ພະແນກອາລັກຂາຮັກສາຄວາມປອດໄພ ໃຫ້ປະທານາທິບໍດີ
ໄດ້ເພີ່ມການລາດຕະເວນ ຢູ່ຂ້າງນອກທຳນຽບຂາວຫຼາຍຂຶ້ນ
ຫຼັງຈາກທີ່ຊາຍຄົນນຶ່ງໄດ້ເຕັ້ນຂ້າມຮົ້ວ ແລ້ວແລ່ນເຂົ້າໄປໃນ
ຕຶກທຳນຽບຂາວ ເມື່ອວັນສຸກ ທີ 19 ເດືອນກັນຍາຜ່ານມາ
ກ່ອນຖືກເຈົ້າໜ້າທີ່ຈັບໂຕໄດ້. ຜູ້ຊາຍອີກຄົນນຶ່ງໄດ້ຖືກຈັບກຸມ
ຂະນະທີ່ພະຍາຍາມຈະຂັບລົດເຂົ້າໄປ ໃນເດີ່ນທຳນຽບຂາວ
ໃນວັນເສົາຕໍ່ມາ. ທຳນຽບຂາວກ່າວວ່າ ທາງພະແນກດັ່ງກ່າວ
ກຳລັງທົບທວນເບິ່ງການປະຕິບັດງານຂອງຕົນ ຫຼັງຈາກເຫດ
ການເກີດຂຶ້ນໃນວັນສຸກນັ້ນແລ້ວ. ປະທານາທິບໍດີ ບາຣັກ
ໂອບາມາ ໄດ້ສະແດງຄວາມໝັ້ນໃຈໃນພະແນກຮັກສາຄວາມ
ປອດໄພນັ້ນ. ຜູ້ສື່ຂ່າວວີໂອເອ Zlatica Hoke ມີລາຍງານ
ກ່ຽວກັບເລື້ອງນີ້ ຊຶ່ງສິງຈະນຳມາສະເໜີທ່ານ.
ໃນມື້ວັນຈັນຕໍ່ມາ ຫລັງຈາກເກີດເຫດການເລັດລອດເຂົ້າໄປໃນທຳນຽບຂາວນັ້ນແລ້ວ ພວກນັກທ່ອງທ່ຽວຢູ່ຂ້າງນອກທຳນຽບຂາວ ຊຶ່ງເປັນບ່ອນທີ່ດຶງດູດນັກທ່ອງທ່ຽວຫຼາຍທີ່
ສຸດແຫ່ງນຶ່ງ ໃນນະຄອນຫຼວງວໍຊິງຕັນນັ້ນ ແມ່ນຍ່າງປະປົນກັນກັບພວກເຈົ້າໜ້າທີ່ຍາມທຳນຽບຂາວ. ພວກເຈົ້າໜ້າທີ່ຮັກສາຄວາມປອດໄພ ບາງຄັ້ງກໍຍ່າງລາດຕະເວນກັບໝາ ພາກັນກວດກາເບິ່ງຮົ້ວ. ບາງພວກກໍສຳຫລວດເບິ່ງບໍລິເວນເດີ່ນຈາກຫຼັງຄາຕຶກທຳນຽບ
ຂາວ.
ຢູ່ຂ້າງໃນ ປະທານາທິບໍດີໂອບາມາ ກຳລັງລົງນາມ ໃນຄຳປະກາດວ່າດ້ວຍການສຶກສາ
ແລະການພັດທະນາວິຊາຊີບ ສຳລັບພວກຍຸວະຊົນອາເມຣິກັນ. ທ່ານໂອບາມາກ່າວຕໍ່ບັນດານັກຂ່າວວ່າ ພະແນກຮັກສາຄວາມປອດໄພ ເຮັດວຽກ “ໄດ້ດີເລີດ”.
