ລິ້ງ ສຳຫລັບເຂົ້າຫາ

ວັນອັງຄານ, ໐໑ ເມສາ ໒໐໒໕

ການໂຈມຕີຂອງ ຣັດເຊຍ ໃສ່ຂົງເຂດ ໂອເດຊາ ສົ່ງຜົນເຮັດໃຫ້ມີຜູ້ບາດເຈັບ 4 ຄົນ


ໃນຮູບພາບ ສະແດງໃຫ້ເຫັນສະຖານທີ່ທີ່ຖືກໂຈມຕີດ້ວຍໂດຣນຂອງ ຣັດເຊຍ, ທ່າມກາງການໂຈມຕີ ຢູເຄຣນ ຂອງ ຣັດເຊຍ, ໃນຂົງເນດ ໂອເດຊາ, ປະເທດຢູເຄຣນ, ວັນທີ 19 ກຸມພາ 2025. ຮູບພາບຈາກອົງການຂ່າວຂອງສໍານັກງານບໍລິການສຸກເສີນຂອງ ຢູເຄຣນ ໃນພູມິພາກໂອເດຊາ/ ເຜີຍແຜ່ໂດຍອົງການຂ່າວ REUTERS.
ໃນຮູບພາບ ສະແດງໃຫ້ເຫັນສະຖານທີ່ທີ່ຖືກໂຈມຕີດ້ວຍໂດຣນຂອງ ຣັດເຊຍ, ທ່າມກາງການໂຈມຕີ ຢູເຄຣນ ຂອງ ຣັດເຊຍ, ໃນຂົງເນດ ໂອເດຊາ, ປະເທດຢູເຄຣນ, ວັນທີ 19 ກຸມພາ 2025. ຮູບພາບຈາກອົງການຂ່າວຂອງສໍານັກງານບໍລິການສຸກເສີນຂອງ ຢູເຄຣນ ໃນພູມິພາກໂອເດຊາ/ ເຜີຍແຜ່ໂດຍອົງການຂ່າວ REUTERS.

ບັນດາ​ເຈົ້າ​ໜ້າ​ທີ່​ໃນ​ພາກ​ໃຕ້​ຂອງ ​ຢູ​ເຄຣນ ກ່າວ​ໃນ​ວັນ​ພຸດ​ມື້​ນີ້​ວ່າ ການ​ໂຈມ​ຕີ​ທາງ​ອາກາດ​ຂອງ ຣັດ​ເຊຍ ​ໃນ​ຕອນຂ້າມຄືນ​ ​ເຮັດ​ໃຫ້​ມີ​ຜູ້​ບາດ​ເຈັບ​ຢ່າງ​ໜ້ອຍ 4 ຄົນ, ​ແລະ​ສ້າງ​ຄວາມ​ເສຍ​ຫາຍ​ໃຫ້​ແກ່​ພື້ນຖານ​ໂຄງ​ລ່າງ​ສາທາລະນຸປະໂພກອີກຈໍານວນນຶ່ງ.

ຜູ້ປົກຄອງຂົງເຂດ ໂອເດຊາ, ທ່ານ ໂອເລ ຄິບເປີ ກ່າວຜ່ານທາງ Telegram ວ່າ ກອງທັບຣັດເຊຍໄດ້ປະຕິບັດໃນສິ່ງທີ່ທ່ານຮ້ອງວ່າ ເປັນການໂຈມຕີດ້ວຍໂດຣນ “ຂະໜາດໃຫຍ່” ທີ່ສົ່ງຜົນຕໍ່ການບໍລິການພະລັງງານ ແລະຄວາມຮ້ອນ. ທ່ານ​ກ່າວຕື່ມ​ວ່າ ຄວາມ​ເສຍ​ຫາຍ​ດັ່ງກ່າວ​ ລວມມີ​ຄລີ​ນິກ​ສໍາລັບເດັກນ້ອຍ ​ແລະ​ໂຮງຮຽນ​ອະນຸບານ.

ການ​ໂຈມ​ຕີ​ຂອງຣັດ​ເຊຍ​ ໃນ​ມື້ຄືນ​ນີ້ ຍັງ​ໄດ້​ສ້າງ​ຄວາມ​ເສຍ​ຫາຍ​ຕໍ່​ສາຍ​ໄຟຟ້າ​ໃນ​ພູມິພາກ ເຊີກາຊີ, ເຊິ່ງເປັນບ່ອນ​ທີ່ຜູ້ປົກ​ຄອງ​ລັດ ທ່ານ ອີຮໍ ຕາບູເຣັທສ໌ ກ່າວ​ວ່າ ​ເສດຊາກ​ຫັກ​ພັງ​ຈາກ​ໂດຣນ​ທີ່​ຖືກ​ທຳລາຍ​ ໄດ້​ສ້າງຄວາມເສຍຫາຍໃຫ້ແກ່​ເຮືອນຊານ 8 ຫຼັງ.

