ລິ້ງ ສຳຫລັບເຂົ້າຫາ

ວັນພຸດ, ໑໗ ເມສາ ໒໐໒໔

ຣັດເຊຍ ລາຍງານວ່າ ໄດ້ຍິງໂດຣນ 15 ລໍາຂອງຢູເຄຣນ ຕົກ ໃກ້ກັບຂດຊາຍແດນ


ອາສາສະໝັກໜ່ວຍປ້ອງກັນຕົນເອງ ຖືກເຫັນຢູ່ໃນຕຶກອາພາດເມັ້ນ ທີ່ໄດ້ຮັບຄວາມເສຍຫາຍ ຫຼັງຈາກການໂຈມຕີດ້ວຍເຮືອບິນບໍ່ມີຄົນຂັບ ຢູ່ ແບລໂກຣອດ ໃນວັນທີ 13 ມີນາ 2024.
ອາສາສະໝັກໜ່ວຍປ້ອງກັນຕົນເອງ ຖືກເຫັນຢູ່ໃນຕຶກອາພາດເມັ້ນ ທີ່ໄດ້ຮັບຄວາມເສຍຫາຍ ຫຼັງຈາກການໂຈມຕີດ້ວຍເຮືອບິນບໍ່ມີຄົນຂັບ ຢູ່ ແບລໂກຣອດ ໃນວັນທີ 13 ມີນາ 2024.

ກະ​ຊວງ​ປ້ອງ​ກັນ​ປະ​ເທດ​ຣັດ​ເຊຍ​ກ່າວ​ໃນ​ວັນ​ພະ​ຫັດ​ມື້​ນີ້​ວ່າ ຕົນ​ໄດ້​ທຳ​ລາຍ​ເຮືອ​ບິນ​ບໍ່​ມີ​ຄົນ​ຂັບ ຫຼື ໂດຣນ ​ຂອງ​ຢູເຄຣນ 15 ລຳ ແລະ​ລູກ​ສອນ​ໄຟ 8 ລູກ, ໃນ​ຂະ​ນະ​ທີ່​ເຈົ້າ​ໜ້າຂອງຣັດເຊຍ​ໃນພາກພື້ນ​ທີ່​ມີ​ຊາຍ​ແດນ​ຕິດ​ກັບ​ຢູ​ເຄ​ຣນ ກ່າວ​ວ່າ ມີ​ຜູ້​ເສຍ​ຊີ​ວິດນຶ່ງຄົນ ແລະ​ອີກ​ຫລາຍ​ຄົນ​ໄດ້​ຮັບ​ບາດ​ເຈັບ​ຈາກ​ການ​ໂຈມ​ຕີ​ດ້ວຍ​ໂດຣນ​ຂອງ​ຢູ​ເຄ​ຣນ.

ທ່ານ ເວຍເຊັລລາຟ ແກັລດກອຟ (Vyacheslav Gladkov), ຜູ້ປົກຄອງ​ເຂດ ແບລໂກຣອດ (Belgorod) ກ່າວ​ວ່າ ຂໍ້​ມູນ​ເບື້ອງ​ຕົ້ນ​ໄດ້​ຊີ້​ໃຫ້​ເຫັນ​ວ່າ ມີຜູ້​ຊາຍ​ຄົນ​ນຶ່ງຢູ່​ໃນ​ລົດ ​ເສຍ​ຊີວິດ ​ໃນ​ການ​ໂຈມ​ຕີ ​ໃນ​ຂະນະ​ທີ່​ມີ​ຜູ້​ໄດ້ຮັບບາດ​ເຈັບ​ອີກ​ຫລາຍ​ຄົນ.

ທ່ານ ແກັລດກອຟ (Gladkov) ກ່າວ​ວ່າ ເຮືອບິນ​ບໍ່​ມີ​ຄົນ​ຂັບ​ອີກ​ລຳ​ນຶ່ງ​ໄດ້​ຕໍາ​ໃສ່​ຕົ້ນ​ໄມ້ ​ເຮັດໃຫ້​ມີ​ຄື້ນຟອງ​ລະ​ເບີດ​ທີ່ໄດ້​ສ້າງ​ຄວາມ​ເສຍ​ຫາຍ​ໃຫ້​ເຮືອນ​ສອງ​ຫລັງ ​ແຕ່​ບໍ່​ມີ​ຜູ້​ບາດ​ເຈັບ.