ທ່ານໂອບາມາ ກ່າວວ່າ “ແລະຂ້າພະເຈົ້າຮູ້ສຶກເປັນບຸນຄຸນຢ່າງຫຼວງຫຼາຍ ສຳລັບ
ການເສຍສະລະຕ່າງໆຂອງພວກຮັກສາຄວາມປອດໄພ ໃນນາມຂອງຂ້າພະເຈົ້າ
ແລະໃນນາມຂອງຄອບຄົວຂອງຂ້າພະເຈົ້າ.”
ການສະແດງຄວາມໝັ້ນໃຈດັ່ງກ່າວມີຂຶ້ນ ໃນເວລາພຽງບໍ່ເທົ່າໃດມື້ ຫຼັງຈາກຊາຍຄົນນຶ່ງ
ມາຈາກລັດເທັກຊັສ ທີ່ມີມີດເປັນອາວຸດ ສາມາດເລັດລອດຂ້າມຮົ້ວເຂົ້າໄປໃນເດີ່ນທຳ
ນຽບຂາວ ແລ້ວແລ່ນຂ້າມເດີ່ນ ເຂົ້າໄປໃນເຮືອນພັກຂອງປະທານາທິບໍດີ ກ່ອນຖືກຢຸດໄວ້.
ນາຍ Omar Gonzalez ໄວ 42 ປີເປັນນັກລົບເກົ່າສະຫະລັດ ທີ່ໄດ້ຮັບຫຼຽນຕາຄຳຊອບ ຈາກການຮັບໃຊ້ໃນສົງຄາມອີຣັກ. ຫລັງຈາກຖືກຈັບ ລາວກ່າວຕໍ່ເຈົ້າໜ້າທີ່ຮັກສາຄວາມປອດໄພວ່າ ລາວຢາກໄປບອກປະທານາທິບໍດີວ່າ ບັນຍາກາດກຳລັງພັງທະລາຍລົງ.
ເພື່ອນບ້ານຂອງລາວທີ່ລັດເທັກຊັສ ກ່າວວ່າ ນາຍ Gonzalez ເຄີຍກ່າວສະແດງຄວາມເຫັນ ທີ່ແປກໆມາກ່ອນ..
ທ້າວ Andrew ກ່າວວ່າ “ຕອນທີ່ຂ້ອຍໄດ້ໂອ້ລົມກັບລາວ ລາວບອກຂ້ອຍວ່າ ລາວ
ຄຶດວ່າ ມີຄົນຕິດຕາມສິ້ງຊອມເບິ່ງລາວ ແລະໂທລະສັບຂອງລາວຖືກດັກຟັງ.”
ເຈົ້າໜ້າທີ່ກ່າວວ່ານາຍ Gonzalez ມີລູກກະສຸນ 800 ລູກ ມີດຂະໜາດໃຫຍ່ 1 ດວງ
ແລະຂວານດ້າມນ້ອຍໆ 2 ດວງຢູ່ໃນລົດຂອງລາວ. ໃນລະຫວ່າງການໃຫ້ການຕໍ່ສານໃນ
ມື້ວັນຈັນນັ້ນ ບັນດາໄອຍະການກ່າວວ່າ ນາຍ Gonzalez ເຄີຍຖືກຈັບກຸມມາແລ້ວໃນ
ເດືອນກໍລະກົດຜ່ານມາ ໃນຂໍ້ຫາມີປືນຍາວໃຊ້ດັກຍິງກະບອກນຶ່ງ ແລະມີແຜນທີ່ ທີ່ໝາຍ
ທຳນຽບຂາວໄວ້. ຜູ້ກ່ຽວຖືກຕຳຫລວດຢຸດ ແຕ່ບໍ່ໄດ້ຖືກຈັບກຸມໃນເດືອນສິງຫາຜ່ານມາ
ຫຼັງຈາກຜູ້ກ່າວຍ່າງກາຍທຳນຽບຂາວໄປ ໂດຍມີຂວານນ້ອຍໆດວງນຶ່ງຕິດໂຕ. ນາຍGonzalez ບໍ່ໄດ້ເປັນຄົນທຳອິດ ທີ່ລ່ວງລ້ຳເຂົ້າໄປໃນເດີ່ນທຳນຽບຂາວ ແຕ່ບໍ່ມີຄົນໃດ
ສາມາດເຂົ້າໄປໄດ້ໄກເທົ່າກັນກັບລາວ ກ່ອນຖືກຈັບ.
