ໃນວັນພຸດມື້ນີ້ ທ່ານ Dmitry Medvedev ປະທານາທິບໍດີ ຣັດເຊຍ ໄດ້ພົບປະກັບ
ຜູ້ນໍາເກົາຫລີເໜືອ ກິມ ຈົງອິລ ທີ່ຄ້າຍທະຫານແຫ່ງນຶ່ງໃນເຂດໄຊບີເຣຍ.
ສື່ມວນຊົນຣັດເຊຍໄດ້ພິມເຜີຍແຜ່ຮູບພາບຕ່າງໆຂອງຜູ້ນໍາທັງສອງຈັບມືກັນ ທີ່ຄ້າຍ
ທະຫານແຫ່ງດັ່ງກ່າວ ທີ່ເມືອງ Ulan -Ude ແຄມທະເລ ສາບ Baikal. ໄດ້ມີການ
ອ້າງຄຳເວົ້າຂອງທ່ານກິມ ທີ່ຂີ່ເຮືອພັກຜ່ອນຢູ່ທະເລສາບດັ່ງກ່າວ ໃນວັນອັງຄານວານ
ນີ້ ແລະໄປຢ້ຽມຢາມໂຮງງານຜະລິດເຮືອບິນ ທີ່ກ່າວຕໍ່ປະທານາທິບໍດີ Medvedev
ວ່າ ທ່ານມ່ວນຊື່ນສຸກໃຈໃນການຢ້ຽມຢາມຣັດເຊຍຄັ້ງນີ້.
ພວກເຈົ້າໜ້າທີ່ຣັດເຊຍກ່າວວ່າ ຜູ້ນໍາທັງສອງຈະປຶກສາຫາລືກັນ ເຖິງຄວາມປາດຖະໜາ
ຂອງທ່ານກິມ ທີ່ຢາກຮື້ຟື້ນການເຈລະຈາຫົກຝ່າຍໂດຍໄວກ່ຽວກັບຂໍ້ຕົກລົງຍຸຕິໂຄງການ
ສ້າງ ອາວຸດນີວເຄລຍຂອງພຽງຢາງ ເພື່ອແລກປ່ຽນກັບຜົນປະໂຍດທາງເສດຖະກິດ
ແລະການທູດນັ້ນ. ນອກນີ້ແລ້ວ ຍັງຄາດວ່າ ພວກຜູ້ນໍາທັງສອງຈະໂອ້ລົມກັນ ກ່ຽວກັບ
ການສ້າງທໍ່ແກສທໍາມະຊາດທີ່ໄດ້ມີການສະເໜີໄປແລ້ວຜ່ານເກົາຫລີເໜືອນັ້ນ ພ້ອມ
ດ້ວຍການຮ້ອງຂໍຄວາມຊ່ວຍເຫລືອໃນດ້ານອາຫານຂອງພຽງຢາງນັ້ນນໍາ.
ອົງການຂ່າວສູນກາງຂອງທາງການພຽງຢາງຍັງແຈ້ງໃຫ້ຊາບວ່າ ເມື່ອອາທິດຜ່ານມາ
ປະທານາທິບໍດີ Medvedev ໄດ້ຮ້ອງຂໍຄວາມຮ່ວມໄມ້ ຮ່ວມມືຈາກຫລີເໜືອ ກ່ຽວ
ກັບການກໍ່ສ້າງ ທໍ່ສົ່ງແກສທໍາມະຊາດຈາກຣັດເຊຍ ທີ່ຜ່ານເກົາຫລີເໜືອ ໄປຍັງເກົາ ຫລີໃຕ້ນັ້ນ.
