ຣັດເຊຍຮຽກຮ້ອງໃຫ້ເກົາຫຼີເໜືອຢຸດເຊົາໂຄງການກັ່ນທາດຢູເຣນຽມແລະອະນຸຍາດໃຫ້ຄະນະ
ສັງເກດການນິວເຄລຍຂອງອົງການສະຫະປະຊາຊາດ ກັບຄືນເຂົ້າໄປປະຕິບັດງານໃນເກົາຫຼີ
ເໜືອເພື່ອແຜ້ວທາງໄປສູ່ການເຈລະຈາປົດອາວຸດຂອງນາໆຊາດ.
ກະຊວງການຕ່າງປະເທດຣັດເຊຍກ່າວໃນຖະແຫຼງການສະບັບນຶ່ງ ທີ່ນຳອອກເຜີຍແຜ່ໃນວັນ
ພະຫັດວານນີ້ວ່າ ການຈັດຕັ້ງປະຕິບັດແບບໝັ້ນຄົງກ່ຽວກັບໂຄງການກັ່ນທາດຢູເຣນຽມຂອງ
ເກົາຫຼີເໜືອບໍ່ສາມາດມີຂຶ້ນໄດ້ມີແຕ່ຈະສ້າງຄວາມວິຕົກກັງວົນຢ່າງໜັກ. ຖະແຫຼງການສະບັບ ນີ້ຮຽກຮ້ອງໃຫ້ພຽງຢາງປະກາດກ່ຽວກັບການຢຸດເຊົາກິດຈະການນິວເຄລຍຕ່າງໆເປັນການ
ຊົ່ວຄາວຮວມທັງໂຄງການກັ່ນທາດຢູເຣນຽມນຳ.
ນອກນັ້ນ ມົສກູຍັງໄດ້ຮຽກຮ້ອງໃຫ້ປະເທດເພື່ອນບ້ານຄອມມິນິສເກົາຫຼີເໜືອ ເຊື້ອເຊີນຄະນະ
ກວດກາຂອງອົງການພະລັງງານປະລະມະນູສາກົນ ເຂົ້າໄປກວດເບິ່ງໂຄງການນິວເຄລຍຂອງ
ຕົນ ແລະພິສູດວ່າ ມັນເປັນໂຄງການທີ່ມີຈຸດປະສົງໃນທາງສັນຕິທໍ່ນັ້ນ.
ການຮຽກຮ້ອງດັ່ງກ່າວ ມີຂຶ້ນຫຼັງຈາກເກົາຫຼີເໜືອໄດ້ປະກາດໃນມື້ວັນພຸດຜ່ານມານີ້ ກ່ຽວກັບ
ຄວາມກ້າວໜ້າໃນການກັ່ນທາດຢູເຣນຽມສຳລັບເຕົາແຍກນິວເຄລຍທີ່ໃຊ້ນໍ້າທຳມະດາຂອງຕົນ
ທີ່ໂຮງໄຟຟ້ານິວເຄລຍ Yongbyon ນັ້ນ.
ລັດຖະມົນຕີການຕ່າງປະເທດສະຫະລັດທ່ານນາງ Hillary Clinton ໃນມື້ວັນພຸດຜ່ານມານີ້ ໄດ້ຮຽກຮ້ອງໃຫ້ເກົາຫຼີເໜືອ ເອົາບາດກ້າວທີ່ໜັກແໜ້ນເພື່ອປະຖິ້ມໂຄງການນິວເຄລຍຂອງ
ຕົນແລະຊຸກຍູ້ໃຫ້ມີສັນຕິພາບແລະສະຖຽນລະພາບ.