ນາຍຍົກລັດຖະມົນຕີຣັດເຊຍ ທ່ານ Viadimir Putin ຜູ້ກໍາລັງຊອກຫາສຽງຢາກຈະເປັນ
ປະທານາທິບໍດີອີກຄັ້ງທີສາມ ຊຶ່ງເປັນຄັ້ງປະຫວັດສາດນັ້ນໄດ້ຮັບຮູ້ວ່າ ປະຊາຊົນຣັດເຊຍ
ຕ້ອງການຢາກມີປາກສຽງຢູ່ໃນວົງການລັດຖະບານຫຼາຍຂຶ້ນ ແລະຄວາມຈຳເປັນໃນການ
ຟື້ນຟູລະບອບການເມືອງຂອງປະເທດຄືນໃໝ່.
ຢູ່ໃນບົດຂຽນ ທີ່ເຜີຍແຜ່ໃນວັນຈັນວານນີ້ ຂອງໜັງສືພີມລາຍວັນ Kommersant ນັ້ນ
ທ່ານ Putin ໄດ້ຍອມຮັບວ່າ ລັດຖະບານໄດ້ລ້າຊ້າຕໍ່ການຮຽກຮ້ອງຈາກປະຊາຊົນໃນ
ການໃຫ້ມີປາກສຽງເພີ້ມຂື້ນໃນວົງ ການລັດຖະບານນັ້ນ.
ທ່ານກ່າວຕື່ມອີກວ່າ ສັງຄົມພົນລະເຮືອນຣັດເຊຍໄດ້ພາກັນເຕີບໂຕ ເອົາການເອົາງານ
ແລະມີຄວາມຮັບຜິດຊອບຫຼາຍຂຶ້ນ ແລະລັດຖະບານຄວນຕິດຕາມໃຫ້ທ່ວງທັນກັບຄວາມ
ຕ້ອງການຂອງສາທາລະນະ ແຕ່ທ່ານກໍໄດ້ເຕືອນແລະຢືນຢັດວ່າ ປະເທດຕ້ອງການໃຫ້ມີ
ສູນກາງຂອງລັດຖະບານສະຫະພັນທີ່ເຂັ້ມແຂງ.
ຂ່າວສານຂອງວັນຈັນ ໄດ້ມີຂຶ້ນຫຼັງຈາກການເດີນປະທ້ວງຄັ້ງໃຫ່ຍໃນວັນເສົາຜ່ານມາຊຶ່ງ
ມີປະຊາຊົນຫລາຍສິບພັນຄົນພາກັນຖືປ້າຍປະທ້ວງທີ່ກ່າວວ່າ “ຣັດເຊຍທີ່ປາສະຈາກທ່ານ
Putin”. ສ່ວນບາງກຸ່ມພາກັນສະໜັບສະໜຸນລັດຖະບານ. ການຢັ່ງສຽງສະແດງໃຫ້ເຫັນ
ວ່າ ທ່ານ Putin ມີທ່າທາງວ່າຈະໄດ້ໄຊຊະນະການເລືອກຕັ້ງເປັນປະທາທິບໍດີ ໃນວັນທີ່ 4
ເດືອນມີນາທີ່ຈະມາເຖິງນີ້.
ຊາວຣັດເຊຍພາກັນໂຮມຊຸມນຸມປະທ້ວງການເລືອກຕັ້ງສະພາຄັ້ງໃຫ່ຍ ມາແຕ່ເດືອນທັນວາ
ແລ້ວ ໂດຍເຂົາເຈົ້າກ່າວຫາວ່າ ມີການສໍ້ໂກງຄະແນນສຽງ ເພື່ອຊ່ອຍພັກສາມັກຄີຣັດເຊຍ
ຂອງທ່ານ Putin. ນອກນັ້ນເຂົາເຈົ້າຍັງກ່າວຫາປະທານາທິບໍດີ Dmitry Medvedev
ແລະທ່ານ Putin ວ່າປຸ້ນຈີ້ການລົງຄະແນນສຽງໃນການເລືອກຕັ້ງປະທານາທິບໍດີໃນເດືອນ
ມີນາ ຫລັງຈາກທ່ານ Medvedev ຕົກລົງວ່າຈະບໍ່ສະມັກເລືອກຕັ້ງເພື່ອເປີດຊ່ອງທາງໃຫ້
ແກ່ທ່ານ Putin ໄດ້ກັບຄືນມາເປັນປະທານທິບໍດີອີກຄັ້ງນຶ່ງ.
ນັບຕັ້ງແຕ່ນັ້ນເປັນຕົ້ນມາ ທ່ານ Putin ແລະ ປະທານາທິບໍດີ Medvedev ໄດ້ໃຫ້ຄໍາໝັ້ນ
ສັນຍາວ່າ ຈະອະນຸຍາດໃຫ້ມີຫລາຍພັກການເມືອງເພີ່ມຂຶ້ນແລະຈະຟື້ນຟູການເລືອກຕັ້ງໂດຍ
ກົງບັນດາເຈົ້າ ແຂວງປົກຄອງເຂດຕ່າງໆ.