ກະຊວງປ້ອງກັນປະເທດຣັດເຊຍ ກ່າວໃນວັນຈັນມື້ນີ້ວ່າລະບົບປ້ອງກັນອາກາດ ຂອງປະເທດ ໄດ້ທຳລາຍເຮືອນບິນບໍ່ມີຄົນຂັບ ຫຼື ໂດຣນ 31 ລໍາ ແລະ ລູກສອນໄຟ 16 ລູກທີ່ຢູເຄຣນຍິງຂຶ້ນ ໃນການໂຈມຕີຊ່ວງຂ້າມຄືນ.
ກະຊວງໄດ້ກ່າວວ່າ ໂດຣນ 7 ລໍາ ແລະ ລູກສອນໄຟທຳວິຖີ 4 ລູກໄດ້ຖືກ ຍິງຕົກຢູ່ເໜືອແຫຼມໄຄຣເມຍ ທີ່ຣັດເຊຍຍຶດຄອງ, ໂດຣນ 8 ລໍາ ໄດ້ຖືກທຳ ລາຍຢູ່ເໜືອພາກພື້ນ ເຄີສກ (Kursk) ແລະ ໂດຣນ 4 ລໍາ ໄດ້ຖືກສະກັດກັ້ນ ຢູ່ເໜືອພາກພື້ນ ລີເປັດສກ໌ (Lipetsk).
ຈຸດສຸມຂອງການບຸກໂຈມຕີຂອງຢູເຄຣນ ແມ່ນເຂດ ເບລໂກຣອດ (Belgorod), ເຊິ່ງມີຊາຍແດນຕິດກັບຢູແຄຣນ. ກະຊວງປ້ອງກັນປະເທດຣັດເຊຍກ່າວວ່າ ຕົນໄດ້ທຳລາຍເຮືອບິນບໍ່ມີຄົນຂັບ 12 ລຳ ແລະລູກສອນໄຟນຳວິຖີ 12 ລຳຢູ່ເໜືອເຂດ ເບລໂກຣອດ (Belgorod).
ການໂຈມຕີໃນເຂດ ເບລໂກຣອດ (Belgorod) ມີຂຶ້ນນຶ່ງມື້ຫລັງຈາກການໂຈມຕີດ້ວຍລູກສອນໄຟຂີປະນາວຸດຂອງຢູເຄຣນ ໄດ້ເຮັດໃຫ້ຢ່າງໜ້ອຍ 15 ຄົນເສຍຊີວິດ ແລະບາດເຈັບອີກຫລາຍກວ່າ 30 ຄົນ, ຜູ້ປົກຄອງພາກພື້ນກ່າວ ໃນວັນຈັນມື້ນີ້.
ກະຊວງພະລັງງານຂອງຢູເຄຣນ ກ່າວໃນວັນຈັນມື້ນີ້ວ່າ ຕົນມີແຜນຈະນຳເຂົ້າໄຟຟ້າ 19,484 ເມກາວັດໂມງ ຊຶ່ງຈະທຳລາຍສະຖິຕິໃນທ້າຍເດືອນມີນາຜ່ານມາ ເພື່ອຕອບສະໜອງຕໍ່ຄວາມເສຍຫາຍທີ່ເພີ້ມຂຶ້ນ ຈາກການໂຈມຕີຂອງຣັດເຊຍ ທີ່ໄດ້ສົ່ງຜົນກະທົບຕໍ່ລະບົບຕາໜ່າງໄຟຟ້າຂອງປະເທດ.
ການນໍາເຂົ້າແມ່ນມາຈາກຫຼາຍພັນທະມິດ, ລວມທັງໂປແລນ, ໂຣມາເນຍ ແລະ ສໂລວາເກຍ.
ລັດຖະມົນຕີກະຊວງພະລັງງານຂອງຢູເຄຣນ ທ່ານເຈີແມນ ກາລູສເຊັງໂກ (German Galushchenko) ບອກບັນດາຜູ້ຊົມໃຊ້ໃນວັນຈັນມື້ນີ້ວ່າ ໃຫ້ຫຼຸດຜ່ອນການນຳໃຊ້ພະລັງງານຂອງເຂົາເຈົ້າລົງ, ໂດຍອ້າງເຖິງການສູນ ເສຍທີ່ສຳຄັນຂອງກຳລັງການຜະລິດ ເນື່ອງຈາກການໂຈມຕີຂອງຣັດເຊຍ.
ໃນອາທິດຜ່ານມາ, ການໂຈມຕີເຫຼົ່ານັ້ນໄດ້ລວມມີຄວາມເສຍຫາຍຕໍ່ໂຮງໄຟຟ້າພະລັງຄວາມຮ້ອນສາມແຫ່ງຂອງຢູເຄຣນ.
ທ່ານ ກາລູສເຊັງໂກ (Galushchenko) ຍັງໄດ້ເຕືອນວ່າປະຊາຊົນຄວນເລີ່ມ ກຽມໂຕຮັບມືກັບລະດູຫນາວທີ່ອາດຈະຫຍຸ້ງຍາກ.
ຟໍຣັມສະແດງຄວາມຄິດເຫັນ