ລິ້ງ ສຳຫລັບເຂົ້າຫາ

ວັນອັງຄານ, ໒໓ ກໍລະກົດ ໒໐໒໔

ນັກ​ຂ່າວ ອິ​ສ​ຣາ​ແອ​ລ ເຊື້ອ​ສາຍ ຣັດ​ເຊຍ ຖືກ​ຫ້າມບໍ່​ໃຫ້​ເຂົ້າ​ປະ​ເທດ ເຊີ​ເບຍ


ປະ​ທາ​ນາ​ທິ​ບໍ​ດີ ເຊີ​ເບຍ ທ່ານ ອາ​ເລັກ​ແຊນ​ເດີ ວູ​ຊິ​ຈ໌ ໃຫ້​ຄຳ​ເຫັນ​ຕໍ່​ບັນ​ດາ​ນັກ​ຂ່າວ, 3 ເມ​ສາ 2022.
ປະ​ທາ​ນາ​ທິ​ບໍ​ດີ ເຊີ​ເບຍ ທ່ານ ອາ​ເລັກ​ແຊນ​ເດີ ວູ​ຊິ​ຈ໌ ໃຫ້​ຄຳ​ເຫັນ​ຕໍ່​ບັນ​ດາ​ນັກ​ຂ່າວ, 3 ເມ​ສາ 2022.

ນັກ​ຂ່າວ​ອິດ​ສະຫຼະ ອິ​ສ​ຣາ​ແອ​ລ ເຊື້ອ​ສາຍ ຣັດ​ເຊຍ ຜູ້​ທີ່​ຖືກ​ໝາຍວ່າ​ເປັນ “ເຈົ້າ​ໜ້າ​ທີ່​ຕ່າງ​ປະ​ເທດ” ໂດຍ ມົ​ສ​ກູ, ​ກ່າວ​ໃນ​ວັນ​ພຸດ​ທີ່​ຜ່ານ​ມາ​ວ່າ ​ລາວ​ຖືກ​ຫ້າມບໍ່​ໃຫ້​ເຂົ້າ​ປະ​ເທດ ເຊີ​ເບຍ ຍ້ອນ​ການ​ກ່າວ​ຫາກ່ຽວ​ກັບຄວາມ​ສ່ຽງ​ດ້ານ​ຄວາມ​ໝັ້ນ​ຄົງ.

ໃນ​ການ​ສຳ​ພາດ​ທາງ​ Zoom ກັບ​ວີ​ໂອ​ເອ, ທ່ານ ໂຣ​ມັນ ເພີ​ລ໌ ກ່າວ​ວ່າ ​ລາວ​ໄດ້​ເດີນ​ທາງ​ໄປ​ຮອດ​ສະ​ໜາມ​ບິນ​ໃນ​ນະ​ຄອນຫຼວງ ແບ​ລ​ເກ​ຣດ ຂອງ ເຊີ​ເບຍ, ສຳ​ລັບ​ການ​ຢ້ຽມ​ຢາມ​ສ່ວນ​ຕົວ​ໃນ​ວັນ​ເສົາ. ລາວ​ຖືກບອ​ກ​ໃຫ້​ລໍ​ຖ້າ​ປະ​ມານ 8 ຊົ່ວ​ໂມງ ​ກ່ອນ​ທີ່​ຈະ​ໄດ້​ຮັບ​ຄຳ​ສັ່ງ​ຫ້າມບໍ່​ໃຫ້​ລາວ​ເຂົ້າ​ປະ​ເທດ.

ທ່ານ ເພີ​ລ໌ ກ່າວ​ວ່າ “ເຂົາ​ເຈົ້າ​ເອົາ​ເຈ້ຍ​ໃຫ້​ຂ້ອຍແລ້ວ​ເວົ້າ​ວ່າ ​ມັນ​ມີ​ຄວາມ​ສ່ຽງ​ດ້ານ​ຄວາມ​ໝັ້ນ​ຄົງ​ຖ້າ​ຂ້ອຍ​ຢູ່​ໃນ​ດິນ​ແດນ​ປະ​ເທດ ເຊີ​ເບຍ.”

