ທ່ານນາງຊາແມນທາ ວາງ ສະມາຊິກສະພາຕ່ຳ ປະຈຳລັດມິນເນໂຊຕາ ທີ່ສັງກັດພັກເດໂມແຄຣັດ ໄດ້ຖືກຮັບເລືອກໃຫ້ເຂົ້າຮັບຕຳແໜ່ງຕື່ມອີກ ເປັນສະໄໝທີສາມ ໃນການເລືອກຕັ້ງກາງສະໄໝ ເມື່ອວັນທີ 8 ພະຈິກປີ 2022 ວານນີ້ ຊຶ່ງທ່ານນາງໄດ້ກ່າວເຖິງຄວາມຮູ້ສຶກຂອງທ່ານນາງວ່າ:
"ຂ້າພະເຈົ້າອີກເທື່ອນຶ່ງ ຮູ້ສຶກເປັນກຽດທີ່ໄດ້ຖືກຮັບເລືອກຄືນອີກ ແລະຂ້າພະເຈົ້າກໍຮູ້ສຶກດີໃຈ ແລະກໍພ້ອມແລ້ວທີ່ຈະຮັບໃຊ້ເມືອງຂອງຂ້າພະເຈົ້າ ເຂດເລືອກຕັ້ງຂອງຂ້າພະເຈົ້າ ໃນໄລຍະສອງປີຕໍ່ໜ້າ."
ກ່ຽວກັບແຜນການປະຕິບັດງານ ໃນສະໄໝທີສາມ ຂອງທ່ານນາງນັ້ນ ທ່ານນາງວາງ ໄດ້ເວົ້າເຖິງໂຄງການຫຼາຍໆຢ່າງ ທີ່ພໍສະຫລຸບໄດ້ດັ່ງນີ້:
"ຂ້າພະເຈົ້າຢາກສືບຕໍ່ເພັ່ງເລັງໃສ່ບູລິມມະສິດຂອງຂ້າພະເຈົ້າ ຄືໃຫ້ການສະໜັບສະໜຸນແກ່ທຸກໆຄອບຄົວ ຮັບມືກັບບັນຫາທ້າທາຍໃນແຕ່ລະມື້ ເພື່ອໃຫ້ເປັນທີ່ແນ່ໃຈວ່າພວກເຮົາໄດ້ຟື້ນໂຕຄືນຈາກໂຣກລະບາດ ແລະພວກເຮົາຍັງຈະເບິ່ງໄປຂ້າງໜ້າ ໃນການລົງທຶນໃສ່ພວກເດັກນ້ອຍຂອງພວກເຮົາ ໃສ່ໂຮງຮຽນຂອງພວກເຮົາ ເຮັດວຽກໃນການປັບໂຕໃສ່ການປ່ຽນແປງຂອງດິນຟ້າອາກາດ ນັ້ນຄືບູລິມະສິດສຳລັບອະນາຄົດຂອງຂ້າພະເຈົ້າ."
ສະມາຊິກສະພາຕ່ຳວາງ ໄດ້ຖືກເລືອກເຂົ້າຮັບຕຳແໜ່ງເປັນສະໄໝທຳອິດ ເມື່ອປີ 2018 ສະໄໝທີສອງ ໃນປີ 2020 ແລະສະໄໝທີສາມ ຈາກເຂດເລືອກຕັ້ງ 38B ໃນວັນອັງຄານວານນີ້.