ບັນດາຜູ້ນໍາຂອງກຸ່ມຈັດຕັ້ງຂົງເຂດ ທີ່ນໍາໂດຍຈີນແລະຣັດເຊຍ ໄດ້ອອກສຽງຄັດຄ້ານຕໍ່ການແຊກແຊງທາງທະຫານ ຢູ່ໃນພາກຕາເວັນອອກກາງ ເວລາພວກເຂົາເຈົ້າສິ້ນສຸດກອງປະຊຸມສຸດຍອດປະຈໍາປີ ທີ່ກຸງປັກກິ່ງເມື່ອວັນພະຫັດມື້ນີ້.
ອົງການຮ່ວມມືເສດຖະກິດ Shanghai ຫຼື SCO ກ່າວໃນຖະແຫຼງການ ສະບັບນຶ່ງໃນຕອນສິ້ນສຸດກອງປະຊຸມສຸດຍອດສອງມື້ວ່າ ຕົນຍັງຄັດຄ້ານ ຕໍ່ການບັງຄັບໃຫ້ມອບໂອນອໍານາດ ຫຼືການໃຊ້ມາດຕະການລົງໂທດ ແຕ່ຝ່າຍດຽວຕາມລຳພັງຢູ່ໃນຂົງເຂດ ທີ່ໝາຍເຖິງຊີເຣຍ ແລະອິຣ່ານ ນັ້ນ.
ທັງຈີນແລະຣັດເຊຍ ໄດ້ໃຊ້ສິດຍັບຍັ້ງຫຼືວີໂຕ້ຍັດຕິຂອງສະພາຄວາມໝັ້ນ ຄົງອົງການສະຫະປະຊາຊາດ ທີ່ປະນາມທ່ານ Bashar al Assad ປະທານາທິບໍດີຊີເຣຍ ກ່ຽວກັບບັນຫາຂັດແຍ້ງໃນປະເທດທີ່ເກີດຂື້ນມາໄດ້ 15 ເດືອນແລ້ວນັ້ນ. ນອກນີ້ທັງຈີນແລະຣັດເຊຍ ຍັງສົງໄສກ່ຽວກັບການລົງໂທດບັ້ນໃໝ່ຂອງປະເທດຕາເວັນຕົກ ຕໍ່ໂຄງການນີວເຄລຍທີ່ເປັນຫົວຂໍ້ຂັດແຍ້ງ ຂອງອິຣ່ານນັ້ນ.
ກຸ່ມຈັດຕັ້ງຂົງເຂດທີ່ມີສະມາຊິກຫົກປະເທດ ຊຶ່ງໂຮມທັງ ສີ່ປະເທດຈາກ ຂົງເຂດເອເຊຍກາງ ອະນຸມັດສະຖານະພາບ ເປັນຜູ້ສັງເກດການໃຫ້ແກ່ ອັຟການີສຖານ ໃນຄວາມພະຍາຍາມຈະເສີມຂະຫຍາຍອິດທິພົນຂອງຕົນ ຢູ່ໃນປະເທດທີ່ເກີດເສິກສົງຄາມດັ່ງກ່າວກ່ອນການຖອນທະຫານຂອງຕ່າງ ປະເທດອອກໄປພາຍໃນປີ 2014.
ນອກນີ້ກຸ່ມ SCO ຍັງໄດ້ເນັ້ນຍໍ້າເຖິງຄວາມໝັ້ນໝາຍຂອງຕົນເພື່ອສ້າງຄວາມສໍາພັນທາງເສດຖະກິດແລະຄວາມໝັ້ນຄົງຂອງຕົນ ໃຫ້ແໜ້ນແຟ້ນ ຫຼາຍຂຶ້ນ ພ້ອມທັງເພື່ອປາບປາມການລັກລອບຄ້າຢາເສບຕິດ ພວກຫົວຮຸນແຮງຈັດ ແລະພວກກໍ່ການຮ້າຍ.
ກຸ່ມ SCO ໄດ້ຈັດຕັ້ງຂຶ້ນໃນປີ 2001 ພາກສ່ວນນຶ່ງກໍແມ່ນເພື່ອຍຸຕິການແຜ່ຜາຍອິດທິພົນຂອງອົງການເນໂຕ້ ຊຶ່ງເປັນກຸ່ມພັນທະມິດທາງທະຫານ ຂອງປະເທດຕາເວັນຕົກ ແຕ່ກຸ່ມດັ່ງກ່າວຊຶ່ງມັກຈະມີການແຕກແຍກກັນຢູ່ເລື້ອຍໆ ກໍໄດ້ເສີມຂະຫຍາຍເປົ້າໝາຍຂອງຕົນໂດຍລວມເອົາການຮ່ວມມືທາງດ້ານເສດຖະກິດໃຫ້ກວ້າງຂວາງອອກໄປອີກ ນັບແຕ່ນັ້ນມາ.