ສະມາຊິກສະພາສູງ Bernie Sanders ຈາກລັດ Vermont ໄດ້ຊະນະ ການເລືອກຕັ້ງ ປະທານາທິບໍດີຂັ້ນຕົ້ນຢູ່ທີ່ລັດ West Virginia ໃນວັນອັງຄານວານນີ້ ຊຶ່ງເຮັດໃຫ້ທ່ານ ໄດ້ຮັບຄະແນນສຽງຜູ້ຕາງໜ້າ ທີ່ຕ້ອງການຢ່າງຫຼວງຫຼາຍນັ້ນ ເພີ້ມຕື່ມເລັກນ້ອຍ ໃນຂະ ນະທີ່ທ່ານປະກາດວ່າ ຈະຕໍ່ສູ້ກັບອະດີດລັດຖະມົນຕີ ການຕ່າງປະເທດສະຫະລັດທ່ານນາງ Hillary Clinton ຕໍ່ໄປຈົນເຖິງທີ່ສຸດ.
ທ່ານ Sanders ໄດ້ຮັບຄະແນນສຽງທັງໝົດ 51 ເປີເຊັນໃນຂະນະທີ່ທ່ານນາງ Clinton ໄດ້ຮັບ 36 ເປີເຊັນ. ລະບົບແບ່ງປັນຄະແນນຕາມອັດຕາສ່ວນໄດ້ຖືກນຳໃຊ້ໂດຍພັກເດ ໂມແຄຣັດ ເພື່ອແບ່ງຜູ້ຕາງໜ້າໃຫ້ແກ່ພວກຜູ້ສະໝັກທັງສອງ ຊຶ່ງໝາຍຄວາມວ່າ ທ່ານ Sanders ຈະໄດ້ຮັບຜູ້ຕາງໜ້າຢ່າງໜ້ອຍ 16 ຄົນ ແລະທ່ານນາງ Clinton ໄດ້ຮັບ 11 ຄົນ.
ເມື່ອໄລ່ລວມແລ້ວທ່ານນາງ Clinton ແມ່ນມີຜູ້ຕາງໜ້າທັງໝົດ 2,239 ຄົນຕໍ່ 1,469 ຄົນ ຮວມທັງອັນທີ່ເອີ້ນວ່າ ພວກຜູ້ແທນພິເສດຫລື super delegate ທີ່ໃຫ້ຄຳໝັ້ນສັນຍາວ່າ ຈະສະໜັບສະໜູນທ່ານນາງ. ຜູ້ສະໝັກຈຳເປັນຕ້ອງໄດ້ມີຜູ້ຕາງໜ້າທັງໝົດ 2,383 ຄົນ ກ່ອນຈະໄດ້ຮັບການສະເໜີຊື່ແຕ່ງຕັ້ງຂອງພັກເດໂມແຄຣັດນັ້ນ ທີ່ກອງປະຊຸມໃຫຍ່ຂອງ ພັກຢູ່ນະຄອນຟີລາແດລເຟຍໃນເດືອນກໍລະກົດທີ່ຈະມາເຖິງນີ້.
ທ່ານ Sanders ກ່າວຕໍ່ພວກສະໜັບສະໜຸນໃນແລງວັນອັງຄານວານນີ້ທີ່ລັດ Oregon ທາງພາກຕາເວັນຕົກຂອງສະຫະລັດ ທີ່ຈະມີການປ່ອນບັດໃນອາທິດໜ້ານີ້ວ່າ ທ່ານຈະ ທຳການຕໍ່ສູ້ ເພື່ອຍາດເອົາແຕ່ລະສຽງ ຈົນເທົ່ານາທີສຸດທ້າຍ ທັງໆທີ່ໄດ້ປະເຊີນໜ້າກັບ ສະພາບການທີ່ຫຍຸ້ງຍາກ.
ທ່ານ Sanders ກ່າວວ່າ ພວກເຮົາໄດ້ທຳການຕໍ່ສູ້ດ້ວຍຄວາມຫຍຸ້ງຍາກມາຕັ້ງແຕ່ມື້ທຳ ອິດຂອງການໂຄສະນາຫາສຽງ ເວລາຜູ້ຄົນຖືວ່ າພວກເຮົາແມ່ນເປັນຜູ້ສະໝັກວົງນອກ ແຕ່ວ່າຂ່າວຄາວຂອງພວກເຮົາຕໍ່ພວກຜູ້ແທນຂອງພັກເດໂມແຄຣັດ ທີ່ຈະໄປຮ່ວມກອງ ປະຊຸມໃຫຍ່ຂອງພັກທີ່ຟີລາແດລເຟຍນັ້ນ ກໍແມ່ນໃນຂະນະທີ່ ພວກເຮົາອາດຈະມີການ ບໍ່ລົງຮອຍກັນຫລາຍໆຢ່າງກັບລັດຖະມົນຕີການຕ່າງປະ ເທດ Clinton ກໍຈິງ ແຕ່ກໍຍັງມີ ຂົງເຂດນຶ່ງທີ່ພວກເຮົາເຫັນພ້ອມນຳກັນແລະນັ້ນ ກໍຄືພວກເຮົາຕ້ອງໄດ້ເອົາຊະນະທ່ານ Donald Trump.
ທ່ານ Trump ຊຶ່ງເປັນຜູ້ສະໝັກຂອງພັກຣີພັບບລີກັນພຽງຄົນດຽວທີ່ຍັງເຫລືອຢູ່ໃນການ ແຂ່ງຂັນ ໄດ້ຮັບໄຊຊະນະຢ່າງງ່າຍດາຍໃນວັນອັງຄານວານນີ້ ໃນການເລືອກຕັ້ງຂັ້ນຕົ້ນ ທີ່ລັດ West Virginia ແລະ Nebraska.
ຫ້ອງການໂຄສະນາຫາສຽງຂອງທ່ານໄດ້ອອກຖະແຫຼງການສະບັບນຶ່ງ ເອີ້ນການ ໄດ້ຮັບໄຊຊະນະຢູ່ທັງສອງບ່ອນນັ້ນວ່າ ເປັນກຽດຕິຍົດອັນຍິ່ງໃຫຍ່ແລະກ່າວວ່າ ທ່ານ Trump ຫວັງວ່າ ທ່ານຈະໄດ້ຮັບໄຊຊະນະອີກເທື່ອນຶ່ງ ໃນການເລືອກຕັ້ງ ທົ່ວໄປໃນເດືອນພະຈິກ.
