ນັກຮ້ອງຊາວອັງກິດ ທ້າວ Sam Smith ເປັນຜູ້ຄອບງຳພິທີມອບ
ລາງວັນ Grammy ຂອງວົງການອຸດສາຫະກຳດົນຕີສະຫະລັດ
ໃນວັນອາທິດວານນີ້ ຢູ່ທີ່ນະຄອນ Los Angeles ລັດ California
ໂດຍຍາດເອົາລາງວັນໄປໄດ້ ຫລາຍກ່ວາໝູ່.
ເພງທຳນອງໂຊລ ທີ່ຊື່ວ່າ Stay With Me ຂອງຜູ້ກ່ຽວ ໄດ້ຮັບ
ລາງວັນ ແຜ່ນສຽງເດັ່ນປະຈຳປີ ຫຼື Record of the Year ແລະ
ເພງ ເດັ່ນປະຈຳປີ ຫຼື Song of the Year. ທ້າວ Smith ຍັງໄດ້
ຮັບລາງວັນ ສິນລະປິນໃໝ່ທີ່ດີເດັ່ນ ແລະລວມເພງຊຸດ In the
Lonely Hour ຂອງລາວ ກໍໄດ້ຮັບລາງວັນ ອາລະບ້ຳປະເພດ
ສຽງທຳນອງພ໊ອບ ທີ່ດີເດັ່ນອີກດ້ວຍ.
ທ້າວ Smith ໄວ 22 ປີ ກ່າວ ໃນເວລາຮັບເອົາລາງວັນ ແຜ່ນສຽງ
ດີເດັ່ນປະຈຳປີ ວ່າ“ຂ້າພະເຈົ້າຢາກຂໍຂອບໃຈຜູ້ຊາຍ ຄົນທີ່
ເພງນີ້ເວົ້າເຖິງ ຜູ້ທີ່ຂ້າພະເຈົ້າຫລົງຮັກໃນປີກາຍນີ້. ຂອບໃຈ
ຫຼາຍໆ ທີ່ຫັກອົກຂ້ອຍ ເພາະວ່າເຈົ້າເຮັດໃຫ້ຂ້ອຍໄດ້ຮັບລາງ
ວັນ Grammy ເຖິງ 4 ລາງວັນ.”
ເຖິງຢ່າງໃດກໍຕາມ Sam Smith ສູນເສຍລາງວັນ ອາລະບ້ຳເດັ່ນທີ່ສຸດ ໃຫ້ແກ່ ຊຸດເພງ Morning Phase ຂອງ Beck ນັກຮ້ອງທຳ ນອງຣ໊ອກ ທີ່ໄດ້ຮັບລາງວັນ ອາລະບ້ຳເພງທຳນອງຮ໊ອກທີ່ເດັ່ນສຸດເຊັ່ນກັນ.
ນັກຮ້ອງສາວ Beyonce ໄດ້ຮັບສາມລາງວັນ ອັນຮວມທັງ ເພງເດັ່ນທຳນອງ rhythm and blues ລາງວັນວີດີໂອດີເດັ່ນປະເພດຍິງ.
ອີກສອງຄົນທີ່ໄດ້ຮັບສາມລາງວັນ ກໍມີ Pharrell Williams ນັກຮ້ອງທຳນອງ rap ກັບ Roseanne Cash ນັກຮ້ອງສາວລູກທົ່ງ.
ຟັງລາຍງານ ຂອງຜູ້ສື່ຂ່າວວີໂອເອ Ray McDonal ກ່ຽວກັບງານມອບລາງວັນ Grammy
