ເຈົ້າໜ້າທີ່ລະດັບສູງສຸດ ອັນດັບສອງ ຢູ່ທີ່ ສະຖານທູດເກົາຫຼີເໜືອ ໃນນະຄອນຫຼວງ London ໄດ້ໂຕນໜີໄປຫາ ເກົາຫຼີໃຕ້ ອີງຕາມກະຊວງທ້ອນໂຮມຊາດຂອງເກົາຫຼີໃຕ້.
ທ່ານ Jeong Joon-hee ໂຄສົກກະຊວງທ້ອນໂຮມຊາດ ໄດ້ກ່າວວ່າ ທ່ານ Thae Yong Ho ພ້ອມດ້ວຍຄອບຄົວ ໄດ້ເດີນທາງໄປຮອດນະຄອນຫຼວງ Seoul ຂອງ ເກົາຫຼີໃຕ້ແລ້ວ. ທ່ານໄດ້ກ່າວຕໍ່ບັນດານັກຂ່າວຢູ່ທີ່ກອງປະຊຸມຖະແຫລງຂ່າວວ່າ “ພວກເຂົາເຈົ້າ ໃນປັດຈຸບັນນີ້ ແມ່ນຢູ່ພາຍໃຕ້ການປົກປ້ອງຂອງລັດຖະບານ.”
ທ່ານ Jeong ໄດ້ກ່າວອີກວ່າ ທ່ານ Thae ໄດ້ບອກຕໍ່ບັນດາເຈົ້າໜ້າທີ່ເກົາຫຼີໃຕ້ວ່າ ທ່ານໄດ້ໂຕນໜີ ຍ້ອນຄວາມເບື່ອໜ່າຍ ຕໍ່ຜູ້ນຳ Kim Jong Un ຂອງລັດຖະບານ ເກົາຫຼີເໜືອ ອັນເປັນຄວາມປະສົງທີ່ຢາກຢູ່ພາຍໃຕ້ລັດຖະບານປະຊາທິປະໄຕ ຂອງ ເກົາຫຼີໃຕ້ ແລະ ຍ້ອນຄວາມເປັນຫ່ວງກ່ຽວກັບອະນາຄົດຂອງພວກລູກເຕົ້າຂອງທ່ານ.
ເປັນທີ່ເຊື່ອກັນວ່າ ທ່ານ Thae ໄດ້ປະຈຳການຢູ່ທີ່ສະຖານທູດເກົາຫຼີເໜືອ ໃນນະຄອນ ຫຼວງ London ເປັນເວລາ 10 ປີ ບ່ອນທີ່ທ່ານ ໄດ້ຮັບຜິດຊອບໃນການຄຸ້ມຄອງພາບພົດ ຂອງເກົາຫຼີເໜືອ ຊຶ່ງໄດ້ຖືກຕຳນິຕິຕຽນ ສຳລັບໂຄງການອາວຸດນິວເຄລຍ ແລະ ປະຫວັດ ການເຄົາລົບນັບຖືສິດທິມະນຸດນັ້ນ. ເຊື່ອກັນອີກວ່າ ທ່ານ Thae ແມ່ນເປັນນັກການທູດ ທີ່ອາວຸໂສທີ່ສຸດຂອງເກົາຫຼີເໜືອ ທີ່ໄດ້ໂຕນໜີໄປຫາເກົາຫຼີໃຕ້.
ທີ່ວໍຊິງຕັນ ກະຊວງການຕ່າງປະເທດສະຫະລັດ ໄດ້ປະຕິເສດທີ່ຈະໃຫ້ຄວາມເຫັນ ກ່ຽວກັບ ຂໍ້ມູນສະເພາະເຈາະຈົງ ຂອງ “ກໍລະນີນີ້” ແຕ່ໄດ້ຮຽກຮ້ອງໃຫ້ປົກປ້ອງ ພວກອົບພະຍົບ ແລະ ພວກທີ່ຂໍລີ້ໄພ ຈາກເກົາຫຼີເໜືອ.
ເຈົ້າໜ້າທີ່ລັດຖະບານເກົາຫຼີເໜືອຜູ້ອາວຸໂສທີ່ສຸດ ທີ່ໄດ້ໂຕນໜີ ໄປຫາເກົາຫຼີໃຕ້ ແມ່ນ ທ່ານ Hwang Jang-yop ຊຶ່ງເປັນເຈົ້າໜ້າທີ່ລະດັບສູງ ຂອງພັກແຮງງານທີ່ປົກຄອງ ປະເທດ ທີ່ໄດ້ຂໍລີ້ໄພ ເມື່ອປີ 1997.
ການໂຕນໜີ ຈາກເກົາຫຼີເໜືອ ໄດ້ຮັບຄວາມສົນໃຈຫຼາຍ ເມື່ອບໍ່ດົນມານີ້ ຕົ້ນຕໍກໍຍ້ອນ ການໂຕນໜີເມື່ອເດືອນເມສາ ຂອງກຸ່ມພວກພະນັກງານບໍລິການຢູ່ຮ້ານອາຫານ ແລະ ຜູ້ຈັດການຂອງພວກເຂົາເຈົ້າ ທີ່ໄດ້ເຮັດວຽກຢູ່ທີ່ຮ້ານອາຫານເກົາຫຼີເໜືອ ຢູ່ໃນຈີນ.
ອ່ານຂ່າວນີ້ຕື່ມ ເປັນພາສາອັງກິດ
