ຫົວໜ້າດ້ານສິດທິມະນຸດ ຂອງອົງການສະຫະປະຊາຊາດ ກ່າວ
ວ່າ ແນວໂຮມທະຫານທີ່ນຳພາໂດຍຊາອຸດີ ອາຣາເບຍ ໃນເຢເມັນ
ປາກົດວ່າເປັນຜູ້ຮັບຜິດຊອບ ໃນການໂຈມຕີ ຕໍ່ພົນລະເຮືອນ ທີ່
ເຫັນວ່າ “ບໍ່ສົມສ່ວນ” ຢູ່ໃນປະເທດທີ່ພວມມີການສູ້ລົບກັນຢູ່ນັ້ນ.
ທ່ານ Zeid Raad al-Hussein ຂ້າຫຼວງໃຫຍ່ດ້ານສິດທິມະນຸດ
ຂອງ ສະຫະປະຊາຊາດ ລາຍງານຕໍ່ສະພາຄວາມໝັ້ນຄົງ ອົງການ
ສະຫະປະ ຊາຊາດ ໃນວັນອັງຄານວານນີ້ ວ່າ ການໂຈມຕີ ທາງ
ອາກາດແລະປືນ ໃຫຍ່ ທີ່ນຳພາໂດຍຊາອຸດີ ອາຣາເບຍ ຊຶ່ງໄດ້ເລີ້ມ
ຂຶ້ນເມື່ອຕົ້ນປີນີ້ ໄດ້ແນເປົ້າໝາຍໃສ່ເຂດຕ່າງໆ ຂອງພົນລະເຮືອນ
ແລະ ໄດ້ນຳໄປສູ່ການທຳ ລາຍໂຮງໝໍ ແລະ ໂຮງຮຽນຈຳນວນນຶ່ງ.
ທ່ານ Zeid ໄດ້ກ່າວຖະແຫລງສອງມື້ຫຼັງຈາກການເຈລະຈາສັນຕິພາບ ທີ່ໄດ້ຮັບຄວາມ
ອຸບປະຖຳໂດຍສະຫະປະຊາຊາດ ຢູ່ໃນປະເທດສະວິດເຊີແລນ ໄດ້ນຳເອົາບັນດາຜູ້ຕາງ
ໜ້າກຸ່ມກະບົດຊີໄອ ທີ່ໜູນຫຼັງໂດຍອີ ຣ່ານ ແລະ ກຸ່ມແນວໂຮມອາຣັບທີ່ນາໆຊາດຮັບຮູ້
ແລະ ສະໜັບສະໜູນ ປະທານາທິບໍດີ Abdu Rabu Mansour Hadi ເຂົ້າມາເຈລະຈາ
ຮ່ວມກັນ. ການເຈລະຈາດັ່ງກ່າວ ຊຶ່ງມີກຳນົດຈະເລີ້ມຄືນອີກໃນເດືອນ ມັງກອນຈະມາ
ເຖິງນີ້ ໄດ້ສິ້ນສຸດລົງໂດຍປາດສະຈາກການຕົກລົງໃດໆ ແລະເຕັມໄປດ້ວຍ ການລະເມີດ
ສັນຍາຢຸດຍິງ ຊ້ຳແລ້ວຊ້ຳອີກ ໂດຍສອງຝ່າຍ.
ທັງສອງຝ່າຍໄດ້ສູ້ລົບກັນ ຕັ້ງແຕ່ເດືອນມີນາ ເປັນຕົ້ນມາ ແລະ ຂໍ້ມູນຂອງສະຫະປະຊາຊາດ
ສະແດງໃຫ້ເຫັນວ່າ ມີປະຊາຊົນ ຫຼາຍກວ່າ 5,700 ຄົນ ສ່ວນໃຫຍ່ເປັນພົນລະເຮືອນ ໄດ້
ຖືກຂ້າຕາຍ ໃນບັນຫາຂັດແຍ່ງກັນນີ້.
ຂ້າຫລວງໃຫຍ່ Zeid ພ້ອມດ້ວຍທູດພິເສດຈາກເຢເມັນ ທ່ານ Ismail Ould Cheikh
Ahmed ໄດ້ເຂົ້າຮ່ວມການເປີດກອງປະຊຸມ ສະພາຄວາມໝັ້ນຄົງ ທີ່ໄດ້ກ່າວເຖິງການ
ເຈລະຈາໃນທ້າຍສັບປະດາຜ່ານມາ ໃນເມືອງ Magglingen ຂອງສະວິດເຊີແລນວ່າ ເປັນການເປີດເຜີຍໃຫ້ຮູ້ເຖິງ “ຄວາມແຕກແຍກກັນຢ່າງເລິກເຊິ່ງລະຫວ່າງສອງຝ່າຍ
ກ່ຽວກັບ ເສັ້ນທາງໄປສູ່ສັນຕິພາບ ແລະຮູບຮ່າງຂອງຂໍ້ຕົກລົງໃນອະນາຄົດ.”