ກະຊວງ​ປ້ອງ​ກັນ​ປະ​ເທດຣັດ​ເຊຍ​ກ່າວ​ວ່າ ​ໄດ້​ສະກັດ​ກັ້ນ​ເຮືອບິນ​ບໍ່​ມີ​ຄົນ​ຂັບ 12 ລຳ ​ທີ່​ບິນ​ຂ້າມ​ເຂດ ແບລໂກຣອດ (Belgorod) ​ແລະ​ອີກ 3 ລຳ​ຢູ່​ເຂດ ເຄີສ(Kursk) ທາງພາກ​ຕາ​ເວັນ​ຕົກ​ຂອງຣັດ​ເຊຍ.

ໃນ​ຢູ​ເຄຣນ, ທ່ານ ໂອເລ ຊີເນຮູໂບບວ໌ (Oleh Synehubov), ຜູ້ປົກຄອງເຂດ ຄາກີຟ (Kharkiv) ທາງພາກ​ຕາ​ເວັນ​ອອກ ​ໄດ້​ລາຍ​ງານ​ການ​ໂຈມ​ຕີ​ດ້ວຍ​ລູກ​ສອນ​ໄຟ​ຂອງຣັດ​ເຊຍ.

ທ່ານ ຊີເນຮູໂບບວ໌ (Synehubov) ກ່າວ​ວ່າ ບໍ່​ມີ​ລາຍ​ງານ​ຜູ້​ບາດ​ເຈັບ ຫຼືເສຍຊີວິດ​ຈາກ​ການ​ໂຈມ​ຕີດັ່ງກ່າວເທື່ອ.

ປະທານາທິບໍດີ ຣັດເຊຍ ທ່ານ ວລາດີເມຍ ປູຕິນ (Vladimir Putin) ກ່າວໃນວັນພຸດວານນີ້ວ່າ ມົສກູ ກຽມພ້ອມທີ່ຈະໃຊ້ອາວຸດນິວເຄລຍ ຖ້າອະທິປະໄຕ ຫຼືເອກະລາດຂອງຕົນຖືກຄຸກຄາມ, ພ້ອມນັ້ນ ຍັງໄດ້ເຕືອນສະຫະລັດອີກເທື່ອນຶ່ງວ່າ ຖ້າສະຫະລັດສົ່ງກຳລັງທະຫານໄປສູ້ລົບຢູ່ໃນຢູເຄຣນ ຈະຖືວ່າ ເປັນການເພີ້ມທະວີຄວາມຂັດແຍ້ງກັນ ໃຫ້ຮຸນແຮງຫຼາຍຂຶ້ນ.

ທ່ານ ປູຕິນ ກ່າວ​ໃນ​ການ​ໃຫ້​ສຳພາດ​ຕໍ່​ໂທລະພາບ​ຂອງລັດ​ວ່າ ບໍ່​ມີ​ຄວາມ​ຈຳ​ເປັນຕ້ອງ​ນຳ​ໃຊ້​ອາວຸດ​ນິວ​ເຄລຍ​ ໃນ​ການ​ຮຸກຮານຢູ​ເຄຣນ​ເປັນ​ເວລາ 2 ປີຂອງຣັດ​ເຊຍ ​ແລະ ທ່ານ​ບໍ່​ຄິດ​ວ່າ​ ໂລກ​ຈະ​ກ້າວໄປ​ສູ່​ການ​ປະ​ເຊີນ​ໜ້າ​ກັນ​ທາງ​ນິວ​ເຄລຍ. ທ່ານ​ໄດ້​ພັນລະນາ​ເຖິງ​ປະທານາທິບໍດີ​ສະຫະລັດ ທ່ານ ໂຈ ໄບເດັນ ວ່າ ​ເປັນ​ນັກ​ການ​ເມືອງ​ນັກຮົບ​ເກົ່າ ທີ່​ເຂົ້າ​ໃຈ​ເຖິງ​ອັນຕະລາຍ​ຂອງ​ສົງຄາມ​ນິວ​ເຄລຍ.

ອ່ານຂ່າວນີ້ເປັນພາສາອັງກິດ:

ຟໍຣັມສະແດງຄວາມຄິດເຫັນ

XS
SM
MD
LG