ລິ້ງ ສຳຫລັບເຂົ້າຫາ

ວັນສຸກ, ໐໔ ເມສາ ໒໐໒໕

ການໂຈມຕີດ້ວຍໂດຣນຂອງ ຣັດເຊຍ ສົ່ງຜົນເສຍຫາຍຕໍ່ຕະຫຼາດ ໃນຂົງເຂດ ຄາກີບ


ໃນຮູບທີ່ຖ່າຍຈາກວີດີໂອ ເຊິ່ງເຜີຍແຜ່ໂດຍກະຊວງປ້ອງກັນປະເທດຂອງຣັ້ດເຊຍ ໃນວັນທີ 6 ກຸມພາ 2025 ນີ້, ສະແດງໃຫ້ເຫັນເຄື່ອງຍິງຈະຫຼວດຫຼາຍຫົວ ທີ່ຍິງດ້ວຍໂຕມັນເອງ ຂອງ ຣັດເຊຍ, ຖືກຍິງໄປຍັງຕໍາແໜ່ງຂອງ ຢູເຄຣນ ນະສະຖານທີ່ທີ່ບໍ່ໄດ້ຮັບການເປີດເຜີຍ ໃນພື້ນທີ່ຊາຍແດນຂອງຂົງເຂດ ເຄີສຄ໌.
ໃນຮູບທີ່ຖ່າຍຈາກວີດີໂອ ເຊິ່ງເຜີຍແຜ່ໂດຍກະຊວງປ້ອງກັນປະເທດຂອງຣັ້ດເຊຍ ໃນວັນທີ 6 ກຸມພາ 2025 ນີ້, ສະແດງໃຫ້ເຫັນເຄື່ອງຍິງຈະຫຼວດຫຼາຍຫົວ ທີ່ຍິງດ້ວຍໂຕມັນເອງ ຂອງ ຣັດເຊຍ, ຖືກຍິງໄປຍັງຕໍາແໜ່ງຂອງ ຢູເຄຣນ ນະສະຖານທີ່ທີ່ບໍ່ໄດ້ຮັບການເປີດເຜີຍ ໃນພື້ນທີ່ຊາຍແດນຂອງຂົງເຂດ ເຄີສຄ໌.

ເຈົ້າ​ໜ້າ​ທີ່​ຢູ​ເຄ​ຣນ ໄດ້ລາຍ​ງານ​ຄວາມ​ເສຍ​ຫາຍ​ ໃນ​ວັນ​ພະ​ຫັດ​ມື້​ນີ້ ຢູ່​ທີ່​ຕະ​ຫຼາດ​ແຫ່ງ​ນຶ່ງ​ໃນຂົງເຂດ ຄາກີບ ທີ່ຕັ້ງຢູ່ທາງ​ພາກ​ຕາ​ເວັນ​ອອກ​ສຽງ​ເໜືອ​ຂອງ​ປະ​ເທດ ລຸນຫຼັງການ​ໂຈມ​ຕີດ້ວຍໂດຣນ​ຄັ້ງ​ຫຼ້າ​ສຸດ​ຂອງ ​ຣັດ​ເຊຍ ທີ່​ແນເປົ້າໝາຍ​ໃສ່​ຫຼາຍຂົງ​ເຂດ​ຂອງ​ປະ​ເທດ.

ຜູ້ປົກຄອງຂົງເຂດຄາກີບ, ທ່ານ ໂອເລ ຊີນີຮູບອບ (Oleh Syniehubov) ກ່າວຜ່ານທາງ Telegram ວ່າ ເສດຊາກຫັກພັງຈາກໂດຣນ ໄດ້ສ້າງຄວາມເສຍຫາຍຕໍ່ສາຍສົ່ງໄຟຟ້າຂອງເມືອງ.

ກອງທັບ​ຢູ​ເຄຣນ ກ່າວ​ວ່າ ກອງ​ກຳລັງປ້ອງ​ກັນທາງ​ອາກາດ​ຂອງ​ຕົນ ​ໄດ້​ຍິງ​ໂດຣນ 56 ລຳ​ໃນ​ຈຳນວນ 77 ລຳ​ຕົກ, ເຊິ່ງ​ຖືກສົ່ງອອກມາ​ໂດຍ​ກອງກຳລັງ ຣັດ​ເຊຍ.

ການສະກັດກັ້ນໂດຣນເຫຼົ່ານັ້ນ ເກີດຂຶ້ນເໜືອນ່ານຟ້າຂົງເຂດ ເຊີກາຊີ, ເຊີນີຮີບ, ດນີໂປຣເປໂຕຣບກ໌, ຄາກີບ, ກີຢິບ, ໂອເດຊາ, ໂປລຕາວາ, ຊູມີ, ວິນນິຕເຊຍ, ຊາໂປຣິສເຊຍ ແລະ ໄຊໂຕເມຍ (Zhytomyr), ອີງຕາມການກ່າວຂອງກອງທັບຢູເຄຣນ.

ຜູ້ປົກຄອງຄອງນະຄອນ ດນີໂປຣເປໂຕຣບກ໌, ທ່ານ ເຊີຮີລ ລີຊາສຄ໌ ກ່າວຜ່ານທາງ Telegram ວ່າ ການໂຈມຕີດ້ວຍໂດຣນຂອງ ຣັດເຊຍ ແລະການຍິງປືນໃຫຍ່ ໄດ້ສ້າງຄວາມເສຍຫາຍຕໍ່ເຮືອນຫຼາຍກວ່າ 10 ຫຼັງຢູ່ໃນພູມີພາກຂອງທ່ານ.

ກະຊວງ​ປ້ອງ​ກັນ​ປະ​ເທດຣັດ​ເຊຍ ກ່າວ​ໃນ​ວັນ​ພະຫັດ​ມື້​ນີ້​ວ່າ ຕົນ​ໄດ້​ທຳລາຍ​ໂດຣນ 28 ລໍາ​ຂອງ​ຢູ​ເຄຣນໃນຕອນຂ້າມຄືນ.

ກະຊວງກ່າວ​ວ່າ ປະມານ​ເຄິ່ງນຶ່ງ​ຂອງ​ໂດຣນ ຖືກ​ຍິງ​ຕົກເໜືອ​ທະ​ເລ ອາຊອຟ, ໃນຂະນະ​ທີ່​ກອງກໍາລັງຂອງ ຣັດ​ເຊຍ ​ໄດ້​ທຳລາຍ​ໂດຣນລໍາ​ອື່ນໆ ໃນພູມິພາກ ໂຣສຕອບວ໌ (Rostov), ຄຣາສໂນດາຣ໌ (Krasnodar) ​ແລະ ອາສຕຣາຄານ (Astrakhan).

ອ່ານຂ່າວນີ້ເປັນພາສາອັງກິດ

ຟໍຣັມສະແດງຄວາມຄິດເຫັນ

XS
SM
MD
LG