ຜູ້ບັນຊາການທະຫານ ອົງການ NATO ນາຍພົນ Philip
Breedlove ຈາກກອງທັບສະຫະລັດກ່າວວ່າ ພັນທະມິດ
ຈຳເປັນຕ້ອງໄດ້ມີການສືບລັບທາງທະຫານທີ່ດີຂື້ນ ປະຕິ
ບັດງານທາງພາກພື້ນດິນ ຢູ່ໃນພາກຕາເວັນອອກຂອງຢູ
ເຄຣນ ບ່ອນທີ່ທ່ານກ່າວວ່າ ກຳລັງທະຫານຣັດເຊຍ ປາ
ກົດວ່າພວມເສີມຄວາມເຂັ້ມແຂງທາງທະຫານໃຫ້ແກ່ເຂດ
ທີ່ຕົນຍຶດມາໄດ້ ເຖິງແມ່ນວ່າໄດ້ມີການຢຸດຍິງມາໄດ້ສອງ
ເດືອນແລ້ວກໍຕາມ.
ການຊັ່ງຊາຂອງນາຍພົນ Breedlove ໄດ້ມີຂຶ້ນ ໃນວັນພະ
ຫັດວານນີ້ ໃນການໃຫ້ການ ຕໍ່ຄະນະກຳມະການກອງທັບ
ຂອງສະພາສູງທີ່ນະຄອນຫລວງວໍຊິງຕັນ. ທ່ານໄດ້ກ່າວຫາມົສກູວ່າ ສົ່ງ “ອາວຸດໜັກ ໃຫ້
ການເຝິກແອບ ແລະໃຫ້ຄຳປຶກສາ” ແກ່ພວກກະບົດແບ່ງແຍກດິນແດນນິຍົມຣັດເຊຍ ຢູ່
ໃນພາກຕາເວັນອອກຂອງຢູເຄຣນ ພ້ອມດ້ວຍ “ການຍິງປືນໃຫຍ່ສະໜັບສະໜູນ ແລະ
ຍຸດທະວິທີ ພ້ອມທັງການຊ່ວຍເຫລືອໃນລະດັບການປະຕິບັດງານຕໍ່ຕ້ານທາງອາກາດ.”
ນາຍພົນ Breedlove ຍັງໄດ້ຍອມຮັບວ່າ “ມີຊ່ອງຫວ່າງທີ່ສຳຄັນໃນການເກັບກຳແລະວິເຄາະຂໍ້ມູນ” ກ່ຽວກັບການສືບລັບຢູ່ໃນພາກຕາເວັນອອກຂອງຢູເຄຣນໃນຂະນະທີ່ຄວາມ
ຮຽກຮ້ອງຕ້ອງການດ້ານສືບລັບເພີ້ມຂື້ນ ພາຍໃຕ້ “ສະພາບແວດລ້ອມຂອງການຖືກຂົ່ມຂູ່”
ທີ່ຍັງຮວມທັງ ສົງຄາມກາງເມືອງໃນຊີເຣຍແລະ ຄວາມບໍ່ໝັ້ນຄົງຢູ່ໃນອາຟຣິກາເໜືອ ທີ່ໄດ້
ເຮັດໃຫ້ມີການຫລັ່ງໄຫລໜີຂອງພວກ ອົບພະຍົບໄປສູ່ຢູໂຣບນັ້ນ.
ທ່ານໄດ້ໃຫ້ເຫດຜົນກ່ຽວກັບຊ່ອງຫວ່າງນີ້ວ່າ ສ່ວນໃຫຍ່ແລ້ວແມ່ນເປັນຍ້ອນ ການຫລຸດ
ລົງຢ່າງໃຫຍ່ຫຼວງ ໃນການສືບລັບກ່ຽວກັບຣັດເຊຍ ນັບຕັ້ງແຕ່ສົງ ຄາມເຢັນໄດ້ສິ້ນສຸດລົງ
ໃນຂະນະທີ່ການສືບລັບຂອງປະເທດຕາເວັນຕົກ ໄດ້ຖືກຫັນໄປໃສ່ສົງຄາມໃນອີຣັກແລະ
ອັຟການິສຖານ.
