ລັດຖະມົນຕີຕ່າງປະເທດ ສະຫະລັດ ທ່ານ John Kerry ຈະພົບປະກັບລັດຖະມົນຕີຕ່າງ ປະເທດ ຣັດເຊຍ ທ່ານ Sergei Lavrov ແລະບັນດາຄູ່ຕຳແໜ່ງທີ່ສຳຄັນອື່ນໆໃນປະເທດ Switzerland ໃນວັນເສົາຈະມາເຖິງນີ້ ໃນຄວາມພະຍາຍາມອີກຄັ້ງນຶ່ງເພື່ອຊອກຫາຊ່ອງທາງແກ້ໄຂທາງການທູດ ກ່ຽວກັບ ວິກິດການໃນ ຊີເຣຍ.
ກະຊວງຕ່າງປະເທດ ສະຫະລັດ ກ່າວວ່າ ການສົນທະນາຢູ່ນະຄອນ Lausanne ເປັນພາກສ່ວນນຶ່ງຂອງຫລາຍຝ່າຍ ຫລັງຈາກ ສະຫະລັດ ໄດ້ລົບລ້າງການເຈລະຈາໂດຍກົງກັບມົສກູ ກ່ຽວກັບ ການຢຸດຍິງ ແລະ ການບັນເທົາທຸກດ້ານມະນຸດສະທຳ.
ນອກນັ້ນ ທ່ານ Kerry ຍັງຈະສົນທະນາ ກ່ຽວກັບ ຊີເຣຍ ຢູ່ໃນກອງປະຊຸມກັບ ບັນດາຄູ່ຕຳແໜ່ງປະຈຳຂົງເຂດ ແລະ ສາກົນໃນວັນອາທິດທີ່ນະຄອນຫລວງ ລອນດອນ.
ກະຊວງຕ່າງປະເທດ ສະຫະລັດ ບໍ່ໄດ້ເວົ້າວ່າຈະບໍ່ມີການພົບປະລະຫວ່າງທ່ານ Kerry ກັບທ່ານ Lavrov ຕ່າງຫາກ ແຕ່ນັ້ນບໍ່ໄດ້ໝາຍຄວາມວ່າ “ໄດ້ຍົກເລີກ” ການພົວພັນຂອງທັງສອງຝ່າຍ ສະຫະລັດ-ຣັດເຊຍ
ປະເທດຕາເວັນຕົກພວມກ່າວຫາ ຣັດເຊຍ ແລະ ພັນທະມິດ ຊີເຣຍ ວ່າກໍ່ອາຊະຍາກຳສົງ ຄາມ ໃນການຖີ້ມລະເບີດໃສ່ບັນດາໂຮງໝໍ ແລະ ຂະບວນລົດບັນເທົາທຸກສະຫະປະຊາຊາດ ແລະຢູ່ອ້ອມແອ້ມເມືອງ Aleppo ໃນຂະນະທີ່ເຂົາເຈົ້າແນເປົ້າໝາຍໃສ່ພວກຕໍ່ຕ້ານລັດຖະບານ ທີ່ຫາທາງໂຄ່ນລົ້ມ ປະທານາທິບໍດີ Bashar al-Assad.
ໂຄສົກທຳນຽບຂາວທ່ານ Josh Earnest ກ່າວໃນວັນພຸດວານນີ້ວ່າ ສະຫະລັດ ບໍ່ໄດ້ພະ ຍາຍາມທີ່ຈະບັນລຸຂໍ້ຕົກລົງກັບ ຣັດເຊຍ ຕໍ່ໄປອີກແລ້ວ ແຕ່ແທນທີ່ຈະເຮັດແນວນັ້ນແມ່ນ ພວມພະຍາຍາມໃຊ້ “ສ່ອງທາງການທູດແນວໃໝ່” ເພື່ອຫລຸດຜ່ອນຄວາມຮຸນແຮງຢູ່ໃນ ຊີເຣຍ.
