ໄດ້ເກີດເຫດວາງລະເບີດສະຫຼະຊີບໃນພາກຕາເວັນອອກ
ສຽງເໜືອຂອງປະເທດ Nigeria ເມື່ອວັນເສົາວານນີ້ ສົ່ງຜົນ
ໃຫ້ມີ 7 ຄົນເສຍຊີວິດ ແລະ ອີກ 33 ຄົນ ບາດເຈັບ. ເຈົ້າໜ້າ
ທີ່ເວົ້າວ່າ ມືລະເບີດຜູ້ຍິງຄົນໜຶ່ງໄດ້ລະເບີດຕົນເອງຢູ່ສະຖານີ
ລົດເມທີ່ແອອັດແຫ່ງໜຶ່ງ ໃນເມືອງ Damaturu ເມືອງຫຼວງຂອງ
ລັດ Yobe. Mallam Audu ຜູ້ເຫັນເຫດການຄົນໜຶ່ງ ເວົ້າວ່າ
ບໍ່ມີໃຜຄິດວ່າລາວຈະເປັນໄພຄຸກຄາມ ແລະ ຫຼາຍຄົນກໍ່ຄິດວ່າ
ລາວພຽງແຕ່ພະຍາຍາມຊອກຫາຮ້ານຄ້າ.
ເຈົ້າເມືອງ Yobe ທ່ານ Ibrahim Geidam ໄດ້ໄປຢ້ຽມຢາມໂຮງໝໍ ບ່ອນທີ່ຜູ້ຖືກເຄາະຮ້າຍສ່ວນຫຼາຍ ຖືກພາໄປຮັບການປິ່ນປົວ. ທ່ານກ່າວເຖິງການໂຈມຕີຄັ້ງນີ້ວ່າ ເປັນ “ຄວາມໂຊກຮ້າຍ ແລະ ໄຮ້ມະນຸດສະທຳ." ແລະ ສັນຍາວ່າ ລັດຖະບານຈະຮັບຜິດຊອບ
ຄ່າປິ່ນປົວໃຫ້ ພວກເຄາະຮ້າຍ.
ເມືອງ Yobe ເຄີຍຖືກໂຈມຕີມາກ່ອນແລ້ວ. ໄດ້ມີການວາງລະເບີດ ສອງຄັ້ງຊ້ອນ ໃນເດືອນມັງກອນ ຢູ່ໃນຕະຫຼາດແຫ່ງໜຶ່ງ ໂດຍເຫດລະເບີດຄັ້ງທີສອງນັ້ນ ໄດ້ເກີດຂື້ນໃນຂະນະທີ່ໜ່ວຍກູ້ໄພກຳລັງຟ້າວເຂົ້າໄປຊ່ວຍເຫຼືອຜູ້ເຄາະຮ້າຍ ຈາກເຫດລະເບີດຄັ້ງທີໜຶ່ງ.
ເຂດພາກຕາເວັນອອກສຽງເໜືອຂອງ Nigeria ເປັນບ່ອນທີ່ ການປະທະກັນກັບພວກກະບົດ Boko Haram ດຳເນີນໄປຢູ່. ຊື່ຂອງກຸ່ມດັ່ງກ່າວ ໃນຄວາມໝາຍພາສາ Hausa ຂອງທ້ອງຖິ່ນນັ້ນ ແມ່ນແປວ່າ “ການສຶກສາຂອງຕາເວັນຕົກ ແມ່ນການເຮັດບາບ”.
ພວກເຂົາໄດ້ເວົ້າວ່າ ເປົ້າໝາຍຂອງພວກເຂົາເຈົ້າແມ່ນຈະບັງຄັບໃຫ້ມີການຈັດຕັ້ງປະຕິບັດກົດໝາຍ Sharia ຂອງສາສະໜາອິສລາມ ໃຫ້ເຂັ້ມງວດໄປທົ່ວ Nigeria ເຊິ່ງແບ່ງແຍກອອກເປັນສອງເຂດລະຫວ່າງ ຊາວ Muslim ທີ່ເປັນຊົນກຸ່ມໃຫຍ່ ຢູ່ພາກເໜືອ ແລະ ຊາວ Christian ຊົນກຸ່ມນ້ອຍ ຢູ່ພາກໃຕ້.
ເບິ່ງວີດີໂອ ກ່ຽວກັບການທຳລາຍບ້ານເຮືອນປະຊາຊົນ ຂອງພວກ ໂບໂກ ຮາຣາມ: