ລິ້ງ ສຳຫລັບເຂົ້າຫາ

logo-print

ທະນາຍຄວາມຂອງທ່ານ Ratko Mladic ຜູ້ຕ້ອງສົງໄສ
ເປັນຜູ້ກໍ່ອາດຊະຍາກຳສົງຄາມຊາວເຊີເບຍກ່າວວ່າ ລາວ
ຈະຂໍອຸທອນ ຕໍ່ການຕັດສິນຂອງສານ ທີ່ຈະສົ່ງລູກຄວາມ
ຂອງລາວໄປດຳເນີນຄະດີໂດຍສານຂອງອົງການກສະຫະ
ປະຊາຊາດທີ່ນະຄອນ Hague ປະເທດເນເທີແລນ.

ທະນາຍຄວາມຂອງທ່ານ Mladic ກ່າວໃນມື້ວັນສຸກວານ
ນີ້ວ່າ ລາວຈະຂໍອຸທອນຕໍ່ການຕັດສິນຂອງສານ ໃນະຄອນ
ຫຼວງ Belgrade ໃນມື້ວັນຈັນຈະມາ. ລູກຊາຍຂອງທ່ານ
Mladic ກ່າວວ່ານາຍພົນໃນປາງສົງຄາມທ່ານນີ້ປ່ວຍແຮງ
ຫຼາຍເກີນກວ່າທີ່ຈະຖືກດຳເນີນຄະດີໄດ້.

ທ່ານ Mladic ໄດ້ຖືກຈັບໃນມື້ວັນພະຫັດຜ່ານມາຢູ່ໃນພາກເໜືອເຊີເບຍຫຼັງຈາກໄດ້ທຳການ
ຫຼົບລີ້ມາ ເປັນເວລາ 16 ປີ. ໃນປີ 1995 ສານສະຫະປະຊາຊາດ ທີ່ຮັບຜິດຊອບກ່ຽວກັບ
ການກໍ່ອາດຊະຍາກຳສົງຄາມໃນອະດີດປະເທດຢູໂກສະລາເວຍ ໄດ້ຟ້ອງທ່ານກ່ຽວກັບໂທດ
ກຳຕ່າງໆຕາມທີ່ມີການກ່າວຫາທີ່ວ່າທ່ານໄດ້ກໍ່ຂຶ້ນຫຼືເປັນຜູ້ອອກຄຳສັ່ງໃຫ້ກໍ່ຂຶ້ນ ໃນລະຫວ່າງ
ການປິດລ້ອມເປັນເວລາ 3 ປີຕໍ່ນະຄອນ Sarajevo ຂອງບອສເນຍແລະການສັງຫານພວກ
ຜູ້ຊາຍແລະເດັກນ້ອຍຜູ້ຊາຍມຸສລິມບອສເນຍ 8,000 ຄົນໃກ້ໆເມືອງ Srebrenica.

ເຈົ້າໜ້າທີ່ເຊີເບຍກ່າວວ່າ ຕົນຈະຊອກຄົ້ນຫາແລະລົງໂທດຜູ້ໃດກໍຕາມ ທີ່ໃຫ້ການຊ່ອຍເຫຼືອ
ແກ່ທ່ານ Mladic ເພື່ອບໍ່ໃຫ້ທ່ານຖືກຈັບໃນໄລຍະຫຼາຍໆປີຜ່ານມາ.

ສະພາຄວາມໝັ້ນຄົງຂອງອົງການສະຫະປະຊາຊາດໄດ້ສະແດງຄວາມຊົມເຊີຍຕໍ່ການຈັບທ່ານ
Mladic. ໃນຖະແຫຼງຂ່າວສະບັບນຶ່ງທີ່ອອກໃນມື້ວັນສຸກວານນີ້ ສະພາຄວາມໝັ້ນຄົງຍັງເວົ້າ
ວ່າ ມັນເປັນກ່າວຢໍ້າເຖິງຄວາມໝາຍໝັ້ນເພື່ອຄໍ້າປະກັນວ່າຈະບໍ່ມີການຍົກເວັ້ນໂທດ ໃຫ້ແກ່
ພວກທີ່ຮັບຜິດຊອບ ໃນການຂ້າລ້າງເຊື້ອຊາດເຜົ່າພັນ ອາດຊະຍາກຳສົງຄາມ ຫຼືອາດຊະຍາ
ກຳຕ້ານມະນຸດຊາດ.

XS
SM
MD
LG