ລັດຖະມົນຕີກະຊວງປ້ອງກັນປະເທດສະຫະລັດ ທ່ານ Ash Carter ເດີນທາງໄປເຖິງອັຟ ການິສຖານໃນວັນສຸກມື້ນີ້ ເພື່ອທຳການຢ້ຽມຢາມແລະຂອບໃຈພວກ ທະຫານອາເມຣິກັນ ທີ່ໄດ້ຮັບໃຊ້ປະເທດຊາດ ເນື່ອງໃນໂອກາດວັນພັກສະຫຼອງບຸນຄຣິສມາສແລະປີໃໝ່.
ມີກຳນົດວ່າ ທ່ານ Carter ຈະໄດ້ຮັບຟັງລາຍງານຫຼ້າສຸດ ໃນການດຳເນີນຄວາມພະຍາ ຍາມຂອງອົງການເນໂຕ້ແລະສະຫະລັດເພື່ອສະໜັບສະໜຸນກຳລັງຮັກສາຄວາມສຫງົບອັຟການິສຖານແລະພົບປະກັບພວກເຈົ້າໜ້າທີ່ອະວຸໂສຂອງອັຟການິສຖານຮວມທັງປະ ທານາທິບໍດີ Ashraf Ghani ນຳດ້ວຍ.
ນອກຈາກການພົບປະຫຼາຍໆຄັ້ງກັບພວກທະຫານສະຫະລັດທີ່ປະຕິບັດໜ້າທີ່ຢູ່ໃນອັຟການິສຖານແລ້ວ ການພົບປະກັບນາຍພົນ John Nicholson ຜູ້ບັນຊາການກອງກຳລັງ ໃຫ້ຄວາມສະໜັບສະໜຸນຂອງອົງການເນໂຕ້ແລະສະຫະລັດໃນອັຟການິສຖານແລະເຈົ້າໜ້າທີ່ອະວຸໂສອື່ນໆ ທ່ານ Carter ຍັງຈະໄດ້ຟັງ ການຊັ່ງຊາຕີລາຄາ ກ່ຽວກັບ ສະຖານະການ ດ້ານຄວາມປອດໄພແລະການດຳເນີນຄວາມພະຍາຍາມຂອງນາໆຊາດເພື່ອຊ່ອຍລັດຖະ ບານອັຟການິສຖານ ປັບປຸງການຮັກສາຄວາມປອດໄພຢູ່ໃນປະເທດດັ່ງກ່າວ.
ພ້ອມນີ້ ທ່ານ Carter ຍັງຈະໄດ້ຮັບຟັງ ລາຍງານຫຼ້າສຸດ ກ່ຽວກັບຄວາມສຳເລັດໃນການ ດຳເນີນຄວາມພະຍາຍາມຕໍ່ຕ້ານພວກກໍ່ການຮ້າຍອາລກາອີດາ ແລະກຸ່ມລັດອິສລາມ ຢູ່ໃນປະເທດດັ່ງກ່າວ.
ໃນການພົບປະກັບພວກເຈົ້າໜ້າທີ່ອະວຸໂສ ຂອງອັຟການິສຖານນັ້ນ ເປັນທີ່ຄາດກັນວ່າ ທ່ານ Carter ຈະໄດ້ຫາລືກ່ຽວກັບສະມັດຖະພາບທີ່ມີເພີ້ມຂຶ້ນ ແລະຄວາມສາມາດໃນການປັບໂຕຂອງກຳລັງຮັກສາຄວາມສະຫງົບອັຟການິສຖານໃນໄລຍະສອງສາມເດືອນຜ່ານມານີ້. ນອກນັ້ນທ່ານຍັງຈະໄດ້ຫາລືກ່ຽວກັບຄວາມພະຍາຍາມເພື່ອສືບຕໍ່ເສີມສ້າງຄວາມສາມາດໃຫ້ແກ່ອັຟການິສຖານຮວມທັງໃນດ້ານກອງທັບອາກາດນຳດ້ວຍ.
ທ່ານ Carter ພວມຢູ່ໃນລະຫວ່າງການເດີນທາງອ້ອມໂລກເພື່ອຂອບໃຈພວກທະຫານ ທີ່ປະຈຳການຢູ່ໃນຕ່າງປະເທດ ໃນການຮັບໃຊ້ຊາດຂອງພວກເຂົາເຈົ້າ ໄດ້ພົບປະກັບຄູ່ຮ່ວມງານທີ່ສຳຄັນໆໃນພາກພື້ນແລະສ້າງຄວາມກ້າວໜ້າໃຫ້ແກ່ບູລິມະສິດຂອງສະຫະ ລັດ ຮວມທັງສ້າງຄວາມກ້ຳເກິ່ງຄືນໃໝ່ໄປສູ່ເຂດເອເຊຍປາຊີຟິກ ແລະໄດ້ຮັບໄຊຊະນະຢ່າງເປັນການຖາວອນຕໍ່ກຸ່ມລັດອິສລາມ.
ການເດີນທາງໃນຄັ້ງນີ້ ແມ່ນຮວມທັງການຢຸດແວ່ຢ້ຽມຢາມປະເທດຍີ່ປຸ່ນ ທີ່ເປັນພັນທະມິດຂອງສະຫະລັດແລະອິນເດຍ ຊຶ່ງເປັນປະເທດພາຄີທີ່ສຳຄັນ. ນອກນັ້ນທ່ານ Carter ຍັງມີແຜນການທີ່ຈະຢ້ຽມຢາມບາຫ໌ເຣນ, ອິສຣາແອລ, ອີຕາລີ ແລະອັງກິດ.
