ສານພິເສດແຫ່ງໜຶ່ງ ຢູ່ໃນປະເທດເຊເນກາລ ມີກຳນົດຈະເລີ້ມຕົ້ນ
ການດຳເນີນຄະດີ ຕໍ່ອະດີດຜູ້ປົກຄອງປະເທດຊາດ ທ່ານ
Hissene Habre ທີ່ລໍຄອຍມາເປັນເວລາດົນນານແລ້ວ ໃນຂໍ້ຫາ
ອາຊະຍາກຳຕໍ່ຕ້ານມວນມະນຸດ.
ສານດັ່ງກ່າວ ໄດ້ຈັດຕັ້ງຂຶ້ນ ພາຍໃຕ້ຂໍ້ຕົກລົງ ກັບສະຫະພາບ
ອາຟຣິກາ ມີກຳນົດທີ່ຮັບຟັງ ພະຍານ 100 ຄົນ ໃນລະຫວ່າງການ
ດຳເນີນຄະດີ ທີ່ຄາດກັນວ່າ ຈະໃຊ້ເວລາຫຼາຍເດືອນ.
ກຸ່ມປົກປ້ອງສິດທິມະນຸດຕ່າງໆ ແລະ ຄະນະກຳມາທິການ ກ່າວຫາທ່ານ Habre ວ່າເປັນຜູ້ຮັບຜິດຊອບ ສຳຫລັບ ການເຂັ່ນຂ້າ ດ້ານການເມືອງຫຼາຍກວ່າ 40,000 ຄົນ, ການທໍລະມານຢ່າງເປັນລະບົບ ແລະ ການລະເມີດອື່ນໆອີກ ໃນລະຫວ່າງດຳລົງຕຳແໜ່ງເປັນປະທານາທິບໍດີຢູ່ນັ້ນ.
ຜູ້ກ່ຽວໄດ້ນຳພາປະເທດ ລະຫວ່າງປີ 1982 ແລະ 1990 ໃນເວລາ ທີ່ໄດ້ຖືກຂັບໄຫລ່ອອກ
ຈາກຕຳແໜ່ງ ໂດຍ ຜູ້ນຳໃນປັດຈຸບັນ ທ່ານ Idriss Deby ແລະ ໄດ້ຫລົບໜີ ໄປຢູ່ປະເທດ
ເຊເນກາລ.
ທ່ານ Habre ມີອາຍຸໄດ້ 72 ປີ ແລະ ບັນດາທະນາຍຄວາມຂອງທ່ານ ບໍ່ຫົວຊານຳສານ
ດັ່ງກ່າວ ໂດຍກ່າວວ່າ ຂາດການປະຕິບັດຢ່າງເປັນທຳຕາມກົດໝາຍ ແລະ ວ່າ ພວກເຂົາ
ເຈົ້າ ຈະບໍ່ເຂົ້າຮ່ວມໃນການດຳເນີນຄະດີ. ຢ່າງໃດກໍຕາມ ອິງຕາມກົດໝາຍ ພວກເຂົາ
ເຈົ້າອາດຈະຖືກບັງຄັບໃຫ້ເຂົ້າຮ່ວມ.
ກຸ່ມປົກປ້ອງສິດທິມະນຸດ ເອີ້ນການດຳເນີນຄະດີນັ້ນວ່າ ເປັນ “ຂີດໝາຍໃນການຕໍ່ສູ້ ເພື່ອ
ນຳເອົາພວກທີ່ກະທຳຄວາມຜິດ ອັນໂຫດຮ້າຍຕ່າງໆ ມາລົງໂທດສຳຫລັບອາຊະຍາກຳ
ຕ່າງໆ ຂອງພວກເຂົາຢູ່ໃນອາຟຣິກາ ແລະ ໃນທົ່ວໂລກ.” ກຸ່ມດັ່ງກ່າວ ເວົ້າອີກວ່າຄະດີນັ້ນ
ເປັນຂີດໝາຍຄັ້ງທຳອິດ ທີ່ສານໃນປະເທດໜຶ່ງ ກ່າວຟ້ອງຄະດີອາຍາ ຕໍ່ອະດີດຜູ້ປົກຄອງ
ຂອງປະເທດອື່ນ ສຳຫລັບຂໍ້ຫາການລະເມີດສິດທິມະນຸດ.
ນັ້ນແມ່ນເປັນການຜິດແປກໄປຈາກ ເມືອ່ 13 ປີທີ່ຜ່ານມາ ໃນລະຫວ່າງ ການດຳເນີນຄະດີ
ທີ່ຄ້າຍຄືກັນນີ້ ໄດ້ຈັດຕັ້ງຂຶ້ນໂດຍ ສານອາຊະຍາກຳສາກົນ ຫຼື ICC ຢູ່ທີ່ນະຄອນ Hague
ປະເທດເນເທີແລນ.
ແຕ່ ICC ໄດ້ປະເຊີນກັບການຕຳນິຕິຕຽນ ສຳຫລັບ ການຕິດຕາມຂໍ້ຫາ ອາຊະຍາກຳສົງຄາມ ແລະ ອາຊະຍາກຳຕໍ່ຕ້ານມວນມະນຸດ ຂອງອາຟຣິກາ ເທົ່ານັ້ນ ແລະ ໄດ້ຮັບການພິຈາລະນາລົງໂທດພຽງ 2 ຄະດີ ນັບຕັ້ງແຕ່ ໄດ້ເລີ້ມຕົ້ນປະຕິບັດການມາໃນປີ 2002.