ປະທານກໍາມາທິການຢູໂຣບ ທ່ານນາງເອີຊູລາ ວອນ ເດີ ເລເຢັນ ແລະປະທາ ນາທິບໍດີຂອງຝຣັ່ງ ທ່ານເອັມມານູເອລ ມາກຣົງ ໄດ້ນັ່ງເຮືອບິນໄປລົງຈອດຢູ່ປະເທດຈີນໃນວັນພຸດນີ້ ເພື່ອພະຍາຍາມ “ປັບ” ສາຍສໍາພັນກັບພາຄີທາງດ້ານເສດຖະກິດທີ່ສໍາຄັນຄືນໃໝ່ ໃນລະຫວ່າງທີ່ບັນຫາຫຼາຍຢ່າງພົບກັບຄວາມຫຍຸ້ງ ຍາກເຊັ່ນ ຢູເຄຣນ ແລະຄວາມສ່ຽງທາງດ້ານການຄ້າ, ອີງຕາມລາຍງານຂອງອົງການຂ່າວ Reuters.
ທ່ານມາກຣົງ ໄປຢ້ຽມຢາມປະເທດຈີນຄັ້ງຫຼ້າສຸດໃນປີ 2019. ນີ້ ຈະເປັນການເດີນທາງໄປປະເທດຈີນຄັ້ງທໍາອິດຂອງທ່ານນາງວອນ ເດີ ເລເຢັນ ນັບຕັ້ງແຕ່ທ່ານນາງໄດ້ເປັນປະທານກໍາມາທິການຢູໂຣບຕັ້ງແຕ່ປີນັ້ນ.
ນັບແຕ່ນັ້ນມາ, ເນື່ອງຈາກສະພາບຂໍ້ຈໍາກັດໃນການຄວບຄຸມການລະບາດໃຫຍ່ພະຍາດໂຄວິດ-19 ຂອງຈີນ ຈຶ່ງເຮັດໃຫ້ການພົບປະທາງການທູດທັງໝົດຕ້ອງ ເປັນການປະຊຸມທາງອອນລາຍແທນ ໃນຂະນະທີ່ຄວາມສໍາພັນກັບຢູໂຣບ ກໍເລີ້ມຊຸດໂຊມລົງ ທໍາອິດແມ່ນຂໍ້ຕົກລົງການລົງທຶນກ່ຽວກັບຮ້ານຄ້າຍ່ອຍ ໃນປີ 2021, ແລະຈີນ ກໍປະຕິເສດທີ່ຈະປະນາມຣັດເຊຍໃນການຮຸກຮານຢູເຄຣນຂອງປະເທດດັ່ງກ່າວ.
ສໍາລັບທ່ານມາກຣົງ, ແມ່ນກໍາລັງປະເຊີນກັບສິ່ງທີ່ໜ້າອັບອາຍ ກ່ຽວກັບການປະທ້ວງສໍາລັບອາຍຸການອອກບໍານານຢູ່ພາຍໃນປະເທດ, ເຊິ່ງການເດີນທາງຄັ້ງນີ້ ຖືເປັນໂອກາດດີຂອງທ່ານ ທີ່ຈະໄດ້ຮັບໄຊຊະນະບາງອັນ ທາງດ້ານເສດຖະກິດ ໃນຂະນະທີ່ທ່ານເດີນທາງພ້ອມດ້ວຍຄະນະຜູ້ແທນທີ່ເຂັ້ມແຂງທາງທຸລະກິດຮອດ 50 ຄົນ, ເຊິ່ງລວມມີ Airbus ໂດຍຈະມີການເຈລະຈາຕໍ່ລອງກັບການສັ່ງຈອງເຮືອບິນຢ່າງຫຼວງຫຼາຍ, Alstom ແລະນິວເຄລຍຍັກໃຫຍ່ EDE.