ລັດ​ຖະ​ບານ ຣັດ​ເຊຍ ໄດ້​ກຳ​ນົດ​ທ່ານ ເພີ​ລ໌ ເປັນ “ເຈົ້າ​ໜ້າ​ທີ່​ຕ່າງ​ປະ​ເທດ” ໃນ​ປີ 2021, ເຊິ່ງ​ແມ່ນ​ຄຳ​ສັບ​ທາງ​ກົດ​ໝາຍ​ທີ່ ມົ​ສ​ກູ ໄດ້ນໍາ​ໃຊ້​ນັບ​ຕັ້ງ​ແຕ່​ປີ 2012 ເປັນ​ຕົ້ນ​ມາ ເພື່ອ​ບັງ​ຄັບ​ການ​ປາ​ບປາມ​ທີ່​ຮຸນ​ແຮງ​ຕໍ່​ສື່ມ​ວນ​ຊົນ ແລະ ກຸ່ມ​ສັງ​ຄົມ​ພົນ​ລະ​ເຮືອນ. ກົດ​ໝາຍ​ດັ່ງ​ກ່າວ​ໄດ້​ສົ່ງຜົນ​ໃຫ້ ​ທ່ານ ເພີ​ລ໌ ຕ້ອງ​ເດີນ​ທາງ​ອອກ​ຈາກ ຣັດ​ເຊຍ ໄປ ອິ​ສ​ຣາ​ແອ​ລ.

ບັນ​ດາ​ນັກ​ຊ່ຽວ​ຊານ​ດ້ານ​ເສ​ລີ​ພາບ​ໃນ​ການ​ນຳ​ສະ​ເໜີ​ຂ່າວ ​ໄດ້​ສະ​ແດງ​ຄວາມ​ເປັນ​ຫ່​ວງ ກ່ຽວ​ກັບເຫດ​ການດັ່ງກ່າວ​ນັ້ນ.

ທ່ານນາງ ຈີນ ຄາ​ເວ​ເລຍ, ຫົວ​ໜ້າ​ຫ້ອງ​ການ​ຂ່າ​ວ​ຢູ​ໂຣບ​ຕາ​ເວັນ​ອອກ ແລະ ເອ​ເຊຍ​ກາງ ຢູ່​ອົງ​ການ​ນັກ​ຂ່າວບໍ່​ມີ​ພົມ​ແດນ ໄດ້​ກ່າວ​ຕໍ່​ວີ​ໂອ​ເອ​ຈາກ​ນະ​ຄອນຫຼວງ ປາ​ຣີ ວ່າ “​ໜ້າ​ເປັນ​ຫ່ວງຫຼາຍ​ ເພາະມັນ​ອາດ​ຢືນ​ຢັນໄດ້​ວ່າ ​ພວກ​ເຈົ້າ​ໜ້າ​ທີ່ ເຊີ​ເບຍ ແມ່ນ​ກຳ​ລັງ​ດໍາເນີນງານກັບ ຣັດ​ເຊຍ. ໃນການ​ທີ່​ຈະ​ເດີນ​ທາງ​ໄປ ເຊີ​ເບຍ ອາດ​ເປັນ​ອັນ​ຕະ​ລາ​ຍຫຼາຍ​ຕໍ່​ບັນ​ດາ​ນັກ​ຂ່າວ.”

ທ່ານ ເພີ​ລ, ຜູ້​ທີ່​ໄດ້​ຜະ​ລິດ​ສາ​ລະ​ຄະ​ດີສຳ​ລັບ​ໂທ​ລະ​ພາບ Current Time ໃນກ່ອນ​ໜ້ານີ້, ໄດ້​ກ່າວ​ວ່າ​ ທ່ານໄດ້​ເດີນ​ທາງ​ໄປ​ນະ​ຄອນຫຼວງ ແບ​ລ​ເກ​ຣດ ເພື່ອ​ຢ້ຽມ​ຢາມ​ໝູ່​ຄົນ​ນຶ່ງ.

​ອ່ານ​ຂ່າວນີ້​ຕື່ມ​ເປັນ​ພາ​ສາ​ອັງ​ກິດ

ຟໍຣັມສະແດງຄວາມຄິດເຫັນ

XS
SM
MD
LG