິທີເຊັນລົງນາມການເປັນຄູ່ຮ່ວມມືພາຄີສະບັບໃໝ່ ໃນນະຄອນຫຼວງພຽງຢາງ, ເກົາຫຼີເໜືອ, ວັນທີ 19 ມິຖຸນາ 2024.
ແຟ້ມຮູບ-ປະທານາທິບໍດີຣັດເຊຍ ທ່ານວລາດີເມຍ ປູຕິນ, ຊ້າຍ, ແລະຜູ້ນໍາເກົາຫຼີເໜືອ ທ່ານກິມ ຈົງ ອຶນ ແລກປ່ຽນເອສະການນໍາກັນ ໃນລະຫວ່າງພິທີເຊັນລົງນາມການເປັນຄູ່ຮ່ວມມືພາຄີສະບັບໃໝ່ ໃນນະຄອນຫຼວງພຽງຢາງ, ເກົາຫຼີເໜືອ, ວັນທີ 19 ມິຖຸນາ 2024.

ສະ​ຫະ​ລັດ ແມ່ນ​ກຳ​ລັງ​ສຶກ​ສາ​ຢ່າງ​ລະ​ມັດ​ລະ​ວັງ ກ່ຽວ​ກັບ ຂໍ້​ຕົກ​ລົງ​ສອງ​ຝ່າຍ​ສະ​ບັບ​ໃໝ່​ລະ​ຫວ່າງ ຣັດ​ເຊຍ ແລະ ເກົາຫຼີ​ເໜືອ, ເຊິ່ງ ວໍ​ຊິງ​ຕັນ ເຊື່ອ​ວ່າ​ອາດ​ຊ່ວຍ​ເຫຼືອ ພຽງ​ຢາງ ໃນ​ໂຄງ​ກາ​ນ​ພັດ​ທະ​ນາ​ອາ​ວຸດ​ນິວ​ເຄ​ລຍ ແລະ ລູກ​ສອນ​ໄຟ​ໄລ​ຍະ​ໄກ​ຂອງ​ເຂົາ​ເຈົ້າ.

ມັນ​ຍັງ​ມີ​ອີກຫຼາຍ​ສັນ​ຍານ​ຂອງ​ຄວາມ​ເຄັ່ງ​ຕຶງ ລະ​ຫວ່າງ ເກົາຫຼີ​ເໜືອ ແລະ ພັນ​ທະ​ມິດ​ທີ່​ຍາວ​ນານ​ຂອງ​ເຂົາ​ເຈົ້າ​ຄື ຈີນ, ລຸນ​ຫຼັງ​ການ​ເຊັນ​ຂໍ້​ຕົກ​ລົງ​ດັ່ງ​ກ່າວ.

ໃນ​ຄຳ​ປາ​ໄສ​ທີ່​ນຳ​ຄັນ ກ່ຽວ​ກັບ ການ​ສະ​ໜັບ​ສະ​ໜູນ​ແຜນ​ຍຸດ​ທະ​ສາດ​ຂອງ ສະ​ຫະ​ລັດ ໃນ​ເຂດ​ອິນ​ໂດ​ປາ​ຊີ​ຟິກ​ຢູ່​ສະ​ພາການ​ພົວ​ພັນ​ຕ່າງ​ປະ​ເທດ​ໃນ​ວັນ​ຈັນ​ວານນີ້, ຮອງ​ລັດ​ຖະ​ມົນ​ຕີ​ການ​ຕ່າງ​ປະ​ເທດ ທ່ານ ເຄີດ ແຄມ​ແບ​ລ ໄດ້​ກ່າວ​ວ່າ ຈີນ ແມ່ນ​ຄົງ​ຈະ​ເປັນ​ຫ່ວງວ່າ ເກົາຫຼີ​ເໜືອ ຈະ​ຖືກ​ສະ​ໜັບ​ສະ​ໜູນ​ໃຫ້​ເອົາ​ບາດ​ກ້າວ​ທີ່​ເປັນ​ການ​ຍຸ​ແຍ່​ ທີ່​ອາດ​ນຳ​ໄປ​ສູ່​ວິ​ກິດ​ການ​ໃນ​ເອ​ເຊຍ​ຕາ​ເວັນ​ສຽງ​ເໜືອ.

