ໃນວັນອັງຄານມື້ນີ້ ບັນດາຜູ້ໄວ້ອາໄລພາກັນໄປຢ້ຽມຄຳນັບ
ສົບຂອງຜູ້ນຳຝ່າຍຄ້ານຣັດເຊຍ ທ່ານ Boris Nemtsov ຜູ້
ຕິຕຽນມົສກູຢ່າງແຮງ ຊຶ່ງໄດ້ຖືກຍິງຕາຍ ພຽງບໍ່ເທົ່າໃດກ້າວ
ຫ່າງຈາກວັງ Kremlin ໃນອາທິດແລ້ວນີ້.
ບັນດາໝູ່ເພື່ອນ ແລະຄອບຄົວພາກັນຖືດອກໄມ້ສີແດງ ຍ່າງ
ຊ້າໆຜ່ານໂລງທີ່ເປີດຂອງທ່ານ Nemtsov ອາຍຸ 55 ປີ ຊຶ່ງ
ສົບຂອງທ່ານໄດ້ຖືກນຳໄປດອຍໄວ້ຢູ່ ສູນກາງສິດທິມະນຸດ
Andrei Sakharov ທີ່ນະຄອນຫລວງມົສກູ.
ຮອງນາຍົກລັດຖະມົນຕີ Arkady Dvorkovich ແມ່ນຮວມຢູ່
ໃນບັນດາຜູ້ຕາງ ໜ້າຣັດເຊຍ ທີ່ໄປຮ່ວມພິທີ ໃນຄັ້ງນີ້. ເອກອັກຄະລັດຖະທູດສະຫະລັດ
ທ່ານ John Teff ກໍໄດ້ໄປຮ່ວມພິທີດັ່ງດຽວກັນກັບ ອະດີດນາຍົກລັດຖະທົນຕີອັງກິດ ທ່ານ John Major.
ທ່ານ John Major ກ່າວວ່າ “ທ່ານ Nemtsov ແມ່ນເປັນສັນຍາລັກ ຂອງ ການປົກຄອງ
ດ້ວຍຕົວບົດກົດໝາຍ. ທ່ານເປັນສັນຍາລັກຂອງສິດເສລີີພາບໃນ ການປາກເວົ້າ. ທ່ານ
ເປັນສັນຍາລັກ ຂອງອິດສະຫຼະພາບ. ແລະສິ່ງທີ່ທ່ານໄດ້ຄັດຄ້ານກໍແມ່ນມີຄວາມສຳຄັນ
ຫຼາຍຄືກັນ ເຊັ່ນວ່າ ການຮຸກຮານ ການກົດຂີ່ ແລະການສໍ້ລາດບັງຫລວງ.”
ສົບຂອງທ່ານ Nemtsov ຈະຖືກນຳໄປຝັງ ໃນວັນອັງຄານມື້ນີ້ ທີ່ສຸສານ Troekuro-
vskoye ໃນນະຄອນມົສກູ.
ອະດີດຮອງນາຍົກລັດຖະມົນຕີຣັດເຊຍທ່ານນີ້ ໄດ້ຖືກຍິງຈາກທາງຫລັງສີ່ລູກ ໂດຍພວກ
ໂຈມຕີທີ່ບໍ່ຊາບຝ່າຍ ໃນວັນສຸກແລ້ວ ໃນຂະນະທີ່ທ່ານຍ່າງຂ້າມຂົວກັບເພື່ອນຜູ້ຍິງຄົນນຶ່ງ.
ປະທານາທິບໍດີ Vladimir Putin ໄດ້ໃຫ້ຄຳໝັ້ນສັນຍາທີ່ຈະທຳການສືບສວນຢ່າງເຕັມທີ່ ກ່ຽວກັບການສັງຫານທີ່ໄດ້ສ້າງຄວາມຕື່ນຕົກໃຈດັ່ງກ່າວ ຊຶ່ງບັນດານັກເຄື່ອນໄຫວຫຼາຍໆ
ຄົນກ່າວວ່າ ເປັນການແກ້ແຄ້ນຕໍ່ການທີ່ທ່ານ Nemtsov ໄດ້ຕິຕຽນມົສກູ.
