ສານລັດຖະບານກາງແຫ່ງນຶ່ງໃນນະຄອນນິວຢອກ ໃນວັນພະຫັດວານນີ້ ໄດ້ຕັດສິນລົງ ໂທດນັກສືບທີ່ຮັບສາລະພາບວ່າ ເປັນສາຍລັບລັດຖະບານຣັດເຊຍ ໃຫ້ຕິດຄຸກເປັນເວລາ
10 ປີ ແລະໄດ້ສັ່ງປັບໃໝ 500,000 ໂດລາ ທີ່ລາວໄດ້ຮັບກຳໄລຈາກກິດຈະການຜິດກົດໝາຍ ທີ່ໄດ້ເນັ້ນໜັກໃສ່ການລັກລອບສົ່ງເຄື່ອງ high-tech ອີເລັກໂຕຣນິກ ຢ່າງລັບໆ ໄປໃຫ້ກອງທັບຣັດເຊຍ.
ທ້າວ Alexander Fishenko ໄດ້ຮັບສາລະພາບຕໍ່ທັງໝົດ 19 ຂໍ້ຫາ ທີ່ຍື່ນ ຟ້ອງໂດຍກະຊວງຍຸຕິທຳສະຫະລັດ. ບັນດາເຈົ້າໜ້າທີ່ສະຫະລັດກ່າວວ່າ ບໍລິ ສັດທີ່ ທ້າວ Fishenko ກໍ່ຕັ້ງຂຶ້ນ ໄດ້ສົ່ງເຄຶ່ອງຜະລິດຕະພັນ ອີເລັກໂຕຣນິກໃນມູນຄ່າ 50 ລ້ານໂດລາ
ໄປຣັດເຊຍລະຫວ່າງປີ 2002 ຫາປີ 2012 ຊຶ່ງທັງ ໝົດເປັນການຝ່າຝືນຕໍ່ລະບົບອຸນະຍາດ ທີ່ໝາຍເຖິງການຄວບຄຸມການສົ່ງອອກດັ່ງກ່າວ.
ບັນດາເຈົ້າໜ້າທີ່ສະຫະລັດ ກ່າວວ່າ “ພວກສິນຄ້າເຫລົ່ານີ້ສາມາດນຳໃຊ້ ແລະມັກໃຊ້ຢ່າງກວ້າງຂວາງນຳລະບົບທະຫານ ຮວມທັງເຣດ້າ ແລະລະບົບສັງເກດການ ລະບົບນຳວິຖີລູກສອນໄຟ ແລະເຄື່ອງບີບຄະນວນລະເບີດ.”
ການກ່າວຫາຕໍ່ທ້າວ Fishenko ຜູ້ທີ່ຖືສອງສັນຊາດ ຄືອາເມຣິກັນ ແລະ ຣັດເຊຍແມ່ນ
ຮວມທັງການວາງແຜນ ສົ່ງຜະລິດຕະພັນທີ່ຄວບຄຸມອອກນອກປະເທດ ວາງແຜນຟອກເງິນ ແລະຂັດຂວາງຂະບວນການຍຸຕິທຳ. ລາວໄດ້ຖືກກ່າວຫາໃນເດືອນຕຸລາ ປີ 2012 ພ້ອມກັບອີກ 10 ຄົນ ແລະສອງບໍລິສັດ ທີ່ຄວບຄຸມໂດຍທ້າວ Fishenko. 3 ຄົນເຈົ້າໜ້າທີ່ຍັງຈັບບໍ່ໄດ້ ແຕ່ບຸກຄົນອື່ນໆ ແມ່ນຍອມຮັບຜິດ ຫລືບໍ່ກໍຖືກຕັດສິນໂທດໄປແລ້ວ.
ເພື່ອຫລົບຫລີກການຄວບຄຸມຜະລິດຕະພັນຮາຍເທັກທີ່ຜະລິດຢູ່ໃນສະຫະລັດ ເຈົ້າໜ້າທີ່ກ່າວວ່າ ທ້າວ Fishenko ແລະພວກສົມຮູ້ຮ່ວມຄິດໄດ້ໃຫ້ຂໍ້ມູນທີ່ບໍ່ ຖືກຕ້ອງກ່ຽວກັບວ່າໃຜເປັນຜູ້ຊື້ອຸບປະກອນອີເລັກໂທຣນິກເຫລົ່ານີ້ ໂດຍປິດບັງຄວາມຈິງທີ່ເຂົາເຈົ້າໄດ້ເປັນຜູ້ສົ່ງອອກ ແລະກ່າວເຖິງເຄື່ອງຢູ່ໃນບັນຊີແບບບໍ່ຖືກ ຕ້ອງ ຕາມທີ່ໄດ້ສະເໜີໃຫ້ແກ່ກະຊວງການຄ້າສະຫະລັດ.
