ມືປືນຄົນນຶ່ງໄດ້ເປີດສາກລະດົມຍິງໃສ່ຜູ້ຄົນ ຢູ່ຮ້ານອາຫານ
ແຫ່ງນຶ່ງ ໃນສາທາລະນະລັດເຊັກສ໌ ໂດຍໄດ້ສັງຫານແປດ
ຄົນ ກ່ອນຍິງໂຕລາວເອງຕາຍໃນວັນອັງຄານວານນີ້.
ຢ່າງໜ້ອຍມີແມ່ຍິງຄົນນຶ່ງ ຖືກຍິງໃສ່ໜ້າເອິກ ແລະຢູ່ໃນອາ
ການສາຫັດ ທີ່ເຈົ້າໜ້າທີ່ກ່າວວ່າ ເປັນການຍິງກັນທີ່ຮ້າຍແຮງ
ສຸດ ໃນປະຫວັດສາດ ໃນເວລາທີ່ປະ ເທດມີຄວາມສະຫງົບ.
ວິທະຍຸສາທາລະນະລັດເຊັກສ໌ ກ່າວວ່າ ຜູ້ຮ້າຍໄດ້ໂທລະສັບ
ໄປຫາສະຖານີໂທລະພາບທ້ອງຖິ່ນ ກ່ອນການຍິງສັງຫານ
ເກີດຂຶ້ນ ໂດຍຈົ່ມທຸກວ່າ ຕຳຫລວດບໍ່ແກ້ໄຂບັນຫາຂອງ
ລາວ ແລະຂົ່ມຂູ່ວ່າ ລາວຈະແກ້ໄຂດ້ວຍມືຂອງລາວເອງ.
ເຈົ້າຂອງຮ້ານອາຫານ ທ່ານ Pavel Karlik ກ່າວວ່າ ຜູ້ຊາຍ
ຄົນນຶ່ງ ໄດ້ຢ່າງເຂົ້າໄປໃນຮ້າຍ ແລະກໍເລີ້ມເປີດສາກຍິງເຂົ້າ
ໃສ່ຜູ້ຄົນ. ທ່ານ Karlik ແລະບັນດາແຂກອື່ນໆໄດ້ພາກັນ
ແລ່ນອອກທາງປະຕູຫລັງ ແລະໂທຫາຕຳຫລວດ.
ລັດຖະມົນຕີພາຍໃນເຊັກສ໌ ທ່ານ Milan Chovanec ກ່າວວ່າ ທ່ານຕຶ່ນຕົກໃຈຈາກການ
ໂຈມຕີ ແລະໄດ້ສະແດງຄວາມເສົ້າສະລົດໃຈຕໍ່ບັນດາຍາດຕິພີ່ນ້ອງຂອງຜູ້ເຄາະຮ້າຍ.
ການຍິງກັນໄດ້ເກີດຂື້ນທີ່ເມືອງ Uhersky Brod ທີ່ມີປະຊາກອນຢູ່ 17,000 ຄົນໃກ້ກັບ
ຊາຍແດນ ສະໂລວາເກຍ.
