ບັນດາເຈົ້າໜ້າທີ່ໃນພາກຕາເວັນຕົກສຽງໃຕ້ຂອງ ຣັດເຊຍ ໄດ້ກ່າວວ່າການໂຈມຕີດ້ວຍໂດຣນຂອງ ຢູເຄຣນ ໄດ້ກໍ່ໃຫ້ເກີດໄຟໄໝ້ຢູ່ໂຮງກັ່ນນ້ຳມັນ.
ທ່ານ ວາຊີລີ ໂກລູເບັຟ, ຜູ້ປົກຄອງພາກພື້ນ ຣອສຕອຟ-ອອນ-ດອນ ໄດ້ກ່າວໃນ Telegram ວ່າການໂຈມຕີດັ່ງກ່າວໄດ້ຕົກຖືກໂຮງກັ່ນນ້ຳມັນ ໂນໂວແຊັກຕິນສ໌ ແລະ ວຽກງານຢູ່ສະຖານທີ່ດັ່ງກ່າວແມ່ນໄດ້ຖືກຢຸດຊົ່ວຄາວ.
ໃນພາກພື້ນ ແບລໂກຣອດ ຂອງ ຣັດເຊຍ, ຜູ້ປົກຄອງທ່ານ ເວຍເຊັສລາຟ ກລາດຄອຟ ໄດ້ກ່າວວ່າໂດຣນ ຄາມິຄາເຊ ໄດ້ຕົກຖືກສາງນ້ຳມັນໃນເມືອງ ສຕາຣີ ອອສກອລ໌. ການໂຈມຕີດ້ວຍໂດຣນອີກຄັ້ງໄດ້ສ້າງຄວາມເສຍຫາຍຕໍ່ທຸລະກິດກະສິກຳໃນພາກພື້ນ ແບລໂກຣອດ, ອີງຕາມການກ່າວຂອງທ່ານ
ກລາດຄອຟ.
ກະຊວງປ້ອງກັນປະເທດຂອງ ຣັດເຊຍ ໄດ້ກ່າວໃນວັນພະຫັດມື້ນີ້ວ່າເຂົາເຈົ້າໄດ້ສະກັດກັ້ນໂດຣນຂອງ ຢູເຄຣນ 6 ລຳ ຢູ່ພາກພື້ນ ແບລໂກຣອດ, ພ້ອມກັບ 13 ລຳໃນແຫຼມ ໄຄຣເມຍ ທີ່ ຣັດເຊຍ ຄວບຄຸມ.
ກອງທັບ ຢູເຄຣນ ໄດ້ລາຍງານໃນວັນພະຫັດມື້ນີ້ວ່າເຂົາເຈົ້າໄດ້ຍິງໂດຣນ 17 ຫາ 18 ລຳທີ່ ຣັດເຊຍ ໄດ້ສົ່ງເຂົ້າໄປໃນການໂຈມຕີຂ້າມຄືນ.
ກອງທັບອາກາດ ຢູເຄຣນ ໄດ້ກ່າວວ່າການສະກັດກັ້ນໄດ້ເກີດຂຶ້ນຢູ່ພາກພື້ນ ເຄີສັນ, ຄແມລນິດສກີ, ມິໂຄລາອິບ ແລະ ຊາໂປຣິສເຊຍ.
ທ່ານ ເຊີຮີ ຕິວຣິນ, ຜູ້ປົກຄອງພາກພື້ນ ຄແມລນິດສກີ, ໄດ້ລາຍງານຄວາມເສຍຫາຍຕໍ່ສະຖານທີ່ພື້ນຖານໂຄງລ່າງ, ແຕ່ບໍ່ມີຜູ້ໄດ້ຮັບບາດເຈັບຈາກການໂຈມຕີດັ່ງກ່າວ.
ປະທານາທິບໍດີ ຣັດເຊຍ ທ່ານ ວລາດິເມຍ ປູຕິນ ໄດ້ກ່າວໃນວັນພຸດວານນີ້ວ່າ ຣັດເຊຍ ອາດໃຊ້ອາວຸດນິວເຄລຍ ຖ້າອຳນາດອະທິປະໄຕຂອງເຂົາເຈົ້າຫາກຖືກຂົ່ມຂູ່.
ທ່ານ ປູຕິນ ໄດ້ກ່າວ, ໂດຍອ້າງອີງສິ່ງທີ່ທ່ານກ່າວວ່າເປັນນະໂຍບາຍຄວາມໝັ້ນຄົງຂອງປະເທດຂອງທ່ານວ່າ “ຖ້າການກະທຳຂອງຄົນໃດຄົນນຶ່ງເປັນໄພຂົ່ມຂູ່ຕໍ່ອຳນາດອະທິປະໄຕ ແລະ ຜືນແຜ່ນດິນອັນຄົບຖ້ວນຂອງພວກເຮົາ, ພວກເຮົາພິຈາລະນາມັນມີຄວາມເປັນໄປໄດ້ທີ່ຈະໃຊ້ທຸກຢ່າງທີ່ເຮົາມີ.”
ຟໍຣັມສະແດງຄວາມຄິດເຫັນ