ລັດຖະສະພາສະຫະລັດ ກົດດັນໃຫ້ເຈົ້າໜ້າທີ່ຄົນສຳຄັນໆຂອງ
ລັດຖະບານສະຫະລັດ ໃນວັນພຸດວານນີ້ ໃຫ້ລາຍລະອຽດກ່ຽວ
ກັບລະບົບການກວດການາໆຊາດ ທີ່ຈະບັງຄັບໃຊ້ໃນຂໍ້ຕົກລົງ
ນິວເຄລຍທີ່ສຳຄັນປະຫວັດສາດກັບອິຣ່ານ.
ໃນການແລກປ່ຽນທີ່ເພັດຮ້ອນ ສອດຄ່ອງກັບການຕ້ອນຮັບ
ຢ່າງເຢັນຊາຂອງລັດຖະສະພາຕໍ່ ຂໍ້ຕົກລົງນີ້ ປະທານຄະນະ
ກຳມະການກອງທັບຂອງສະພາສູງ ທ່ານ John McCain
ສັງກັດພັກ Republicn ໄດ້ສະແດງອອກເຖິງຄວາມຂຸ້ນເຄືອງ
ທີ່ທາງລັດຖະສະພາບໍ່ສາມາດກວດກາເບິ່ງຂໍ້ຕົກລົງຕ່າງໆ
ລະຫວ່າງ Tehran ແລະອົງການພະລັງງານປະລະມະນູສາກົນໄດ້.
ທ່ານ McCain ໄດ້ກ່າວວ່າ: “ກົດລະບຽບການຕ່າງໆເຫຼົ່ານັ້ນແມ່ນສຳຄັນຫຼາຍ ພວກເຮົາ
ຮູ້ວ່າບໍ່ວ່າຂໍ້ຕົກລົງໃດໆກໍຕາມ ກັບປະເທດ ເຊັ່ນອິຣ່ານນີ້ ຜີມານແມ່ນຢູ່ໃນລາຍລະອຽດຕ່າງໆນັ້ນ.”
ໃນການໃຫ້ການ ຄຽງຂ້າງກັບລັດຖະມົນຕີການຕ່າງປະເທດສະຫະລັດ ທ່ານ John Kerry ລັດຖະມົນຕີປ້ອງກັນປະເທດທ່ານ Ash Carter, ລັດຖະມົນຕີການເງິນທ່ານ Jacob Lew ແລະປະທານເສນາທິການຮ່ວມ ທ່ານ Martin Dempsey, ລັດຖະມົນຕີພະລັງງານທ່ານ Ernest Moniz ໄດ້ກ່າວວ່າ “ສ່ວນຕົວແລ້ວຂ້າພະເຈົ້າຍັງບໍ່ທັນໄດ້ເຫັນເອກະສານ
ພວກນີ້ເທື່ຶອ.”
ທ່ານ McCain ໄດ້ກ່າວຕັດວ່າ: “ເວົ້າຕາມຄວາມຈິງແບບຕົງໆກັບທ່ານ ນີ້ແມ່ນເປັນເລື່ອງຕົກໃຈທີ່ທ່ານຍັງບໍ່ທັນໄດ້ເຫັນເອກະສານ ກ່ຽວກັບການກວດພິສູດທີ່ມີການບັງຄັບນັ້ນ”
ທ່ານ Moniz ໄດ້ກ່າວຕ້ອບໂຕ້ວ່າ: “ສິ່ງທີ່ຂ້າພະເຈົ້າສາມາດເວົ້າໄດ້ກໍແມ່ນວ່າ ຂໍ້ຕົກລົງນີ້ ແມ່ນຕ້ອງໄດ້ໃຫ້ທາງອິຣ່ານປະສານງານກັບອົງການປະລະມານູສາກົນ ແລະນີ້ແມ່ນມາດ ຕະຖານກາປະຕິບັດແບບມາດຕະຖານຂອງອົງການປະລະມານູສາກົນ ຊຶ່ງການເປັນອິດສະ
ຫຼະຂອງອົງການດັ່ງກ່າວ ແມ່ນສຳຄັນສຳຫຼັບພວກເຮົາທັງໝົດ.”
ທ່ານ McCain ຍັງໄດ້ກ່າວຕື່ມອີກວ່າ: “ສິ່ງທີ່ສຳຄັນຕໍ່ພວກເຮົາທັງໝົດນັ້ນ ທ່ານລັດຖະມົນຕີ
ການຕ່າງປະເທດ ແມ່ນວ່າ ພວກເຮົາຕ້ອງໄດ້ກວດພິສູດເບິ່ງ ແລະກຳກັບກິດຈະກຳຕ່າງໆຂອງອິຣ່ານ ເພາະວ່າ ພວກເຂົາເຈົ້າແມ່ນຈະແຈ້ງ ມີປະຫວັດທີ່ຂີ້ລັກ...ພວກເຮົາຄວນທີ່ຈະໄດ້ເຫັນເຄື່ອງມືຕ່າງໆ ໃນການກວດພິສູດ.”
