ຜູ້ສະໝັກເປັນປະທານາທິບໍດີສະຫະລັດ ສັງກັດພັກ Democrat ທ່ານນາງ Hillary Clinton ກຳລັງລົງຫາສຽງຮ່ວມກັບຄູ່ແຂ່ງສັງກັດພັກດຽວກັນ ທ່ານ Bernie Sanders ສະມາຊິກສະພາສູງຈາກລັດ Vermont ຊຶ່ງເປັນຄູ່ແຂ່ງທີ່ສຳຄັນສຸດໃນການເລືອກຕັ້ງຂັ້ນຕົ້ນເພື່ອໃຫ້ໄດ້ເປັນຕົວແທນຂອງພັກ ໃນການເລືອກຕັ້ງທົ່ວປະເທດໃນເດືອນພະຈິກຈະມາເຖິງນີ້.
ການໂຄສະນາຫາສຽງຮ່ວມກັນທີ່ລັດ New Hampshire ທາງພາກຕາເວັນອອກສຽງເໜືອຂອງສະຫະລັດ ມີຂຶ້ນນຶ່ງອາທິດຫລັງຈາກ ທ່ານນາງ Clinton ໄດ້ຕ້ອນຮັບການເຂົ້າຮ່ວມ ໃນການໂຄສະນາຫາສຽງຂອງບຸກຄົນອີກຜູ້ນຶ່ງ ນັ້ນກໍຄືປະທານາທິບໍດີ ບາຣັກ ໂອບາມາ ທີ່ໄດ້ປະກົດຕົວຮ່ວມກັບທ່ານນາງ ທີ່ລັດ Carolina ເໜືອ ທາງພາກໃຕ້ຂອງ ປະເທດ. ທ່ານນາງ Clinton ແລະທ່ານ Sanders ໄດ້ອອກຖະແຫຼງການຮ່ວມສະບັບນຶ່ງ ກ່າວວ່າ ການໂຄສະນາຫາສຽງໃນວັນອັງຄານມື້ນີ້ ຈະເພັ່ງເລັ່ງໃສ່ “ການສ້າງສາໃຫ້ອາເມຣິກາ ທີ່ມີຄວາມເຂັ້ມແຂງຮ່ວມກັນ ແລະມີເສດຖະກິດທີ່ຈະເປັນຜົນປະໂຫຍດໃຫ້ກັບທຸກໆຄົນ ບໍ່ແມ່ນພຽງແຕ່ພວກຄົນຮັ່ງມີເທົ່ານັ້ນ.”
ການໃຊ້ພາສາຖ້ອຍຄຳແມ່ນເປັນບູລິມະສິດໃນການໂຄສະນາຫາສຽງຂອງທັງສອງຝ່າຍ ແຕ່ວ່າ ມີຄວາມສຳຄັນເປັນພິເສດສຳລັບທ່ານ Sanders ຜູ້ສະໜັກທີ່ຂະນານນາມຕົນເອງວ່າເປັນ Democrat ທີ່ນິຍົມສັງຄົມນິຍົມ ຜູ້ຊຶ່ງໄດ້ຕຳນິຕິຕຽນຕະຫລອດໄລຍະທີ່ທ່ານລົງຫາສຽງ ໂດຍກ່າວວ່າ ພວກທີ່ຮັ່ງມີແມ່ນມີອິດທິພົນຕໍ່ລະບົບການເມືອງຂອງສະຫະລັດ.
ທ່ານນາງ Clinton ຍັງຈະບໍ່ເປັນຕົວແທນຂອງພັກຢ່າງເປັນທາງການເທື່ອ ຈົນກວ່າທ້າຍເດືອນນີ້ ທີ່ກອງປະຊຸມໃຫຍ່ຂອງພັກ. ທ່ານ Sanders ໄດ້ຢືນຢັນວ່າ ທ່ານຈະບໍ່ຍອມຮັບເອົາການປະລາໄຊ ຈົນກວ່າການແຂ່ງຂັນຂັ້ນສຸດທ້າຍ ແຕ່ວ່າການໂຄສະນາຫາສຽງຂອງທ່ານ ໄດ້ເປັນທີ່ແຈ້ງຂາວແລ້ວວ່າ ທ່ານຈະເຮັດທຸກສິ່ງຢ່າງທີ່ຈຳເປັນ ເພື່ອທີ່ຈະເອົາຊະນະ ຜູ້ທີ່ຈະເປັນຕົວແທນຂອງພັກ Republican ກໍຄືນັກທຸລະກິດ ທ່ານ Donald Trump.
ຊຶ່ງນັ້ນຈະຮວມທັງການໂຄສະນາຫາສຽງຂອງທ່ານ Sanders ໃຫ້ແກ່ທ່ານນາງ Clinton. ຜົນປະໂຫຍດທີ່ໃຫຍ່ຫຼວງສຳລັບທ່ານນາງນັ້ນ ກໍແມ່ນຈະໄດ້ຮັບການສະໜັບສະໜູນ ຈາກພວກທີ່ໜຸນຫຼັງທ່ານ Sanders ໃນລະຫວ່າງການເລືອກຕັ້ງຂັ້ນຕົ້ນນັ້ນ ຊຶ່ງສ່ວນໃຫຍ່ເປັນພວກໜຸ່ມນ້ອຍ ທີ່ມີຄວາມສົນໃຈໃນນະໂຍບາຍຂອງທ່ານນັ້ນ.
ອ່ານຂ່າວນີ້ເພີ້ມຕື່ມເປັນພາສາອັງກິດ
