ປະທານາທິບໍດີຣັດເຊຍ ທ່ານ Vladimir Putin ໄດ້ປົກປ້ອງ
ໃນການຢຶດເອົາແຫລມຄຣາຍເມຍ ຂອງຢູເຄຣນ ໂດຍປະເທດ
ຂອງທ່ານ ແລະ ໄດ້ກ່າວຫາ ບັນດາປະເທດຕາເວັນຕົກ ໃນການ
ໃຊ້ວິກິດການຢູເຄຣນ ເປັນຂໍ້ອ້າງ ເພື່ອທຳການລົງໂທດຕ່າງໆ
ຕໍ່ມົສກູ.
ໃນລະຫວ່າງ ກ່າວຄຳຖະແຫລງກ່ຽວກັບສະພາບການຂອງ
ປະເທດຊາດ ປະຈຳປີ ໃນວັນພະຫັດມື້ນີ້ ທ່ານ ປູຕິນ ໄດ້ເອີຍ
ເຖິງ ແຫຼມຄຣາຍເມຍ ວ່າ ເປັນດິນແດນແຫ່ງຈິດວິນຍານຂອງ
ຣັດເຊຍ. ໃນເລື້ອງຂອງການລົງໂທດຕ່າງໆ ຂອງບັນດາປະເທດ
ຕາເວັນຕົກນັ້ນ ທ່ານເວົ້າວ່າ “ເວລາໃດ ທີ່ຜູ້ຄົນຄິດວ່າ ລັດເຊຍ
ມີຄວາມແຂງແກ່ງ ມີເອກກະລາດ ເຄື່ອງມື ໃນທຳນອງນີ້ ຈະຖືກນຳມາໃຊ້
ໃນທັນທີ.”
ສະພາບການເສດຖະກິດຂອງຣັດເຊຍ ໄດ້ຊຸດໂຊມລົງ ນັບຕັ້ງແຕ່ສະຫະລັດ ແລະ ສະຫະພາບ ຢູໂຣບ ໄດ້ໃຊ້ການລົງໂທດທາງດ້ານເສດຖະກິດຫຼາຍໆບັ້ນ ທີ່ໜັກຂຶ້ນເລື້ອຍໆ ຕໍ່ມົສກູ ກ່ຽວກັບການຢຶດເອົາແຫລມຄຣາຍເມຍ ແລະ ອັນທີ່ພວກເຂົາເຈົ້າເຫັນວ່າ ເປັນການສະໜັບສະໜຸນ ສຳຫລັບພວກກະບົດແບ່ງແຍກດິນແດນ ໃນພາກຕາເວັນອອກຂອງຢູເຄຣນນັ້ນ.
ການລົງໂທດເຫຼົ່ານັ້ນ ພ້ອມກັນກັບ ການລົດລົງຢ່າງຫຼວງຫຼາຍຂອງການສົ່ງອອກນ້ຳມັນ ແລະ ການຕົກຕ່ຳຂອງເງິນຣູບຂອງຣັດເຊຍນັ້ນ ຈຶ່ງເຮັດໃຫ້ມົສກູ ໃນວັນອັງຄານຜ່ານມາ ຄາດຄະເນວ່າເສດຖະກິດຂອງຣັດເຊຍຈະຫົດໂຕເຂົ້າຕື່ມອີກໃນປີ 2015 ນີ້.
ໃນຄຳຖະແຫລງຂອງທ່ານ ປູຕິນ ທ່ານກ່າວວ່າ ກອງທຶນສຳຮອງຂອງປະເທດນັ້ນ ຈະຕ້ອງນຳມາໃຊ້ເພື່ອສະໜັບສະໜຸນ ບັນດາທະນາຄານພາຍໃນປະເທດ. ທ່ານກ່າວວ່າ ໃນວັນທີ 1 ພະຈິກ ກອງທຶນຊຶ່ງຈະ ຊ່ອຍຈ່າຍການຂາດເຂີນຂອງເບ້ຍບຳນານນັ້ນ ແມ່ນຂາດ 81 ພັນ 700 ລ້ານໂດລາ.
