ລິ້ງ ສຳຫລັບເຂົ້າຫາ

ວັນອັງຄານ, ໑໖ ກໍລະກົດ ໒໐໒໔

ພົນເອກລະດັບສູງຂອງສະຫະລັດກ່າວວ່າ ຂໍ້ຕົກລົງຄວາມໝັ້ນຄົງກັບ ເກົາຫຼີເໜືອ ຂອງ ຣັດເຊຍ ອາດສ້າງຄວາມຂັດແຍ້ງກັບ ຈີນ


ປະທານາທິບໍດີຣັດເຊຍ ທ່ານວລາດີເມຍ ປູຕິນ ແລະຜູ້ນໍາເກົາຫຼີເໜືອ ທ່ານກິມ ຈົງ ອຶນ, ຖ່າຍຮູບຮ່ວມກັນລຸນຫຼັງພິທີຫາລືສອງຝ່າຍ ໃນນະຄອນຫຼວງພຽງຢາງ, ເກົາຫຼີເໜືອ, ວັນທີ 19 ມິຖຸນາ 2024. (Sputnik/Kristina Kormilitsyna/Kremlin via Reuters)
ປະທານາທິບໍດີຣັດເຊຍ ທ່ານວລາດີເມຍ ປູຕິນ ແລະຜູ້ນໍາເກົາຫຼີເໜືອ ທ່ານກິມ ຈົງ ອຶນ, ຖ່າຍຮູບຮ່ວມກັນລຸນຫຼັງພິທີຫາລືສອງຝ່າຍ ໃນນະຄອນຫຼວງພຽງຢາງ, ເກົາຫຼີເໜືອ, ວັນທີ 19 ມິຖຸນາ 2024. (Sputnik/Kristina Kormilitsyna/Kremlin via Reuters)

ຂໍ້ຕົກລົງດ້ານຄວາມໝັ້ນຄົງແຫ່ງຊາດລະຫວ່າງປະທານາທິບໍດີຣັດເຊຍ ທ່ານວລາດີເມຍ ປູຕິນ ແລະຜູ້ນໍາເກົາຫຼີເຫນືອ, ມີທ່າແຮງທີ່ຈະສ້າງຄວາມຂັດແຍ້ງກັບ ຈີນ, ເຊິ່ງເປັນພັນທະມິດທີ່ສຳຄັນຂອງລັດຖະບານທີ່ໂດດດ່ຽວດັ່ງກ່າວ ມາເປັນເວລາຍາວນານ, ຕາມການກ່າວຂອງເຈົ້າຫນ້າທີ່ທາງທະຫານລະດັບສູງຂອງສະຫະລັດ ໃນວັນອາທິດວານນີ້.

ພົນອາກາດເອກ ຊີ. ຄິວ. ບຣາວ (C.Q. Brown) ປະທານ​ເສນາ​ທິການ​ຮ່ວມ, ກ່າວ​ຕໍ່​ບັນດາ​ນັກ​ຂ່າວ​ໃນ​ລະຫວ່າງ​ການ​ເດີນທາງ​ໄປ​ຕ່າງປະ​ເທດວ່າ “ພວກ​ເຮົາມີ​ອີກປະເທດອື່ນ ​ທີ່​ເຂົ້າມາແຊກແຊງແລ້ວ ໃນຕອນນີ້, ດັ່ງ​ນັ້ນ ນັ້ນ​ອາດ​ຈະເຮັດ​ໃຫ້​ເກີດ​ຄວາມ​ຂັດ​ແຍ້ງ​ກັນຫຼາຍຂຶ້ນອີກໜ້ອຍນຶ່ງ ລະຫວ່າງ ຈີນ ແລະ ຣັດ​ເຊຍ”.

“ສະນັ້ນ, ມັນເປັນເລື້ອງຫນ້າສົນໃຈທີ່ຈະໄດ້ເຫັນວ່າ ທັງສາມປະເທດເຫຼົ່ານີ້ ຈະມີວິທີການດໍາເນີນງານໃນບົດບາດດັ່ງກ່າວນີ້ແນວໃດ”.

ບັນດານັກວິ​ເຄາະ​ກ່າວ​ວ່າ ຂໍ້​ຕົກລົງ​ທີ່​ໄດ້​ລົງ​ນາມກັນ​ໃນ​ວັນ​ພຸດທີ່ຜ່ານມາ ອາດ​ຈະ​ຫຼຸດ​ຜ່ອນການຫາຜົນປະໂຫຍດ​ຂອງ​ ປັກ​ກິ່ງ ​ຕໍ່​ສອງ​ປະ​ເທດ​ເພື່ອນ​ບ້ານຂອງ​ຕົນ ​ແລະ​ຄວາມ​ບໍ່​ໝັ້ນຄົງ​ທີ່​ເພີ້ມ​ຂຶ້ນ​ອັນໃດກໍຕາມ ອາດ​ຈະ​ສົ່ງ​ຜົນ​ລົບ​ຕໍ່​ຄວາມ​ທະເຍີທະຍານ​ທາງດ້ານ​ເສດຖະກິດ ​ແລະ​ຍຸດ​ທະ​ສາດລະດັບໂລກຂອງ ຈີນ.

ໃນ​ວັນ​ພະຫັດແລ້ວນີ້, ທ່ານ ປູຕິນ ກ່າວ​ວ່າ ຣັດ​ເຊຍ ອາດ​ຈະ​ສະໜອງ​ອາວຸດຕ່າງໆ​ໃຫ້ ​ເກົາຫຼີ​ເໜືອ ​ໃນ​ອັນ​ທີ່​ທ່ານ​ໄດ້​ສະ​ເໜີ​ວ່າ ອາດຈະ​ເປັນ​ການ​ຕອບ​ໂຕ້ແບບ​ສະທ້ອນກັບ​ຕໍ່​ການ​ປະກອບ​ອາວຸດ​ໃຫ້ແກ່ ​ຢູ​ເຄຣນ ຂອງບັນດາປະເທດຝ່າຍຕາເວັນຕົກ.

ພົນອາກາດເອກ ບຣາວ ຍອມຮັບກ່ຽວກັບຄວາມເປັນຫ່ວງຂອງສະຫະລັດຕໍ່ຂໍ້ຕົກລົງດັ່ງກ່າວມານັ້ນ.

ແຕ່​ທ່ານ​ຍັງ​ໄດ້​ຜ່ອນ​ຄາຍ​ຂໍ້​ສັງ​ເກດ​ເຫຼົ່າ​ນັ້ນ ​ໂດຍການ​ສັງ​ເກດ​ເຫັນຂໍ້​ຈຳກັດ​ທີ່​ຈະແຈ້ງ​ກ່ຽວ​ກັບ​ຂໍ້​ຕົກລົງ​ດັ່ງກ່າວ ​ແລະ​ສະ​ແດງ​ຄວາມ​ສົງ​ໄສ​ວ່າ ມົສກູ​ ຈະ​ສະໜອງ “ທຸກ​ສິ່ງ​ທຸກ​ຢ່າງ” ໃຫ້ແກ່ ເກົາຫຼີເໜືອ ຕາມທີ່ພວກເຂົາ​ຕ້ອງການ.

ອ່ານຂ່າວນີ້ເປັນພາສາອັງກິດ

ຟໍຣັມສະແດງຄວາມຄິດເຫັນ

XS
SM
MD
LG