ສານຣັດເຊຍ ໃນວັນອັງຄານວານນີ້, ໄດ້ປະຕິເສດຕໍ່ການຍື່ນອຸທອນໂດຍນັກຂ່າວວິທະຍຸຢູໂຣບເສລີ/ນັກຂ່າວວິທະຍຸເສລີພາບ ຫຼື RFE/RL ທ່ານນາງ ອາລຊູ ເຄີມາເຊວາ (Alsu Kurmasheva) ກ່ອນການຕັດສິນກັກຂັງນາງ ໃນຂໍ້ຫາກ່ຽວກັບຄວາມລົ້ມແຫຼວທີ່ບໍ່ລົງທະບຽນເປັນເຈົ້າໜ້າທີ່ຂອງຕ່າງປະເທດ.
ທະນາຍຄວາມຂອງ ທ່ານນາງ ເຄີມາເຊວາ ໄດ້ຮ້ອງຂໍໃຫ້ມີຂໍ້ຈໍາກັດກ່ອນການ ດຳເນີນຄະດີສໍາລັບນັກຂ່າວ ແທນທີ່ຈະກັກຂັງກ່ອນການດຳເນີນຄະດີ, ແຕ່ສານ ສູງສຸດຂອງສາທາລະນະລັດ ຕາຕາສຕານ (Tatarstan) ຂອງ ຣັດເຊຍ ໄດ້ປະຕິເສດການຂໍອຸທອນດັ່ງກ່າວ. ໃນອາທິດທີ່ຜ່ານມາ, ສານເຂດໄດ້ສັ່ງໃຫ້ ກັກຂັງນາງຢູ່ໃນຄຸກຊົ່ວຄາວຈົນຮອດຢ່າງຫນ້ອຍວັນທີ 5 ທັນວາ.
ທ່ານນາງ ເຄີມາເຊວາ ໄດ້ເຂົ້າຮ່ວມຮັບຟັງການພິຈາລະນາຄະດີແບບປິດລັບ ໃນວັນອັງຄານວານນີ້ ຜ່ານການເຊື່ອມຕໍ່ທາງວິດີໂອຈາກສູນກັກຂັງໃນເມືອງ ຄາຊານ (Kazan), ເຊິ່ງເປັນເມືອງເອກຂອງເຂດ ຕາຕາສຕານ. ນັກຂ່າວ ທີ່ສໍານັກງານໃຫຍ່ໃນນະຄອນຫຼວງ ປຣາກ (Prague) ປະເຊີນໜ້າກັບການຈໍາຄຸກຮອດ 5 ປີ ໃນຂໍ້ຫາລະເມີດກົດໝາຍ “ເຈົ້າໜ້າທີ່ຂອງຕ່າງປະເທດ” ຂອງປະເທດ, ໂດຍທົ່ວໄປແລ້ວ ມົສກູ ນໍາໃຊ້ກົດໝາຍດັ່ງກ່າວນີ້ ເພື່ອເພັ່ງເລັງໃສ່ນັກຂ່າວທີ່ທໍາການວິຈານ ແລະບັນດານັກເຄື່ອນໄຫວຕ່າງໆ.
ທ່ານນາງ ເຄີມາເຊວາ ແລະ ສະຖານີວິທະຍຸ RFE/RL ປະຕິເສດຂໍ້ກ່າວຫາ ດັ່ງກ່າວຕໍ່ນາງ.
