ຜູ້ຊາຍ 4 ຄົນທີ່ຖືກກ່າວຫາວ່າ ດຳເນີນການສັງຫານໝູ່ ຢູ່ທີ່ໂຮງລະຄອນແຫ່ງນຶ່ງຂອງມົສກູ ໄດ້ຖືກເຈົ້າໜ້າທີ່ ລະບຸໂຕວ່າ ເປັນພົນລະເມືອງຂອງ ຕາຈິກກິສຖານ (Tajikistan), ທີ່ພວກເຂົາຫຼາຍພັນຄົນໄດ້ອົບພະຍົບໄປຣັດເຊຍໃນແຕ່ລະປີ ຈາກປະເທດທີ່ທຸກຍາກທີ່ສຸດໃນອະດີດສະຫະພາບໂຊວຽດ ເພື່ອເຮັດວຽກຢ່າງໜັກ ໃຫ້ມີລາຍຮັບພຽງພໍ ເພື່ອໃຫ້ສາມາດດຳລົງຊີວິດຢູ່ໄດ້, ອີງຕາມອົງການຂ່າວ ເອພີ.
ຄຽງຄູ່ກັບຄວາມທຸກຍາກແລ້ວ, ຕາຈິກກິສຖານ ກໍຍັງມີຄວາມເຄັ່ງຕຶງທາງສາດສະໜາ. ກຸ່ມອິສລາມຫົວຮຸນແຮງ ແມ່ນນຶ່ງໃນກອງກຳລັງຫຼັກ ທີ່ຕໍ່ຕ້ານລັດຖະບານໃນຊ່ວງສົງຄາມກາງເມືອງ ໃນຊຸມປີ 1990 ທີ່ໄດ້ທຳລາຍປະເທດ. ມີລາຍງານວ່າ ພວກຫົວຮຸນແຮງ ທີ່ອ້າງເອົາຄວາມຮັບຜິດຊອບ ໃນການສັງຫານໝູ່ໃນມົສກູ ທີ່ໄດ້ສັງຫານ 139 ຄົນ ເປັນສາຂາ ຂອງກຸ່ມລັດອິສລາມ ໃນອັຟການິສຖານ ທີ່ເປັນປະເທດໃກ້ຄຽງ ຕາມລາຍງານແລ້ວ ກໍາລັງຖືກເກນໄປເປັນທະຫານຈໍານວນຫຼວງຫຼາຍ ຈາກທາຈິກິສຖານ.
ຜູ້ຕ້ອງສົງໄສ 4 ຄົນ ທີ່ຖືກດຳເນີນຄະດີໃນສານມົສກູ ໃນຕອນແລງວັນອາທິດຜ່ານມາ ໃນຂໍ້ຫາກໍ່ການຮ້າຍ ປາກົດວ່າໄດ້ຖືກທຸບຕີ ຫຼືໄດ້ຮັບບາດເຈັບ ໃນລະຫວ່າງການຖືກກັກຂັງ. ຄົນນຶ່ງໄດ້ຖືກຍູ້ເຂົ້າມາ ຢູ່ເທິງຕຽງທີ່ມີລໍ້ ໂດຍພຽງແຕ່ໃສ່ເສື້ອຂອງໂຮງໝໍ ເທົ່ານັ້ນ.
ປະທານາທິບໍດີ ຣັດເຊຍ ທ່ານ ວລາດີເມຍ ປູຕິນ (Vladimir Putin) ໃນວັນຈັນວານນີ້ ໄດ້ພັນລະນາເຖິງຜູ້ຕ້ອງສົງໄສເຫຼົ່ານີ້ວ່າ ເປັນ “ພວກອິສລາມຫົວຮຸນແຮງ” ແລະ ທ່ານໄດ້ກ່າວຢ້ຳຄືນການກ່າວຫາຂອງທ່ານວ່າ ຢູເຄຣນ ອາດມີສ່ວນກ່ຽວຂ້ອງ ເຖິງແມ່ນວ່າ ຈະມີການປະຕິເສດຢ່າງໜັກແໜ້ນກໍຕາມ.
ຟໍຣັມສະແດງຄວາມຄິດເຫັນ