ຊາອຸດີ ອາຣາເບຍ ອີກເທື່ອນຶ່ງໄດ້ປ່ຽນການອະທິບາຍຂອງຕົນໃນການສັງຫານ ນັກ
ຂ່າວຊາອຸດີ ທ່ານຈາມາລ ຄາຊອກກີ ຢູ່ທີ່ກົງສຸນ ຂອງຣີຢາດ ໃນນະຄອນອິສຕັນບູລ
ຊຶ່ງບັດນີ້ກ່າວວ່າ ເປັນ “ການວາງແຜນລ່ວງໜ້າ” ອີງຕາມຂໍ້ມູນ ທີ່ໄດ້ຮັບຈາກເທີກີ.
ຖະແຫຼງການໃນວັນພະຫັດວານນີ້ ທີ່ນຳອອກເຜີຍແຜ່ໂດຍອົງການຂ່າວຂອງທາງ
ການຊາອຸດີ ເປັນຄຳຖະແຫຼງຂອງໄອຍະການລັດຖະບານ.
ອັນທີ່ຍັງບໍ່ເປັນທີ່ຈະແຈ້ງເທື່ອນັ້ນກໍຄືວ່າ ແມ່ນໃຜເປັນຜູ້ວາງແຜນຂ້າລ່ວງໜ້າ. ຖະ
ແຫຼງການກ່າວວ່າ “ໄອຍະການຂອງລັດຖະບານຈະສືບຕໍ່ ດຳເນີນການສືບສວນກັບ
ບັນດາຜູ້ຕ້ອງສົງໄສເພື່ອໃຫ້ການດຳເນີນຄະດີດັ່ງກ່າວສິ້ນສຸດລົງ.” ຊາອຸດີໄດ້ປົດ
ເຈົ້າໜ້າທີ່ຫ້າຄົນ ທີ່ພົວພັນກັບການສັງຫານ ແລະຈັບຜູ້ຕ້ອງສົງໄສ 18 ຄົນ.
ສາກົນໄດ້ຕິຕຽນ ຮວມທັງປະທານາທິບໍດີ ດໍໂນລ ທຣຳ ທີ່ໄດ້ກ່າວວ່າ ຜູ້ປົກຄອງທີ່
ແທ້ຈິງຂອງປະເທດ ເຈົ້າຟ້າຊາຍໂມຮາມັດ ບິນ ຊາລມານ ເປັນຜູ້ຮັບຜິດຊອບຂັ້ນ
ສຸດທ້າຍເລື່ອງນີ້.
ພວກເຈົ້າໜ້າທີ່ຊາອຸດີ ໃນຂັ້ນຕົ້ນກ່າວວ່າ ທ່ານຄາຊອກກີໄດ້ຍ່າງອອກໄປຈາກ
ກົງສຸນເມື່ອສາມອາທິດກ່ອນ ແລະເຂົາເຈົ້າບໍ່ຮູ້ວ່າ ທ່ານຢູ່ໃສ. ຫຼັງຈາກນັ້ນ ໄດ້ກ່າວ
ວ່າ ທ່ານໄດ້ເສຍຊີວິດໃນການຕີກັນຢູ່ໃນກົງສຸນ. ຫລ້າສຸດນີ້ຊາອຸດີກ່າວວ່າ ທ່ານ
ຄາຊອກກີ ໄດ້ຖືກສັງຫານໂດຍການຫັດຄໍ ເວລາທ່ານພະຍາຍາມທີ່ຈະໜີອອກ
ຈາກກົງສຸນເພື່ອຮ້ອງຂໍການຊ່ວຍເຫຼືອ.
ເຖິງແມ່ນວ່າຊາອຸດີໄດ້ຍອມຮັບວ່າ ການສັງຫານດັ່ງກ່າວນີ້ ເປັນການວາງແຜນ
ລ່ວງໜ້າກໍຈິງ ລັດຖະມົນຕີຕ່າງປະເທດເທີກີ ທ່ານເມີບລຸຕ ກາວູໂຊກລູ ກ່າວວ່າ
“ຍັງມີຢູ່ຫຼາຍຄຳຖາມທີ່ຕ້ອງການຄຳຕອບ” ຮວມທັງວ່າເປັນຫຍັງຊາອຸດີຈຶ່ງຈັບຜູ້
ຕ້ອງສົງໄສ 18 ຄົນນັ້ນ.
ທ່ານຖາມວ່າ “ໃຜເປັນຜູ້ອອກຄຳສັ່ງເຂົາເຈົ້າ? ທ່ານຮັບຮູ້ວ່າ ເຂົາເຈົ້າໄດ້ເຮັດ ແຕ່
ເປັນຫຍັງເຂົາເຈົ້າບໍ່ເວົ້າວ່າ” ຊາກສົບນັ້ນຢູ່ໃສ. “ຄອບຄົວຂອງທ່ານຍັງຕ້ອງການ
ຢາກຮູ້ ແລະເພື່ອສະແດງຄວາມເຄົາລົບເປັນເທື່ອສຸດທ້າຍ.”
ລັດຖະມົນຕີເທີກີທ່ານໄດ້ກ່າວຢ້ຳອີກເທື່ອງນຶ່ງ ເຖິງການຮຽກຮ້ອງຂອງປະທານາ
ທິບໍດີ ຣີເຊບ ໄຕຢິບ ເອີດວານ ວ່າພວກທີ່ຖືກຈັບໃນຄະດີດັ່ງກ່າວຄວນໄປຂຶ້ນ
ສານຢູ່ໃນນະຄອນອິສຕັນບູລ.
