ລິ້ງ ສຳຫລັບເຂົ້າຫາ

ວັນສຸກ, ໒໔ ພຶດສະພາ ໒໐໒໔

ປະຊາຊົນ ອາເມຣິກັນ ເຊື້ອສາຍລາວ ເຮັດວຽກບໍລິການ ໃນຊ່ວງໂຄວິດ


ຜູ້ເລາະຊື້ສິນຄ້າ ພາກັນຍ່າງເລາະຊື້ເຄື່ອງຢູ່ຮ້ານຂາຍຍ່ອຍ ໃນເມືອງ Niles, Ill, ວັນທີ 18 ທັນວາ 2021.
ຜູ້ເລາະຊື້ສິນຄ້າ ພາກັນຍ່າງເລາະຊື້ເຄື່ອງຢູ່ຮ້ານຂາຍຍ່ອຍ ໃນເມືອງ Niles, Ill, ວັນທີ 18 ທັນວາ 2021.

ປັດຈຸບັນນີ້ ຢູ່ໃນທົ່ວໂລກມີຜູ້ຕິດເຊື້ອໂຄວິດ-19 ທັງໝົດ 279,798,604 ຄົນ ໂດຍເສຍຊີວິດແລ້ວ 5,399,598 ຄົນ ອີງຕາມຂໍ້ມູນຂອງມະຫາວິທະຍາໄລ ຈອນສ໌ ຮັອປກິນສ໌ ໃນວັນທີ 26 ທັນວານີ້, ສະເພາະຢູ່ໃນສະຫະລັດ ມີຜູ້ຕິດ ເຊື້ອທັງໝົດ 52,176,102 ຄົນ ລວມມີຜູ້ເສຍຊີວິດທັງໝົດ 816,554 ຄົນ ໃນນັ້ນ ມີປະຊາຊົນທີ່ໄດ້ຮັບການສັກຢາຄົບຖ້ວນສົມບູນແລ້ວ 204 ລ້ານ 8 ແສນຄົນ ຫຼື 62 ເປີເຊັນ ຂອງຈໍານວນປະຊາກອນພາຍໃນປະເທດ. ຢ່າງໃດກໍຕາມ ເຖິງວ່າຈະມີຂໍ້ມູນຢັ້ງຢືນອອກມາວ່າ ການຕິດເຊື້ອພະຍາດ ແລະເສຍຊີວິດເພີ້ມຂຶ້ນຢູ່ເລື້ອຍໆ, ແຕ່ປະຊາຊົນກໍຍັງໃຊ້ຊີວິດທີ່ເລີ້ມປົກກະຕິຂຶ້ນ ໂດຍເຫັນໄດ້ຈາກການອອກໄປຕະຫຼາດ, ຮ້ານຄ້າ ຮ້ານອາຫານ ໃນຊ່ວງເທດສະການບຸນຄຣິສມາສ ແລະປີໃໝ່ທີ່ກໍາລັງຈະມາເຖິງນີ້. ທ່ານບຸນທະວີ ລະວຽງວົງ, ເປັນພະນັກ ງານປະຈໍາຢູ່ຮ້ານຄ້າແຫ່ງນຶ່ງໄດ້ກ່າວໃຫ້ ວີໂອເອ ຟັງວ່າ ລາວເອງໄດ້ຮັບການສັກຢາວັກຊີນ ຄົບຖ້ວນແລ້ວ, ແຕ່ເນື່ອງຈາກວຽກທີ່ລາວເອງເຮັດຢູ່ນັ້ນ ຕ້ອງໄດ້ພົວພັນກັບລູກຄ້າທີ່ເຂົ້າອອກສະຖານທີ່ ຢູ່ຕະຫຼອດເວລາ ຍິ່ງຕ້ອງໄດ້ເອົາໃຈໃສ່ເປັນພິເສດບໍ່ວ່າຈະເປັນສິນຄ້າຫຼືສະຖານ ທີ່ບໍລິການກໍຕາມ ເຊິ່ງລາວໄດ້ກ່າວໃຫ້ຟັງໃນບາງຕອນດັ່ງນີ້:

“ກໍພາກັນໃຊ້ນໍ້າຢາລ້າງມື, ຜ້າເຊັດຂ້າເຊື້ອ, ສໍາລັບລູກຄ້າ ພວກເຮົາກໍມີແຜ່ນແກ້ວຂັ້ນຢູ່ຕໍ່ໜ້າພວກເຮົາ ພ້ອມກັນນັ້ນພວກເຮົາກໍລ້າງ ຫຼືທໍາຄວາມສະອາດມືຕະຫຼອດເວລາ, ທຸກໆຄັ້ງທີ່ມີລູກຄ້າເຂົ້າມາ ພວກເຮົາກໍໄດ້ທໍາຄວາມສະອາດໂຕະເຄົາເຕີ້ຕະຫຼອດ, ທຸກໆຄົນຕ້ອງໃສ່ໜ້າກາກ ແລະເວັ້ນໄລຍະຫ່າງຢ່າງນ້ອຍ 6 ຟີທ, ພວກເຮົາບໍ່ໄດ້ສີດຢາຂ້າເຊື້ອຢູ່ໃນຮ້ານຕະຫຼອດເວລາ ແຕ່ທຸກໆອາທິດພວກເຮົາໄດ້ຈ້າງໃຫ້ບໍລິສດມາສີດຢາຂ້າເຊື້ອຢູ່ຮ້ານຕະຫຼອດ.”

ເຖິງແມ່ນວ່າ ຈະມີຫຼາຍຄົນທີ່ໄດ້ຮັບການສັກຢາແລ້ວ, ແຕ່ທຸກໆຄົນກໍຍັງຕ້ອງປະຕິບັດຕາມແນວທາງຂອງອົງ​ການ CDC ຢ່າງສະໝໍ່າສະເໝີ, ໃສ່ໜ້າກາກທຸກໆຄັ້ງ ເມື່ອເວລາອອກໄປຂ້າງນອກ, ລ້າງມືໃຫ້ສະອາດ ຢູ່ຕະຫຼອດເວລາ, ເວັ້ນໄລຍະຫ່າງທາງສັງຄົມຢູ່ສະເໝີ ແລະອື່ນໆ.

XS
SM
MD
LG