ຊາອຸດິ ອາເຣເບຍ ໄດ້ສັ່ງຫ້າມການປະທ້ວງທັງໝົດ ລຸນຫລັງມີການໂຮມຊຸມນຸມຂອງພວກປະທ້ວງກຸ່ມນ້ອຍໆ ຫລາຍໆບັ້ນ ທີ່ຮຽກຮ້ອງໃຫ້ມີການປ່ຽນແປງຢູ່ໃນລາດຊະອານາຈັກອະນຸລັກນິຍົມປະເທດນັ້ນ.
ກະຊວງພາຍໃນຂອງຊາອຸດິ ອາເຣເບຍ ໄດ້ປະກາດຜ່ານ
ທາງໂທລະພາບຂອງລັດເມື່ອວັນເສົາວານນີ້ວ່າ ກໍາລັງຮັກ
ສາຄວາມປອດໄພຈະໃຊ້ອັນທີ່ ທາງກະຊວງເອີ້ນວ່າ “ມາດ
ຕະການທຸກຢ່າງ” ເພື່ອປ້ອງກັນຄວາມພະຍາຍາມໃດໆທີ່
ຈະຂັດຂວາງຄວາມເປັນລະບຽບຮຽບຮ້ອຍຂອງສາທາລະນະ.
ການສັ່ງຫ້າມດັ່ງກ່າວນີ້ມີຂຶ້ນ ຫລັງຈາກມີການປະທ້ວງ
ຫລາຍໆບັ້ນໂດຍພວກຊົນກຸ່ມນ້ອຍມຸສລິມນິກາຍ Shi’ite
ທີ່ໄດ້ຮຽກຮ້ອງໃຫ້ປ່ອຍຕົວພວກນັກໂທດ ທີ່ເຂົາເຈົ້າກ່າວ
ວ່າຖືກຄຸມຂັງຢ່າງບໍ່ຍຸຕິທໍານັ້ນ. ລາຍງານສື່ມວນຊົນກ່າວ
ວ່າ ຕໍາຫລວດໄດ້ທໍາການຈັບກຸມພວກປະທ້ວງຫລາຍໆຄົນ ໃນລະຫວ່າງເຫດການດັ່ງກ່າວນີ້.
ພວກຊົນກຸ່ມນ້ອຍມຸສລິມ Shi’ite ສ່ວນໃຫຍ່ແມ່ນອາໃສຢູ່ເຂດຕາເວັນອອກຂອງປະເທດ
ທີ່ອຸດົມສົມບູນໄປດ້ວຍນໍ້າມັນເຊື້ອໄຟນັ້ນ. ຂົງເຂດດັ່ງກ່າວມີຊາຍແດນທີ່ຕິດກັບລາດຊະອາ
ນາຈັກ ບາເຣນ ທີ່ໄດ້ປະສົບກັບການປະທ້ວງຢ່າງຕໍ່ເນື່ອງໂດຍພວກກຸ່ມຊົນສ່ວນໃຫຍ່ຊາວ
Shi’ite ທີ່ລຸກຂຶ້ນຕໍ່ຕ້ານພວກຊາວ Sunni ທີ່ປົກຄອງພວກເຂົາເຈົ້າ. ຊາວ Shi’ite ໃນ
ຊາອຸດິ ກໍຄືກັນກັບພວກອ້າຍນ້ອງຊາວບາເຣນທັງຫລາຍຂອງພວກເຂົາເຈົ້າ ທີ່ຈົ່ມທຸກວ່າ
ລັດຖະບານທີ່ຢູ່ໃຕ້ການຄວບຄຸມຂອງພວກ Sunni ນັ້ນ ໄດ້ຈໍາແນກກີດກັນຕໍ່ພວກເຂົາເຈົ້າ.
ພວກນັກເຄຶ່ອນໄຫວຝ່າຍຄ້ານໃນຊາອຸດິ ອາເຣເບຍ ໄດ້ຮຽກຮ້ອງຢ່າງເປີດເຜີຍ ໂດຍຜ່ານ
ເຄືອຂ່າຍສັງຄົມ Facebook ໃຫ້ປະຊາຊົນພາກັນໄປໂຮມຊຸມນຸມປະທ້ວງຄັ້ງໃຫຍ່ ໃນອັນ
ທີ່ເອິ້ນວ່າ “ວັນແຫ່ງຄວາມໂກດແຄ້ນ” ສອງມື້ ຄືໃນວັນທີ່ 11 ເດືອນມີນາ ແລະວັນທີ່ 20 ເດືອນມີນານີ້ ເຊັ່ນກັນ.
ການໂຮມຊຸມນຸມຫລາຍໆບັ້ນ ທີ່ເອີ້ນກັນວ່າ “ວັນແຫ່ງຄວາມໂກດແຄ້ນ” ນັ້ນ ໄດ້ລຸກລາມ
ໄປທົ່ວຂົງເຂດ ແລະໄດ້ເປັນສາເຫດໂຄ່ນລົ້ມຜູ້ນໍາຕູນີເຊຍ ແລະອີຈິບ ລົງຈາກອໍານາດ.
