ປ. ໂອບາມາ ພົບປະ ກັບນາຍົກ ປາກິສຖານ ທີ່ ທຳນຽບຂາວ (ວີດີໂອ)

ທ່ານ​ບາຣັກ ​ໂອ​ບາ​ມາ ປະທານາທິບໍດີ​ສະຫະລັດ ​ແລະ​ທ່ານ
Nawaz Sharif ນາຍົກລັດຖະມຸນຕີ​ປາ​ກິ​ສຖານ ພົບ​ປະກັນ
​ທີ່​ທຳນຽບຂາວ ​ໃນ​ວັນ​ພຸດ​ມື້​ນີ້ ນຶ່ງ​ມື້​ຫຼັງ​ຈາກ​ບັນດາອົງການ​
ປົກ​ປ້ອງ​ສິດທິ​ມະນຸດ ຕຳ​ໜິຕິຕຽນ​ສະຫະລັດ ທີ່ປົກ​ປິດ​ເປັນ​
ຄວາມ​ລັບໃນ​ການໃຊ້​ເຮືອບິນ​ທີ່​ບໍ່​ມີ​ຄົນ​ຂັບໂຈມ​ຕີ​ໃນ​ປາ​ກິ​ສ
ຖານ​ນັ້ນ.

ຄາດ​ກັນ​ວ່າ ​ເລື້ອງ​ເຮືອບິນ​ບໍ່​ມີ​ຄົນ​ຂັບ​ນີ້​ ຈະ​ເປັນເລື້ອງບຸລິ
ມະສິດ​ໃນ​ການ​ພົບ​ປະ​ຫາລື​ກັນ​ໃນ​ຕອນ​ບ່າຍວັນ​ພຸດມື້​ນີ້.

​ໃນ​ການ​ກ່າວ​ປາ​ໄສ​ ທີ່​ສະ​ຖາ​ບັນ​ສັນຕິພາບ​ຂອງ​ສະຫະລັດກຸງ​ວໍ​ຊິງ​ຕັນ​ໃນ​ວັນ​ອັງຄານ​ວານ​ນີ້ ທ່ານ
Sharif ກ່າວ​ວ່າທ່ານ​ຢາກ​ເຫັນ​ສາຍ​ພົວພັນ​ລະຫວ່າງ​ສະຫະລັດ​ແລະ​ປາ​ກິ​ສຖານ​ດີ​ຂຶ້ນ
​ແຕ່​ເລື້ອງ​ການ​ໃຊ້ເຮືອບິນ​ບໍ່​ມີ​ຄົນ​ຂັບນີ້ ​ໄດ້​ກາຍ​ເປັນ​ເລື້ອງ​ທີ່​ເຮັດ​ໃຫ້​ບໍ່​ສະບາຍ​ໃຈ​ໃນ​ສາຍ​ພົວພັນ​ລະຫວ່າງ​ສອງ​ຝ່າຍ​ຂອງ​ພວກ​ເຮົາ.

ຖ້ອຍ​ຖະ​ແຫຼ​ງຂອງ​ທ່ານ Sharif ມີ​ຂຶ້ນ​ໃນ​ຂະນະ​ທີ່​ກຸ່ມ​ປົກ​ປ້ອງ​ສິດທິ​ມະນຸດ Amnesty
International ທີ່​ມີ​ຫ້ອງການ​ຕັ້ງ​ຢູ່​ໃນ​ປະ​ເທດ​ອັງກິດ ​ຮຽກຮ້ອງ​ໃຫ້​ສະຫະລັດຍຸດຕິ
ການ​ປົກ​ປິດເປັນຄວາມ​ລັບ​ ໃນ​ການໃຊ້​ເຮືອບິນ​ທີ່​ບໍ່​ມີ​ຄົນ​ຂັບໂຈມ​ຕີ​ໃນ​ປາ​ກິ​ສຖານ​.

​ໃນ​ລາຍ​ງານ​ສະບັບ​ນຶ່ງ​ທີ່​ເປີດ​ເຜີຍ​ໃຫ້​ຮູ້​ໃນ​ວັນ​ອັງຄານ​ວານ​ນີ້ ກຸ່ມ​ປົກ​ປ້ອງ​ສິດທິ​ມະນຸດ
Amnesty International ກ່າວ​ວ່າ ສະຫະລັດ​ປາກົດ​ວ່າໄດ້​ທຳ​ການລະ​ເມີດ​ສິດທິ
ມະນຸດ​ຢ່າງ​ຮ້າຍ​ແຮງ ຊຶ່ງ​ອາດ​ຈະເທົ່າ​ກັນ​ກັບເປັນ​ອາ​ຊະຍກຳ​ສົງຄາມ​ກໍໄດ້.

