ຕະຫຼາດຫຼັກຊັບ ຈີນ ຍັງສືບຕໍ່ຫຼຸດລາຄາລົງຢ່າງຕໍ່ເນື່ອງເປັນສາມ ອາທິດຕິດຕໍ່ກັນໃນວັນອັງຄານມື້ນີ້ ໃນຂະນະທີ່ສ່ວນໃຫຍ່ຂອງ ຕະຫຼາດຫຼັກຊັບໃນເອເຊຍອື່ນໆ ແມ່ນກຳລັງຟື້ນໂຕກ່ອນການປະຊຸມທີ່ສຳຄັນ ກ່ຽວກັບ ວິກິດການດ້ານການເງິນຂອງ ກຣິສ.
ດັດຊະນີຕະຫຼາດຫຼັກຊັບ Shanghai ໄດ້ຫຼຸດລົງ 3.2 ເປີເຊັນໃນຕອນທ່ຽງມື້ນີ້, ຊຶ່ງໄດ້ຕ່າວປີ້ນການມີລາຄາສູງຂຶ້ນໜຶ່ງມື້ກ່ອນໜ້ານັ້ນ, ໃນເມື່ອດັດຊະນີຕະຫຼາດຫຼັກຊັບ Shenzhen ກໍໄດ້ຫຼຸດລົງ 5.6 ເປີເຊັນ.
ການຫຼຸດລົງດັ່ງກ່າວໄດ້ພາໃຫ້ມີຄຳຖາມໃໝ່ກ່ຽວກັບຄວາມສາມາດ ຂອງ ປັກກິ່ງ ທີ່ຈະຍັບຢັ້ງການຕົກລາຄາຢ່າງແຮງຂອງຕະຫຼາດຫຼັກຊັບ, ເຊິ່ງໄດ້ກວາດລ້າງປະມານ 3 ພັນຕື້ໂດລາ ໃນມູນຄ່າຂອງຕະຫຼາດຫຼັກຊັບ.
ເມື່ອບໍ່ດົນມານີ້ລັດຖະບານໄດ້ປະກາດ ການເຄື່ອນໄຫວຫຼາຍຄັ້ງເພື່ອເຮັດໃຫ້ບັນດານັກລົງທຶນໝັ້ນໃຈຂຶ້ນຕື່ມ, ລວມທັງການປ່ອຍເງິນຫຼາຍພັນລ້ານໂດລາເຂົ້າໃນຕະຫຼາດຫຼັກຊັບ ແລະ ລະງັບການສະເໜີຂາຍ ຮຸ້ນໃນເບື້ອງຕົ້ນໃຫ້ປະຊາຊົນ.
ສ່ວນຢູ່ບ່ອນອື່ນໃນ ເອເຊຍ, ຕະຫຼາດຫຼັກຊັບສ່ວນຫຼາຍໄດ້ຟື້ນໂຕຄືນໃນວັນອັງຄານມື້ນີ້, ຄືທີ່ ໂຕກຽວ, ຊິດນີ, ຮົງກົງ, ໄດ້ຫວັນ ແລະ Wellington ຕ່າງກໍມີລາຄາດີຂຶ້ນ.
ບັນດານັກລົງທຶນແມ່ນພາກັນຈັບຕາເບິ່ງຢ່າງໃກ້ຊິດ ໃນກອງປະຊຸມສຸກເສີນຂອງບັນດາຜູ້ນຳເຂດໃຊ້ສະກຸນເງິນ ຢູໂຣ ວັນອັງຄານມື້ນີ້, ເຊິ່ງ ປະເທດກຣິສ ທີ່ມີບັນຫາດ້ານການເງິນ ຄາດວ່າຈະຍື່ນຂໍ້ສະເໜີໃໝ່ ໂດຍແນເປົ້າໃສ່ການຮັບຮອງເອົາ ຂໍ້ຕົກລົງການຊ່ວຍກອບກູ້ເສດຖະກິດສາກົນ.
ຄວາມບໍ່ສາມາດທີ່ຈະບັນລຸຂໍ້ຕົກລົງໃນໄວໆນີ້ ອາດໝາຍເຖິງວ່າການຜິດນັດໃນການຊຳລະໜີ້ເພີ່ມເຕີມຂອງ ກຣິສ, ຊຶ່ງຈະເຮັດໃຫ້ພວກເຂົາຕ້ອງໄດ້ອອກຈາກການເປັນສະມາຊິກ ສະຫະພາບ ຢູໂຣບ ແລະ ຢຸດເຊົາໃຊ້ສະກຸນເງິນ ຢູໂຣ.