ທ່ານ Danny Spriggs ອະດີດເຈົ້າໜ້າທີ່ອາລັກຂາປະທານາທິບໍດີ ຖິ້ມໂທດເຫດທີ່ເກີດຂຶ້ນໃນວັນສຸກນັ້ນໃສ່ຄວາມຜິດພາດຂອງມະນຸດ.
ລາວເວົ້າວ່າ “ຂ້ອຍບໍ່ຄຶດວ່າ ມັນເປັນເລື້ອງທີ່ເກີດຂຶ້ນເລື້ອຍໆ ຢ່າງເປັນລະບົບ
ບໍ່ວ່າໃນຮູບແບບ ຫຼືແຟຊັ້ນ. ຂ້ອຍຄິດວ່າ ມັນເປັນສະຖານະການ ທີ່ເກີດຂຶ້ນຢ່າງ
ໂດດດ່ຽວ ເຖິງແມ່ນມັນໄດ້ເກີດຂຶ້ນຫຼາຍຄັ້ງຫລາຍຫົນ ເກີນກວ່າທີ່ເຮົາຢາກເຫັນ
ແຕ່ເປັນສະຖານະການທີ່ເກີດຂຶ້ນຢ່າງໂດດດ່ຽວ. ຂ້ອຍບໍ່ຄຶດວ່າ ມັນເປັນບັນຫາ
ທາງດ້ານວັດທະນະທຳ.”
ທ່ານ Josh Earnest ໂຄສົກປະຈຳທຳນຽບຂາວ ກ່າວວ່າ ທາງພະແນກຮັກສາຄວາມປອດໄພ ໄດ້ທຳການທົບທວນຄືນເບິ່ງຢ່າງຮອບດ້ານ ກ່ຽວກັບການດຳເນີນງານຮັກສາຄວາມປອດໄພນັ້ນ.
ທ່ານກ່າວວ່າ: “ພະແນກຮັກສາຄວາມປອດໄພໄດ້ປ່ຽນວິທີການດຳເນີນການ ເພື່ອຮັບ
ປະກັນວ່າ ທາງເຂົ້າສູ່ທຳນຽບຂາວນັ້ນປອດໄພ ແລະມີການເພີ້ມການເຝິກແອບຕື່ມ
ອີກແລ້ວ ສຳລັບພວກເຈົ້າໜ້າທີ່ ທີ່ພາກັນຢືນຍາມ ຢູ່ແນວໜ້າຂອງທຳນຽບຂາວນັ້ນ ເພື່ອຮັບປະກັນວ່າ ພວກເຂົາເຈົ້າຮູ້ຈັກດີກ່ຽວກັບນະໂຍບາຍແລະວິທີການດຳເນີນ
ງານຕ່າງໆ ທີ່ພົວພັນກັບການຮັກສາທຳນຽບຂາວໃຫ້ປອດໄພ ແລະການຮັບມືກັບເຫດການຕ່າງໆ ເຊັ່ນ ເຫດການທີ່ພວກເຮົາໄດ້ເຫັນເກີດຂຶ້ນໃນວັນສຸກກ່ອນນັ້ນ.”
ນາຍ Gonzalez ປະເຊີນກັບຂໍ້ກ່າວຫາ ຖານເຂົ້າໄປໃນຕຶກອາຄານທີ່ຫວງຫ້າມ ຢ່າງຜິດກົດໝາຍ ໂດຍຖືອາວຸດ “ທີ່ເປັນອັນຕະລາຍ ແລະເຮັດໃຫ້ຕາຍໄດ້.”
