ການໂຈມຕີທາງອາກາດ ຢູ່ໃນເຢເມັນ ໂດຍແນວໂຮມທີ່ນຳພາ
ໂດຍ ຊາອຸດີ ອາເຣເບຍ ແມ່ນຍັງສືບຕໍ່ ຕະຫລອດຄືນວັນອາທິດ
ຈົນຮອດວັນຈັນມື້ນີ້ ຫຼັງຈາກບັນດາຜູ້ນຳປະເທດອາຫຣັບ ໄດ້
ປະຕິຍານວ່າ ຈະປະຕິບັດການທາງທະຫານຕໍ່ໄປ ຈົນກວ່າ
ພວກກະບົດ Houthi ທີ່ໜູນຫຼັງໂດຍອີຣ່ານ ຈະຍອມແພ້.
ເຮືອບິນລົບຫຼາຍລຳໄດ້ແນເປົ້າໝາຍໃສ່ ນະຄອນຫລວງ
Sana'a ແລະ ບໍລິເວນອື່ນໆ ໃນມື້ທີ 5 ຂອງການໂຈມຕີທາງ
ອາກາດ ເພື່ອສະໜັບສະໜຸນ ປະທານາທິບໍດີເຢເມັນ ທ່ານ
Abd-Rabbu Mansour Hadi ທີ່ໄດ້ຮ້ອງຂໍຄວາມຊ່ວຍເຫຼືອ
ເມື່ອອາທິດແລ້ວນີ້ ໂດຍກ່າວວ່າ ພວກ Houthi ປະຕິເສດຕໍ່
ຄວາມພະຍາຍາມຕ່າງໆ ເພື່ອສ້າງສັນຕິພາບນັ້ນ.
ພວກ Houthi ໄດ້ຢຶດເອົານະຄອນຫລວງ Sana'a ໃນເດືອນ
ກັນຍາ ແລະ ເມື່ອສອງສາມອາທິດບໍ່ດົນມານີ້ ໄດ້ບຸກຄືບໜ້າ
ໄປສູ່ເມືອງທ່າ Aden ຢູ່ທາງພາກໃຕ້ ບ່ອນທີ່ ທ່ານ Hadi ໄດ້
ຫລົບໜີໄປຢູ່ ເມື່ອເດືອນແລ້ວນີ້ ເພື່ອທີ່ຈະພະຍາຍາມປົກຄອງ
ປະເທດ. ທ່ານໄດ້ຫລົບໜີອອກຈາກເຢເມັນ ໄປຍັງນະຄອນ
ຫລວງ Riyadh ຂອງຊາອຸດີ ອາເຣເບຍ ໃນອາທິດແລ້ວນີ້.
ເລຂາທິການໃຫຍ່ ສັນນິບາດຊາດອາຫຣັບ ທ່ານ Nabil
Elaraby ກ່າວໃນວັນອາທິດວານນີ້ ວ່າ ຈະຕ້ອງກູ້ເອົາ “ລັດ
ຖະບານ ທີ່ຖືກຕ້ອງຕາມກົດໝາຍ” ຂອງທ່ານ Hadi ນັ້ນ ກັບຄືນມາ.