ກອງທັບ​ຢູ​ເຄຣນກ່າວ​ວ່າ ຕົນ​ໄດ້​ຍິງ​ໂດຣນ 106 ລຳ​ໃນ​ຈຳນວນທັງໝົດ 167 ລຳຕົກ, ເຊິ່ງເປັນໂດຣນທີ່ກອງ​ກຳລັງຂອງ ​ຣັດ​ເຊຍ ສົ່ງອອກມາ​ໃນຕອນຂ້າມຄືນ​.

ກອງທັບກ່າວ​ວ່າ ການ​ສະກັດ​ກັ້ນດັ່ງກ່າວ ​ມີ​ຂຶ້ນ​ໃນພູມິພາກ ເຊີກາຊີ, ເຊີນີຮີບ, ດນີໂປຣເປໂຕຣບກ໌, ຄາກີບ, ເຄີສັນ, ຄເມລນີສກີ, ກິໂຣໂວຣາດ, ນະຄອນຫຼວງກີຢິບ, ພູມິພາກ ມິໂຄໄລ, ໂອເດຊີ, ໂປລຕາວາ, ຊູມີ, ຊາໂປຣິສເຊຍ ແລະ ໄຊໂຕເມຍ.

ກອງທັບຣັດເຊຍກ່າວໃນວັນພຸດມື້ນີ້ວ່າ, ໃນຕອນຂ້າມຄືນນີ້ ຕົນໄດ້ຍິງໂດຣນຂອງຢູເຄຣນຕົກປະມານ 30 ລຳ, ສ່ວນຫຼາຍແມ່ນໃນຂົງເຂດ ບຣີອານສຄ໌ (Bryansk) ບ່ອນທີ່ເຈົ້າໜ້າທີ່ກ່າວວ່າ ບໍ່ມີລາຍງານກ່ຽວກັບຄວາມເສຍຫາຍ ຫຼື ຜູ້ທີ່ໄດ້ຮັບບາດເຈັບ.

ກອງ​ກຳລັງ​ຢູ​ເຄຣນ​ ໄດ້ທໍາການ​ໂຈມ​ຕີ​ໂຮງ​ກັ່ນ​ນ້ຳມັນ​ແຫ່ງ​ນຶ່ງ ​ໃນຕອນຂ້າມ​ຄືນນີ້​ ຢູ່ເມືອງ ໄຊສ໌ຣານ (Syzran) ​ໃນ​ພູມິພາກ ຊາມາຣາ (Samara) ຂອງ ຣັດ​ເຊຍ.

ຜູ້ປົກຄອງ ທ່ານ ວີເຊັສລາບ ເຟໂດຣິສເຊັບ (Vyacheslav Fedorishchev) ກ່າວຜ່ານທາງ Telegram ວ່າ ສະຖານະການຢູ່ໂຮງກັ່ນນໍ້າມັນ ຖືກຄວບຄຸມໄດ້ແລ້ວ, ແລະການໂຈມຕີດັ່ງກ່າວນັ້ນ ບໍ່ໄດ້ສ້າງຄວາມເສຍຫາຍຂະໜາດໃຫຍ່ຕໍ່ໂຮງກັ່ນແຫ່ງນີ້.

ເມືອງ ໄຊສ໌ຣານ ຕັ້ງຢູ່ຫ່າງຈາກບໍລິເວນຊາຍແດນ ຣັດເຊຍ ແລະ ຢູເຄຣນ ປະມານ 800 ກິໂລແມັດ, ເຮັດໃຫ້ການໂຈມຕີບໍ່ທຳມະດາ ໃນການຕັດສິນໃຈກ່ຽວກັບວ່າ ໄລຍະການໂຈມຕີເຂົ້າໄປໃນ ຣັດເຊຍ ໄດ້ໄກຊ່ຳໃດ ຂອງກອງກໍາລັງຢູເຄຣນນັ້ນ. ການໂຈມຕີຂອງຢູເຄຣນ ​ສ່ວນ​ໃຫຍ່​ແມ່ນ​ເກີດ​ຂຶ້ນ​ຢູ່ຕາມຂົງເຂດ​ຊາຍ​ແດນ​ລະ​ຫວ່າງ​ສອງ​ປະ​ເທດ.

ໂຮງນໍ້າ​ມັນ ແລະ​ສະ​ຫນາມ​ບິນ​ຂອງ​ທະ​ຫານທັງຫຼາຍ ​ແມ່ນຕົກເປັນເປົ້າ​ໝາຍ​ຂອງການ​ໂຈມ​ຕີ ຫຼາຍທີ່ສຸດ ແລະໃນລະດັບທີ່​ເລິກເຂົ້າໄປກວ່າເກົ່າ.

ອ່ານຂ່າວນີ້ເປັນພາສາອັງກິດ

ຟໍຣັມສະແດງຄວາມຄິດເຫັນ

XS
SM
MD
LG