ສະພາຄວາມໝັ້ນຄົງສະຫະປະຊາຊາດ ສະແດງຄວາມຍິນດີ
ນຳການເລີ້ມຢຸດຍິງ ເພື່ອເຫັນແກ່ມະນຸດສະທຳໃນເຢເມນ ແລະ
ໄດ້ຮຽກຮ້ອງໃຫ້ພັກຝ່າຍ ທີ່ເຮັດສົງ ຄາມຢູ່ໃນປະເທດດັ່ງກ່າວ
ອະນຸຍາດໃຫ້ນຳເອົາອາຫານທີ່ຕ້ອງການຢ່າງຮີບດ່ວນ ພ້ອມ
ທັງຢາປົວພະຍາດ ແລະເຊື້ອໄຟ ເຂົ້າໄປຊ່ວຍພົນລະເຮືອນ.
ຢູ່ໃນຖະແຫລງການ ຫລັງຈາກການຢຸດຍິງເລີ້ມມີຜົນບັງຄັບໃຊ້
ໃນວັນອັງຄານວານນີ້ ສະພາຄວາມໝັ້ນຄົງ ຍັງໄດ້ຮຽກຮ້ອງໃຫ້
ເລຂາທິການໃຫຍ່ສະຫະປະຊາຊາດ ທ່ານ Ban Ki-moon ຈັດ
ກອງປະຊຸມເພື່ອໄກ່ເກ່ຍໃຫ້ມີການແກ້ໄຂທາງ ດ້ານການເມືອງ
ຕໍ່ວິກິດການໃນເຢເມນ.
ການສູ້ລົບຢູ່ທີ່ນັ້ນໄດ້ເຮັດໃຫ້ມີຜູ້ເສຍຊີວິດແລ້ວຫລາຍກວ່າ 1,500 ຄົນ ໂດຍທີ່ ພວກ
ກະບົດ Houthi ໄດ້ປະທະກັນ ກັບກຳລັງທະຫານລັດຖະບານ ແລະການ ໂຈມຕີທາງ
ອາກາດຂອງກຳລັງປະສົມພາຍໃຕ້ການນຳພາຂອງຊາອຸດີ ທີ່ໄດ້ເລີ້ມມາຕັ້ງແຕ່ເດືອນ
ມີນາ.
ໂຄສົກກຳລັງປະສົມ ທ່ານ Ahmed al-Assiri ກ່າວວ່າ ຊາອຸດີ ໝາຍໝັ້ນຕໍ່ການຢຸດຍິງ
ແຕ່ຈະສືບຕໍ່ສັງເກດການເບິ່ງພວກກະບົດ ຜ່ານທາງສືບລັບ ແລະການບິນສອດແນມ.
ພວກກະບົດ Houthis ຍັງກ່າວວ່າ ເຂົາເຈົ້າຈະທຳການຕອບໂຕ້ເຊັ່ນດຽວກັນ ຖ້າຫາກ
ການຢຸດຍິງມີການລ່ວງລະເມີດ.
