ສະພາຄວາມໝັ້ນຄົງອົງການສະຫະປະຊາຊາດໄດ້ເພີ່ມຄວາມກົນດັນຂອງນາໆຊາດ
ຕໍ່ເກົາຫຼີເໜືອໃນວັນສຸກວານນີ້ເພື່ອໃຫ້ປະເທດດັ່ງກ່າວຍຸຕິໂຄງການອາວຸດນິວເຄລຍ
ໂດຍໄດ້ຕື່ມລາຍຊື່ຂອງ 14 ສ່ວນບຸກຄົນ ແລະ 4 ບໍລິສັດ ເຂົ້າໃນບັນຊີການລົງໂທດ.
ສະພາຄວາມໝັ້ນຄົງ ໄດ້ລົງຄະແນນສຽງ ຢ່າງເປັນເອກກະສັນ ຫ້າມການເດີນທາງ
ແລະກັກຊັບສິນຂອງສ່ວນບຸກຄົນແລະບໍລິສັດດັ່ງກ່າວ ຫລັງຈາກເກົາຫຼີເໜືອໄດ້ທຳ
ການທົດລອງລູກສອນໄຟຂີປະນາວຸດ ເພີ່ມຕື່ມ ໃນປີນີ້. ການທົດລອງ ທີ່ຮວມທັງ 3
ຄັ້ງໃນເດືອນແລ້ວນີ້ ພຽງເດືອນດຽວເທົ່ານັ້ນ ແມ່ນລະເມີດຕໍ່ມະຕິຕ່າງໆຂອງສະພາ
ຄວາມໝັ້ນຄົງ ທີ່ທວງໃຫ້ພຽງຢາງຢຸດເຊົາການກະທຳດັ່ງກ່າວ.
ສະຫະລັດ ຊຶ່ງເປັນຜູ້ຮ່າງຍັດຕິດ້ວຍການປຶກສາຫາລືກັບຈີນ ໄດ້ເອົາທ່າທີຢ່າງແຂງ
ຂັນໂດຍທີ່ທ່ານນາງ Nikki Haley ເອກອັກຄະລັດຖະທູດສະຫະລັດປະຈຳອົງການ
ສະຫະປະຊາຊາດ ໄດ້ປະກາດວ່າ “ທຸກທາງເລືອກ ເພື່ອຕອບໂຕ້ຕໍ່ການທ້າທາຍໃນ
ອະນາຄົດ ແມ່ນຍັງຢູ່ເທິງໂຕະ.”
ທ່ານນາງ Haley ກ່າວຕື່ມວ່າ “ນອກເໜືອໄປຈາກຜົນທີ່ຕິດຕາມມາທາງດ້ານການ
ທູດແລະດ້ານການເງິນແລ້ວ ສະຫະລັດຍັງກະກຽມ ທີ່ຈະເອົາບາດກ້າວຕໍ່ຕ້ານການ
ຮຸກຮານຂອງເກົາຫຼີເໜືອ ໂດຍຜ່ານວິທີການຕ່າງໆ ຖ້າຫາກຈຳເປັນ.”
ທ່ານນາງກ່າວຕື່ມອີກວ່າ “ສະຫະລັດແມ່ນມີຄວາມໝັ້ນໝາຍຢ່າງເຕັມທີ່ໆຈະປ້ອງ
ກັນໂຕເອງ ແລະພັນທະມິດຂອງພວກເຮົາ ຕໍ່ການຮຸກຮານຂອງເກົາຫລີເໜືອ.”
ທ່ານນາງ Haley ກ່າວວ່າ ການທົດລອງລູກສອນໄຟ ຫຼືອາວຸດນິວເຄລຍໃນອະນາ
ຄົດແມ່ນ “ເປັນທີ່ຮັບເອົາບໍ່ໄດ້ຢ່າງເດັດຂາດ” ແລະທ່ານນາງຮຽກຮ້ອງໃຫ້ພຽງຢາງ
ເລືອກເອົາ “ເສັ້ນທາງທີ່ສ້າງສັນກວ່າເກົ່າ ໄປສູ່ການມີສະຖຽນລະພາບ, ຄວາມໝັ້ນ
ຄົງ ແລະສັນຕິພາບ.”
ຫລາຍໆສ່ວນບຸກຄົນ ທີ່ມີຊື່ເພີ່ມເຂົ້າ ໃນບັນຊີການລົງໂທດ ແມ່ນພວກທີ່ມີອາຍຸສູງ
ແລ້ວ ຮວມທັງຊາຍຄົນນຶ່ງທີ່ມີຊື່ວ່າ Ri Yong Mu ອາຍຸ 92 ປີ ຊຶ່ງຖືກລະບຸວ່າເປັນ
ຮອງປະທານກຳມາທິການຂອງລັດ ຮັບຜິດຊອບກ່ຽວກັບກິດຈະການທະຫານແລະ
ຄວາມໝັ້ນຄົງລວມມີການຊອກຊື້ແລະຈັດຫາຂອງລັດ. ຜູ້ທີ່ຖືກລະບຸຊື່ອີກຢ່າງນ້ອຍ
2 ຄົນ ແມ່ນມີອາຍຸ 80 ປີກວ່າໆ ແລະ 2 ຄົນມີອາຍຸ 79 ປີ.