ທ່ານ ແຄມ​ແບ​ລ ກ່າວ​ວ່າ “ຂ້າ​ພະ​ເຈົ້າ​ຄິດ​ວ່າ​ມັນ​ຍຸດ​ຕິ​ທຳ​ທີ່​ຈະ​ເວົ້າ​ວ່າ ຈີນ ຢ່າງ​ໃດ​ຢ່າງ​ນຶ່ງ​ແມ່ນ​ກັງ​ວົນ ກ່ຽວ​ກັບ ສິ່ງ​ທີ່​ກຳ​ລັງ​ເກີດ​ຂຶ້ນ​ລະ​ຫວ່າງ ຣັດ​ເຊຍ ແລະ ເກົາຫຼີ​ເໜືອ. ເຂົາ​ເຈົ້າ​ໄດ້​ລະ​ບຸ​ໃນ​ການ​ພົວ​ພັນ​ກັບ​ພວກ​ເຮົາ​ບາງ​ຄັ້ງ, ແລະ ພວກ​ເຮົາ​ກໍ​ສາ​ມາດ​ເຫັນ​ຄວາມ​ເຄັ່ງ​ຕຶງ​ຈຳ​ນວນ​ນຶ່ງ​ທີ່​ກ່ຽວ​ຂ້ອງ​ກັບ​ບັນ​ຫານີ້.”

ທ່ານ ແຄ​ມ​ແບ​ລ ໄດ້​ກ່າວ​ວ່າ​ທ່ານ​ໄດ້​ລົມ​ໂທ​ລະ​ສັບ​ກັບ​ບັນ​ດາ​ເຈົ້າ​ໜ້າ​ທີ່ ເກົາຫຼີ​ໃຕ້ ໃນ​ຄືນ​ວັນ​ອາ​ທິດ​ທີ່​ຜ່ານ​ມາ ເພື່ອ​ຫາ​ລື ກ່ຽວ​ກັບ ບາດ​ກ້າວ​ຕໍ່​ໄປ ເພື່​ອ​ປັບ​ປຸງການ​ຍັບ​ຢັ້ງ​ໃຫ້​ມີ​ຄວາມ​ກະ​ຈ່າງ​ແຈ້ງ​ຂຶ້ນ​ຕື່ມ.

ທ່ານ​ໄດ້​ກ່າວ​ວ່າ “ພວກ​ເຮົາ​ເຊື່ອ​ວ່າ​ມັນມີການ​ສົນ​ທະ​ນາ ກ່ຽວ​ກັບ ສິ່ງ​ທີ່ ເກົາຫຼີ​ເໜືອ ໄດ້​ຮັບ​ໃນ​ການ​ແລກ​ປ່ຽນ​ຈາກ​ຂໍ້​ຕົກ​ລົງ​ກັບ ຣັດ​ເຊຍ, ແລະ ມັນ​ອາດ​ກ່ຽວ​ຂ້ອງ​ກັບ​ອາ​ວຸດ​ນິວ​ເຄ​ລຍ, ແຜນ​ການ​ພັດ​ທະ​ນາ​ລູກ​ສອນ​ໄຟ​ໄລ​ຍະ​ໄກ​ຂອງ​ເຂົາ​ເຈົ້າ.”

ໃນ​ອາ​ທິດ​ແລ້ວນີ້, ປະ​ທາ​ນາ​ທິ​ບໍ​ດີ ຣັດ​ເຊຍ ທ່ານ ວ​ລາ​ດິ​ເມຍ ປູ​ຕິນ ໄດ້​ໄປ​ຢ້ຽມ​ຢາມ​ນະ​ຄອນຫຼວງ ພຽງ​ຢາງ ເປັນ​ຄັ້ງ​ທຳ​ອິດ​ໃນ​ຮັບ​ດົນ​ກວ່າ 20 ປີ. ບັນ​ດາ​ເຈົ້າ​ໜ້າ​ທີ່ ສະ​ຫະ​ລັດ ໄດ້​ກ່າວ​ວ່າ​ໃນ​ຂະ​ນະ​ທີ່​ມັນ​ມີ​ຂໍ້​ຈຳ​ກັດ​ໃນ​ການ​ຮ່ວມ​ມື​ຂອງ​ເຂົາ​ເຈົ້າ, ມັນ​ກໍ​ບໍ່​ສາ​ມາດ​ຖືກ​ເມີນ​ເສີຍ​ຕໍ່​ໄດ້.

ອ່ານຂ່າວນີ້ເປັນພາສາອັງກິດ

ຟໍຣັມສະແດງຄວາມຄິດເຫັນ

XS
SM
MD
LG