ທ່ານ Jay Carney ​ໂຄສົກ​ປະຈຳ​ທຳນຽບຂາວ​ກ່າວ​ວ່າ ສະຫະລັດ​ບໍ່​ເຫັນ​ດີ​ນຳ​ການ​ກ່າວ​ອ້າງ​ດັ່ງກ່າວ​ຢ່າງ​ແຂງ​ແຮງທີ່​ວ່າ ການ​ໂຈມ​ຕີ​ຂອງ​ເຮືອບິນ​ທີ່​ບໍ່​ມີ​ຄົນ​ຂັບ​ລະ​ເມີດ​ກົດໝາຍ​ສາກົນ​ນັ້ນ.

ລາຍ​ງາຍ​ຂອງ​ກຸ່ມ​ປົກ​ປ້ອງ​ສິດທິ​ມະນຸດ Amnesty International ​ໄດ້​ເວົ້າ​ເຖິງ ການ​ໂຈມ​ຕີ​ດ້ວຍ
​ລູກ​ສອນ​ໄຟ 45 ຄັ້ງ​ໂດຍ​ເຮືອບິນ​ບໍ່​ມີ​ຄົນ​ຂັບ ​ໃນ​ເຂດຊົນ​ເຜົ່າWaziristan ​ ​ເໜືອຂອງ​ປາ​ກິ​ສຖານ
ນັບ​ແຕ່​ເດືອນ​ມັງກອນ​ປີ 2012 ຫາເດືອນ​ສິງຫາ​ປີ 2013. ລາຍງານ​ເວົ້າຕື່ມ​ວ່າ ​ໃນ​ກໍລະນີ​ນຶ່ງນັ້ນ
​ແມ່ຕູ້​ຄົນ​ນຶ່ງ​ໄວ 68 ປີ ​ໄດ້​ຖືກ​ສັງຫານ ​ໃນ​ຂະນະ​ທີ່​ລາວ​ເກັບຜັກ​ຢູ່​ໃນ​ສວນ​ ​ແລະ​ອີກ​ກໍລະນີ​ນຶ່ງລາຍ​ງານສະບັບ​ນີ້ ​ກ່າວ​ວ່າ ພວກ​ແຮ​ງານ18 ຄົນ​ເສຍ​ຊີວິດ​ຈາກ​ການ​ໂຈມ​ຕີ​ຂອງ​ເຮືອບິນ​ບໍ່​ມີ​ຄົນຂັບ​ ໃນຂະນະ​ທີ່​ພວກເຂົາ​ເຈົ້າ​ເຫຼົ່າ​ນີ້ກຳລັງກຽມ​ຈະ​ພາກັນ​ກິນ​ເຂົ້າ​ແລງ.

ບັນດາ​ຜູ້ນຳ​ປາ​ກິ​ສຖານ ກ່າວ​ວ່າ ພວກ​ເຂົາ​ເຈົ້າ​ຄັດ​ຄ້ານ​ຢ່າງ​ແຂງ​ແຮງ​ຕໍ່​ການ​ໂຈມ​ຕີ​ຂອງເຮືອບິນ​ບໍ່​ມີ​ຄົນ​ຂັບ​ນີ້ ​ແຕ່​ພວກ​ທີ່​ຕຳ​ໜິຕິຕຽນ​ບາງ​ຄົນ​ເຊື່ອ​ວ່າ ການໂຈມ​ຕີ​ດັ່ງກ່າວ​ທີ່​ແນ​ໃສ່​ພວກ​ທີ່​ສົງ​ໄສ​ວ່າເປັນ​ໜ່ວຍ​ປະຕິບັດ​ງານ​ຂອງ​ກຸມກໍ່​ການ​ຮ້າຍອາລກາ​ອິດາ​ແລະ​ກຸ່ມ​ຕາ​ລີບັນ ​ເປັນ​ພາກສ່ວນ​ນຶ່ງ​ຢູ່​ໃນ​ຂໍ້​ຕົກລົງລັບ ທີ່​ປາ​ກິ​ສຖານເຫັນ​ດີ​ໂດຍ​ປະລິຍາຍກ່ຽວ​ກັບການ​ໂຈມ​ຕີ​ຂອງ​ສະຫະລັດ​ນັ້ນ.

​