ອົງການອະນາໄມໂລກ ຫລື WHO ກ່າວວ່າ ຈຳນວນຄົນທີ່ໄດ້
ຕິດເຊື້ອອີໂບລາ ອາດຈະເພີ້ມຂຶ້ນກາຍ 20,000 ຄົນ ພາຍໃນ
ເດືອນພະຈິກນີ້ ນອກຈາກວ່າ ຈະດຳເນີນການຫຼາຍໄປກວ່ານີ້
ເພື່ອຄວບຄຸມການລະບາດ ຂອງເຊື້ອໄວຣັສດັ່ງກ່າວ.
ວາລະສານການແພດເຂດ New England ໄດ້ພິມເຜີຍແຜ່
ລາຍງານ ສະບັບນຶ່ງ ໃນວັນອັງຄານ ໂດຍທີມງານຮັບມືກັບ
ອີໂບລາຂອງອົງການ WHO ທີ່ໄດ້ເຕືອນວ່າ ຄວາມພະຍາຍາມ
ເພື່ອຈະແຍກຕົວບັນດາຜູ້ຕິດເຊື້ອອີໂບລາໃຫ້ຢູ່ໂດດດ່ຽວ ການ
ເພີ້ມການຮັກສາພວກຄົນປ່ວຍ ການ ຝັງສົບພວກຄົນຕາຍຢ່າງ
ປອດໄພ ແລະການເຕືອນຊຸມຊົນ ຕ້ອງໄດ້ປັບ ປຸງໃຫ້ດີຂຶ້ນຢ່າງ
ວ່ອງໄວ ເພື່ອລີກເວັ້ນກໍລະນີການຕິດເຊື້ອທີ່ອາດເພີ້ມ ສູງຂຶ້ນຢ່າງຫຼວງຫຼາຍ.
ລາຍງານດັ່ງກ່າວ ມີຂຶ້ນ 6 ເດືອນຫຼັງຈາກອົງການ WHO ໄດ້
ແຈ້ງໃຫ້ຮູ້ກ່ຽວກັບການລະບາດຂອງອີໂບລາເປັນເທື່ອທຳອິດ ຊຶ່ງ
ໄດ້ເລີ້ມຂຶ້ນ ໃນເດືອນທັນວາປີກາຍນີ້ ຢູ່ໃນກີນີ. ເຊື້ອໄວຣັສ ໄດ້
ຕິດແປດ 5,864 ຄົນ ແລະ ໄດ້ເອົາຊີວິດ 2,811 ຄົນໄປແລ້ວ.
ລາຍງານທີ່ນຳອອກເຜີຍແຜ່ໃນວັນອັງຄານມື້ນີ້ກ່າວວ່າ ເຖິງ
ແມ່ນວ່າ ໄດ້ມີລາຍງານ ກ່ຽວກັບການລະບາດຂອງອີໂບລາ ຢູ່ໃນ
ຫຼາຍໆເຂດຂອງກີນີ ໄລບີເຣຍ ແລະ ຊີແອຣາ ເລອອນກໍ່ຕາມ ແຕ່
ຫຼາຍກວ່າ 90 ເປີເຊັນ ຂອງກໍລະນີຕ່າງໆ ແມ່ນຈຳກັດຢູ່ໃນພຽງ 14
ເມືອງ ຈາກຈຳນວນທັງໝົດ 67 ເມືອງ ຢູ່ໃນປະເທດເຫຼົ່ານັ້ນ.
ອົງການ WHO ກ່າວໃນວັນຈັນວານນີ້ວ່າ ການລະບາດນັ້ນປາກົດວ່າໄດ້ຍຸດຕິລົງຢູ່ໃນປະເທດໄນຈີເຣຍ ແລະ ເຊເນການ ໂດຍບໍ່ມີກໍລະນີໃໝ່ໃດໆ ຢູ່ໄນຈີເຣຍ ຕັ້ງແຕ່ວັນທີ 8 ກັນຍາເປັນຕົ້ນມາ ແລະ ບໍ່ມີກໍລະນີໃດເລີຍ ຕັ້ງແຕ່ໄດ້ມີລາຍງານກ່ຽວກັບອີໂບລາ ເທື່ອທຳອິດແລະ ເປັນພຽງກໍລະນີດຽວເທົ່ານັ້ນ ເມື່ອວັນທີ 29 ສິງຫາປີນີ້.
