ເກົາຫຼີເໜືອ ໄດ້ຍິງລູກສອນໄຟຂີປະນາວຸດເຂົ້າໃສ່ທະເລເປັນຄັ້ງທຳອິດໃນຮອບສອງເດືອນ ເມື່ອວັນຈັນມື້ນີ້, ໃນເວລາທີ່ລັດຖະມົນຕີການຕ່າງປະເທດ ສະຫະລັດ ທ່ານ ແອນໂທນີ ບລິງເຄັນ ເດີນທາງໄປນະຄອນຫຼວງ ໂຊລ໌ ເພື່ອເຂົ້າຮ່ວມ ກອງປະຊຸມທີ່ຖືກຈັດໂດຍປະທານາທິບໍດີ ຢູນ ຊຸກ ຢອລ ກ່ຽວກັບ ການສົ່ງເສີມປະຊາທິປະໄຕ.
ກອງທັບ ເກົາຫຼີໃຕ້ ໄດ້ກ່າວວ່າລູກສອນໄຟນັ້ນ ຖືກຍິງໄປກ້ຳຕາເວັນອອກຂອງແຫຼມເກົາຫຼີ. ຕຳຫຼວດຍາມຊາຍຝັ່ງຂອງ ຍີ່ປຸ່ນ ໄດ້ລາຍງານການຍິງສິ່ງທີ່ເຂົາເຈົ້າກ່າວວ່າ ປາກົດວ່າເປັນລູກສອນໄຟຂີປະນາວຸດໂດຍ ເກົາຫຼີເໜືອ ແລະ ໄດ້ລະບຸວ່າ ມັນໄດ້ຕົກລົງແລ້ວ.
ຕໍ່ມາ ຍີ່ປຸ່ນ ໄດ້ກ່າວວ່າເຂົາເຈົ້າໄດ້ກວດພົບສິ່ງທີ່ປາກົດວ່າເປັນລູກສອນໄຟຂີປະນາວຸດລູກທີສອງທີ່ຍິງໂດຍ ເກົາຫຼີເໜືອ, ແລະ ໄດ້ຕົກຢູ່ນອກເຂດເສດຖະກິດພິເສດຂອງເຂົາເຈົ້າເຊັ່ນກັນ.
ກອງທັບຂອງ ເກົາຫຼີເໜືອ ໄດ້ດຳເນີນການຊ້ອມໃຊ້ອາວຸດທຳມະດາໃນສອງສາມອາທິດທີ່ຜ່ານມາ, ເຊິ່ງມັກຈະຖືກຄວບຄຸມດ້ວຍຕົນເອງໂດຍຜູ້ນຳຂອງປະເທດທີ່ໂດດດ່ຽວນັ້ນ ທ່ານ ກິມ ຈົງ ອຶນ.
ການສະແດງແສນຍານຸພາບໂດຍ ພຽງຢາງ ໄດ້ມີຂຶ້ນໃນຂະນະທີ່ກອງທັບ ເກົາຫຼີໃຕ້ ແລະ ສະຫະລັດ ໄດ້ດຳເນີນການຊ້ອມລົບຂະໜາດໃຫຍ່ປະຈຳປີຮ່ວມກັນ ເປັນເວລາ 10 ວັນ ທີ່ໄດ້ສິ້ນສຸດລົງເມື່ອວັນພະຫັດແລ້ວນີ້.
ໃນວັນອາທິດວານນີ້, ກອງທັບ ເກົາຫຼີໃຕ້ ກໍໄດ້ທຳການເຄື່ອນໄຫວທາງທະເລ, ເຮືອບິນເຮລິຄັອບເຕີໂຈມຕີ ແລະ ຍານພາຫະນະໂຈມຕີສະເທືອນນ້ຳສະເທືອນບົກ ໃນການຊ້ອມລົບທີ່ແນໃສ່ການຂະຫຍາຍຈຳນວນກອງທະຫານ ເພື່ອເສີມກຳລັງໃນບັນດາເກາະທາງພາກຕາເວັນຕົກ ໃກ້ກັບທະເລທີ່ມີຊາຍແດນຕິດກັບເກົາຫຼີເໜືອ, ເຊິ່ງຖືກຖິ້ມລະເບີດໃສ່ໂດຍເກົາຫຼີເໜືອໃນປີ 2010.
ຟໍຣັມສະແດງຄວາມຄິດເຫັນ