ບັນດາເຈົ້າໜ້າທີ່ ຢູເຄຣນ ກ່າວວ່າ ການໂຈມຕີຂອງ ຣັດເຊຍ ໄດ້ສັງຫານຢ່າງໜ້ອຍ 7 ຄົນໃນວັນພະຫັດວານນີ້, ແລະ ບາດເຈັບອີກ 28 ຄົນ ໃນເມືອງ ຄາກີບ ທາງພາກຕາເວັນອອກສຽງເໜືອ.
ປະທານາທິບໍດີ ຢູເຄຣນ ທ່ານ ໂວໂລດີເມຍ ເຊເລັນສກີ ກ່າວວ່າການໂຈມຕີດັ່ງກ່າວແມ່ນ “ໂຫດຮ້າຍທີ່ສຸດ.” ທ່ານຍັງໄດ້ສະແດງຄວາມອຶດອັດໃຈທີ່ບໍ່ໄດ້ຮັບລະບົບປ້ອງກັນທາງອາກາດຢ່າງພຽງພໍຈາກບັນດາພັນທະມິດຕາເວັນຕົກຂອງ ກີຢິບ ເພື່ອປ້ອງກັນ ຢູເຄຣນ ຕໍ່ການໂຈມຕີດັ່ງກ່າວ.
ລັດຖະມົນຕີການຕ່າງປະເທດ ຢູເຄຣນ ທ່ານ ດິມິໂຕຣ ຄູເລບາ ໄດ້ກ່າວຢ້ຳຄຳເວົ້າຂອງທ່ານ ເຊເລັນສກີ, ໂດຍເວົ້າວ່າ ການໂຈມຕີນັ້ນໄດ້ເນັ້ນໃຫ້ເຫັນຄວາມຕ້ອງການອັນຮີບດ່ວນຂອງ ຢູເຄຣນ ສຳລັບລະບົບປ້ອງກັນອາກາດ Patriot ທີ່ຜະລິດໂດຍ ສະຫະລັດ ເພື່ອປົກປ້ອງປະຊາຊົນ ຢູເຄຣນ ຈາກການລະດົມຍິງຈາກທາງອາກາດ.
ທ່ານໄດ້ຂຽນໃນສື່ສັງຄົມ X ວ່າ “ບໍ່ເປັນຈັ່ງໂຊກ, ຄຳວ່າ ຄວາມສາມັກຄີເທົ່ານັ້ນ ທີ່ຈະບໍ່ສາມາດສະກັດກັ້ນລູກສອນໄຟທັງຫຼາຍຂອງ ຣັດເຊຍ.”
ຜູ້ປົກຄອງພາກພື້ນ ຄາກີບ ທ່ານ ໂອເລ ຊີເນຮູບອບ ກ່າວໃນ Telegram ວ່າ ຣັດເຊຍ ໄດ້ໂຈມຕີເຂດດັ່ງກ່າວຢ່າງໜ້ອຍ 15 ຄັ້ງ.
ຄາກີບ, ເຊິ່ງແມ່ນເມືອງທີ່ມີປະຊາກອນປະມານ 1 ລ້ານຄົນ ແລະ ເປັນເມືອງເອກຂອງພາກພື້ນທີ່ມີຊື່ດຽວກັນນັ້ນ, ແມ່ນຕັ້ງຢູ່ປະມານ 19 ກິໂລແມັດຈາກເຂດຊາຍແດນຕິດກັບ ຣັດເຊຍ.
ຟໍຣັມສະແດງຄວາມຄິດເຫັນ