ການຊອກຄົ້ນຫາ ພວກນຳພາປີນພູ ທີ່ຫາຍສາບສູນ ຍ້ອນຫິມະເຈື່ອນ ຢູ່ເນປານ ດຳເນີນສືບຕໍ່ໄປ (ວີດີໂອ)

ທີ່​ເນ​ປາລ ພວກນຳ​ພາ​ປີນ​ພູ ​ທີ່ໄດ້​ຮັບ​ການ​ຊ່ວຍ​ເຫລືອ​ຈາ​ກ ​
ເຮືອບິນ​ເຮ​ລິ​ຄອບ​ເຕີ ​ໄດ້ສືບ​ຕໍ່​ຊອກ​ຫາ ຜູ້​ຊາຍ​ອີກ ສີ່​ຄົນທີ່
​ຫາຍ​ສາບ​ສູນ ຫລັງ​ຈາກ​ເກີດ​ຫິມະ​ເຈື່ອນ​ທີ່​ຮ້າຍ​ແຮງ ​ເຮັດ​
ໃຫ້ຜູ້ນຳ​ທ່ຽວ ຊາວ​ເນ​ປານ ຢ່າງ​ໜ້ອຍ 12 ຄົນ ເສຍ​ຊີວິດ
​ໃນ​ຕອນ​ເຊົ້າ​ວັນ​ສຸກ​ວານ​ນີ້.

ມີ​ລາຍ​ງານ​ວ່າ ຍັງມີນັກ​ປີນ​ພູ ປະມານ 100 ຄົນ ຕົກ​ຄ້າງ
ຢູ່ເທິງພູ​ເຂົາ​ ​ເອ​ເວີ​ແຣັສ ຢູ່​ເໜືອ​ບ່ອນ​ເກີດ​ຫິມະ​ເຈື່ອນ​ລົງ​
ມານັ້ນ.

ພວກນຳ​ພາ​ປີນ​ພູ ​ເຜົ່າ Sherpa ສາມ​ຄົນ​ໄດ້​ຮັບ​ບາດ​ເຈັບ ​ໃນອັນເປັນ​ທີ່​ເຊື່ອ​ວ່າ ​ເປັນ
ຄວາມ​ຫາ​ຍະ​ນະ​ດ້ານການ​ປິນພູທີ່​ຮ້າຍ​ແຮ​ງ​ທີ່ສຸດ ​ເທົ່າ​ທີ່​ເຄີຍ​ມີ​ມາ ຢູ່ເທິງຈອມ​ພູທີ່ສູງ
ທີ່​ສຸດຂອງ​ໂລກ.

ກະຊວງ​ທ່ອງ​ທ່ຽວ​ເນ​ປານ ກ່າວ​ວ່າ ພວກນຳ​ພາ​ປີນ​ພູ ເຜົ່າ Sherpa ທີ່​ມີ​ຊື່​ສຽງ​ວ່າ ​ເກ່ງ​
ກ້າ​ສາມາດ​ໃນ​ການ​ປີນ​ພູ​ນັ້ນ ກຳລັງ​ພາກັນ​ປີນ​ຂຶ້ນ​ໄປ​ເນ່ງເຊືອກໄວ້ ສຳ​ຫລັບໃຫ້​ນັກ​ປີນ
​ພູ​ຄົນອື່ນໆຈ່ອງຕອນປີນຂຶ້ນ​ໄປ​ນັ້ນ ​ເວລາ​ເກີດ​ຫິມະ​ເຈື່ອນ​ລົງ​ມາ ​ຢູ່​ຈຸ​ດທີ່ສູງ 5,800 ​ແມັດ ຊຶ່ງ​ເປັນບ່ອນ​ຢຸດ​ພັກ ທີ່ພວກ​ນັກ​ປີນ​ພູ​ເອີ້ນ​ກັນ​ວ່າ “popcorn field” ຫລື ເດີ່ນ​
ເຂົ້າຕອກ​ແຕກ.

ຫິມະ​ເຈື່ອນ​ຄັ້ງ​ນີ້​ແມ່ນ​ເກີດ​ຂື້ນ ລ່ວງ​ໜ້າລະດູ​ທີ່​ມີ​ການ​ປີນ​ພູ​ຫລາຍ​ທີ່​ສຸດ ​ໂດຍ​ມີ​ພວກ
ນັກ​ປີນ​ພູ ​ແລະພວກ​ນຳພາ ຫລາຍ​ຮ້ອຍ​ຄົນ ພາກັນ​ຕັ້ງ​ຄ້າຍຢູ່​ຕີນ​ພູ ​ເພື່ອ​ຕຽມປີນຂື້ນ
ພູ​ເອ​ເວີ​ແຣສ ທີ່​ສູງ 8,850 ​ແມັດນັ້ນ ​ໃນອີກ​ຫລາຍໆອາທິດ​ຈະ​ມາ​ເຖິງ​ນີ້. ສະພາບດິນ​
ຟ້າ​ອາກາດ ແມ່ນ​ເອື້ອ​ອຳ​ນວນ​ທີ່​ສຸດ​ໃ​ນ​ຕົ້ນ​ເດືອນ​ພຶດສະພາ.

ນັກ​ປີນ​ພູຫລາຍ​ກວ່າ 4,000 ​ຄົນ ໄດ້​ພາກັນ​ປີນ​ ພູເຂົາເອ​ເວີ​ແຣັສ ນັບ​ຕັ້ງ​ແຕ່ ທ່ານ
Edmund Hillary ​ແລະທ່ານ Tezing Norgay ​ໄດ້​ປີນ​ຂຶ້ນ​ໄປ​ສຳ​ເລັດ ​ຄັ້ງ​ທຳ​ອິດ​ໃນ
ປີ 1953​. ​ເກືອບ 250 ຄົນ​ໄດ້​ເສ​ຍຊີວິດໄປແລ້ວ ​ໃນຂະນະ​ທີ່ພະ​ຍາ​ຍາມຈະ​ເຮັດ​ເຊັ່ນ​ນັ້ນ.