ຣັດເຊຍ ໄດ້ກ່າວໃນວັນຈັນມື້ນີ້ວ່າ ເຂົາເຈົ້າໄດ້ທຳລາຍການໂຈມຕີດ້ວຍໂດຣນຂອງ ຢູເຄຣນ ໃນເຂດ ຣອສຕອຟ ທາງພາກຕາເວັນຕົກສຽງໃຕ້ຂອງ ຣັດເຊຍ, ໃນຂະນະທີ່ໄຟໄໝ້ຢູ່ໂຮງໄຟຟ້າແຫ່ງນຶ່ງໃນພາກພື້ນດັ່ງກ່າວ ໄດ້ລະງັບການບໍລິການ.
ກະຊວງປ້ອງກັນປະເທດ ຣັດເຊຍ ໄດ້ກ່າວວ່າ ລະບົບປ້ອງກັນອາກາດຂອງພວກເຂົາໄດ້ຍິງໂດຣນຂອງ ຢູເຄຣນ ຕົກທັງໝົດ 11 ລຳ ທີ່ໄດ້ມີສ່ວນຮ່ວມໃນການໂຈມຕີນັ້ນ.
ທ່ານ ວາຊີລີ ໂກລູເບຟ, ຜູ້ປົກຄອງພາກພື້ນໃນເຂດ ຣອສຕອຟ, ໄດ້ກ່າວໃນ Telegram ວ່າມັນໄດ້ມີໄຟໄໝ້ຢູ່ໂຮງໄຟຟ້າ ໂນໂວເຊີຄາສ, ທີ່ເຮັດໃຫ້ໜ່ວຍໄຟຟ້າສອງໜ່ວຍຂອງເຂົາເຈົ້າຕ້ອງຖືກຕັດອອກຈາກການປະຕິບັດການ.
ຜູ້ປະຕິບັດງານຂອງໂຮງໄຟຟ້າ OGK-2, ໄດ້ລາຍງານ ກ່ຽວກັບ ຜູ້ບາດເຈັບ ແລະ ເສຍຊີວິດຈາກເຫດການດັ່ງກ່າວ ແລະ ໄດ້ເວົ້າວ່າ ອຸປະກອນຢູ່ໂຮງງານນັ້ນແມ່ນກຳລັງຖືກປະເມີນຄວາມເສຍຫາຍຢູ່.
ກອງທັບຂອງ ຢູເຄຣນ ໄດ້ກ່າວໃນວັນຈັນມື້ນີ້ວ່າລະບົບປ້ອງກັນອາກາດຂອງເຂົາເຈົ້າໄດ້ຍິງໂດຣນ 8 ຈາກ 9 ລຳຕົກທີ່ ຣັດເຊຍ ໄດ້ໃຊ້ເພື່ອແນເປົ້າໃສ່ ຢູເຄຣນ ເມື່ອຂ້າມຄືນທີ່ຜ່ານມາ.
ກອງທັບອາກາດ ຢູເຄຣນ ໄດ້ກ່າວວ່າການສະກັດກັ້ນໄດ້ເກີດຂຶ້ນຢູ່ພາກພື້ນ ມິໂຄລາອິບ ແລະ ໂອເດຊາ.
ທ່ານ ໂອເລ ຄີເປີ, ຜູ້ປົກຄອງພາກພື້ນ ໂອເດຊາ, ໄດ້ລາຍງານຄວາມເສຍຫາຍຕໍ່ພື້ນຖານໂຄງລ່າງພະລັງງານ, ແລະ ໄດ້ກ່າວວ່າບາງເຂດແມ່ນບໍ່ມີການບໍລິການໄຟຟ້າ.
ບໍລິສັດ DTEK ເຊິ່ງແມ່ນຜູ້ຜະລິດພະລັງງານລະດັບສູງຂອງ ຢູເຄຣນ ໄດ້ກ່າວໃນ Telegram ວ່າການໂຈມຕີຂອງ ຣັດເຊຍ ໄດ້ສ້າງຄວາມເສຍຫາຍຕໍ່ໂຮງໄຟຟ້າຄວາມແຮງສູງແຫ່ງນຶ່ງ. ບໍລິສັດໄດ້ກ່າວວ່າໃນຂະນະທີ່ການບໍລິການຕໍ່ສະຖານທີ່ໆສຳຄັນຕ່າງໆແມ່ນໄດ້ສ້ອມແປງຄືນແລ້ວໃນວັນຈັນມື້ນີ້, ການປິດໄຟຟ້າສຸກເສີນດ້ວຍການບໍລິການທີ່ຈຳກັດໃນພາກພື້ນແມ່ນຈະມີຜົນບັງຄັບໃຊ້.
ຟໍຣັມສະແດງຄວາມຄິດເຫັນ