ຄະນະກຳມາທິການເລືອກຕັ້ງຂອງຣວັນດາ ກ່າວວ່າ ປະທານາທິບໍດີ Paul Kagame ໄດ້ຊະນະການເລືອກຕັ້ງ ເພື່ອເຂົ້າຮັບຕຳແໜ່ງເປັນສະໄໝທີ 3 ດ້ວຍຄະແນນສຽງອັນຖ້ວມລົ້ນ.
ຄະນະກຳມາທິການເລືອກຕັ້ງ ກ່າວວ່າ ການນັບຄະແນນເປັນບາງສ່ວນໃນການເລືອກຕັ້ງໃນມື້ວັນສຸກວານນີ້ ສະແດງໃຫ້ເຫັນວ່າ ປະທານາທິບໍດີ Kagame ໄດ້ຮັບຄະແນນສຽງທັງໝົດ 98 ເປີເຊັນ. ໃນເດືອນກໍລະກົດຜ່ານມານີ້ ທ່ານ Kagame ໄດ້ກ່າວຕໍ່ການໂຮມຊຸມນຸມທາງການເມືອງວ່າ “ວັນເວລາໃນການເລືອກຕັ້ງປະທານາທິບໍດີ ຈະເປັນພຽງແຕ່ພິທີຢ່າງເປັນທາງການເທົ່ານັ້ນ.”
ທ່ານ Kagame ກ່າວໃນຄຳປາໄສ ທີ່ອອກອາກາດສົດ ໃນເຊົ້າວັນສຸກວານນີ້ວ່າ “ນີ້ແມ່ນເວລາອີກ 7 ປີ ທີ່ຈະຕ້ອງໄດ້ແກ້ໄຂບັນຫາຕ່າງໆ ທີ່ເປັນຜົນກະທົບຕໍ່ປະຊາຊົນຊາວຣວັນດາ ແລະຄ້ຳປະກັນວ່າ ພວກເຮົາໄດ້ກາຍເປັນຊາວຣວັນດາທີ່ແທ້ຈິງທີ່ເສດ ຖະກິດໄດ້ຮັບການພັດທະນາໃຫ້ດີຂຶ້ນ.”
ຢູ່ທີ່ສຳນັກງານໃຫຍ່ແຫ່ງຊາດ ພັກຜູ້ຮັກຊາດຊາວຣວັນດາ ຂອງທ່ານ Kagame ພວກຜູ້ນຳທາງການເມືອງ ພວກສະໜັບສະໜຸນແລະຜູ້ບໍລິຈາກຫຼາຍໆພັນຄົນ ໄດ້ພາກັນເບິ່ງໂທລະພາບຈໍໃຫຍ່ ທີ່ອອກຂ່າວກ່ຽວກັບການນັບຄະແນນສຽງ ທີ່ສົ່ງເຂົ້າມາຫາສູນກາງຈາກແຕ່ລະເຂດ.
ເບິ່ງວີດິໂອກ່ຽວກັບຂ່າວນີ້ເພີ້ມ
